Amǝ Roma 2

Ɓashi mǝɓafoe mala Ɓakuli amur cauɓikea

1We ka, a kǝ twali ama a nǝ́ pakki amǝno yì aɓwana ka ɓashi, sǝ a nda kǝla yia nǝ ɓealɓikea, a panǝ kun nacau ɗang! Ɓǝ̀ we ka a na ama yia ka amǝ'ɓealɓikea na ɓǝa pea wia tanni ka, a ndaban pakki ɓamuro ɓashi, acemǝnana we mana a kǝ ɓashi aɓea ɓwana ka, kǝ àkǝ̀ gir nì na gbal a pakkiyi ka.#2:1 Ɓalli gbal aɓa: Mat 7:1; Luk 6:37. 2Sǝm sǝlǝna ama Ɓakuli aɓa pe male mala kpata mǝsǝcau ka, nǝ̀ ɓashi koyana mǝnana pakkiyi a'ulang agir mǝnana ani ka. 3Mǝnana a kǝ ɓashi aɓwana ace pakki amǝnia yì agir ka, a kǝ sǝni kǝla a nǝ api ɓashi mala Ɓakuli le, yi mana kǝ àkǝ̀ gir nì na a pakkiyi gbal ka? 4We ka, a sǝn nggea ɓwamuru, andǝ twal gandǝa, andǝ munyi mala Ɓakuli mǝnana ndanǝi a rǝo raka re? Mǝnia ka kǝgir na abano re? A sǝlǝ ado ama ɓwamuru male ka nda ace mǝnana nǝ̀ nyesǝo wu pwanzali abani, wu nying buo arǝ cauɓikea ka re?

5Sǝ acemǝnana we ka a ndanǝ murcandǝa, a ɓinǝ nying buo arǝ cauɓikea ka, a nda rǝ rambǝi ɓamuro candǝna tanni. Acemǝnana pwari mala bumlulla na kǝ yiu ka, mǝnana ɓashi mǝɓafoe mala Ɓakuli nǝ̀ lǝmndǝ rǝì ka. 6Ɓakuli nǝ̀ ɓashi koyana le ka amur gir mǝnana pak ka.#2:6 Ɓalli gbal aɓa: Ang 62:12; Pas 24:12; Mat 16:27; 1Kor 3:8; 2Kor 5:10; Sǝn 22:12. 7Aɓwana mǝnana à lidǝmbǝa nǝ pe mǝɓoarne sǝ à kǝ alta ɓoarɓwa, andǝ gulo, andǝ do api-lú nǝban Ɓakuli ka, Ɓakuli nǝ̀ pea wia yilǝmu mǝnana málá male pà kàm raka. 8Sǝ bumlulla andǝ bumpina male ka nǝ̀ sulǝo amur amǝ'earce ɓamuria, andǝ amǝɓinǝ kpata mǝsǝcau ace gya ata ɓealɓikea. 9Nggea tanni nakam andǝ rǝpina amur aɓwana mǝnana à lidǝmbǝa nǝ gya aɓa ɓealɓikea ka. Nǝ̀ tite nǝ ɓwa Yahudi sǝ ɓwa mǝnana ɓwa Yahudi na raka. 10Sǝ aɓwana mǝnana à kǝ pak mǝɓoarne ka, ɓoarɓwa andǝ gulo andǝ dorǝpwala mala Ɓakuli nǝ̀ sulǝo amuria. Tite nǝ ɓwa Yahudi sǝ ɓwa mǝnana ɓwa Yahudi na raka. 11Mǝnia ka nda acemǝnana Ɓakuli ka, kǝ tàrban ɗang.#2:11 Ɓalli gbal aɓa: Nggur 10:17; 2Kpa 19:7; Gal 2:6; Afi 2:9; Kol 3:25; 1Bit 1:17.

12Aɓwana mǝnana amǝ Yahudi na ɗang sǝ à surǝ Nggurcau mala Ɓakuli mǝnana pe Musa raka, ɓǝa pak cauɓikea ka à nǝ̀ kiɗikea. Ɓashi malea ka, pà nǝ̀ pang nǝ Nggurcau mala Ɓakuli mǝnana à gilǝì nǝ gilǝe ka ɗang. Sǝ aɓwana mǝnana à surǝ Nggurcau ka, à nǝ̀ ɓashia wia nǝ gir mǝnana Nggurcau na ka.#2:12 Ɓalli gbal aɓa: Rom 3:19; 1Kor 9:21. 13Sǝ pa ace ok Nggurcau nǝmurǝì sǝ ɓwa nǝ̀ duk mǝɓoarne aban Ɓakuli ɗang, nda a tarǝia andǝ pak agir mǝnana Nggurcau bang ngga.#2:13 Ɓalli gbal aɓa: Jem 1:22-23,25. 14Ko nggearǝ aɓwana mǝnana amǝ Yahudi na ɗang, mǝnana à pà nǝ́ Nggurcau mala Ɓakuli raka, à kǝ̀ lǝmndǝa ama Nggurcau mala Ɓakuli nakam a ɓabumia. Acemǝnana ɓǝ̀ ɗenyicau malea lǝmndǝia wia gir sǝ à pe, sǝ karǝ nǝ cau mǝnana Nggurcau bang ngga, yia ka à dumǝna nggurcau mala ɓamuria, kat andǝ amani ama à pànǝ Nggurcau raka. 15À lǝmndǝi aɓa pe ama Nggurcau mala Ɓakuli ka à gilǝni a ɓabumia, sǝ ɓabumia andǝ ɗenyicau malea ka, à kǝ lǝmndǝia wia ko à ɓwarkina, ko à nda ban pak mǝɓoarne. 16Sǝ mǝnia ka nda Cau Amsǝban mǝnana ǝn nggǝ hamnǝi ka, ama pwari na kǝ yiu ka, mana Ɓakuli nǝ̀ ɓashi aɓwana amur aɗenyicau ɓa-sǝmbǝrǝa malea nǝ bu Yesu Kǝrǝsti.#2:16 Ɓalli gbal aɓa: Ham 12:14; Rom 16:25; 1Kor 4:5.

Amǝ Yahudi andǝ Nggurcau mala Musa

17We mǝnana a kǝ tunǝ ɓamuro ama a nda ɓwa Yahudi, a kǝ guli arǝ Nggurcau sǝ a kǝ nggori nǝ Ɓakuli. 18A surǝna rǝgir mǝnana Ɓakuli earkiyi ce ama wu pak ka; a surǝna rǝ mǝsǝcau acemǝnana à kanino anggurcau male. 19A ndanǝ sǝlǝe kàngkàng ama a nda mǝbwalgara mala ante, sǝ a nda tǎlaban mala aɓwana mǝnana à do aɓa pǝndǝa ka. 20A kǝ sǝni kǝla a nǝ duk mǝkwarkir amǝ ɗwanyi sǝlǝe andǝ mǝkania amuna gir aɓa njar mala Ɓakuli, acemǝnana surǝgir andǝ mǝsǝcau kat ka ndakam aɓa Nggurcau ka. 21We mǝnana a kǝ kani aɓwana gir ka, palang sǝ a pà nǝ́ kani ɓamuro ɗang? A banggi aɓwana ama ɓǝa kǝa iun'i ɗang, sǝ we nǝ ɓamuro ka, a kǝ iun'i re? 22A na ama ɓǝa kǝa nongnǝban a nza nǝ doɓala ɗang, sǝ we ka a kǝ pak cauɓikea nongnǝban a nza nǝ doɓala re? A kǝ ɓinǝce peri ata ankúl, sǝa ma a kǝ pakturo nǝ agir mǝnana à iuwia nǝ iuwe a ndà mala alú ka re? 23A kǝ nggori ama a surǝna rǝ Nggurcau mala Ɓakuli, sǝa ma à kǝ pe wi gulo ɗang, acemǝnana à kǝ pár Nggurcau male. 24Pà ɓà sǝ Malǝmce bangŋa ama, “Ace cau ma'wun, wun amǝ Yahudi sǝ aɓwana mǝnana arǝ acili anzali ka à kǝ pak ce Ɓakuli ɓà”#2:24 Ɓalli gbal aɓa: Isha 52:5; Ezǝk 36:22. ɗang.

25Kasǝ-ɓatau ka ndanǝ gir mǝɓoarne ate ɓǝ̀ wu kǝ kpata Nggurcau mala Ɓakuli ka. Sǝ ɓǝ̀ wu kǝ pár Nggurcau mala Ɓakuli ka, wu dumǝna kǝla weama à kasǝa wun ɓatau ɗang. 26Sǝ aɓwana mǝnana amǝ Yahudi na raka, ɓǝa kpata Nggurcau mala Ɓakuli ka, Ɓakuli pa nǝ̀ twalia kǝla weama à kasǝnia wia ɓatau re? 27Mǝsǝcau ka, nda mǝnana ama aɓwana mǝnana à kasǝ ɓatea raka, mana à bwal Nggurcau mala Ɓakuli ka, à nǝ̀ mak wun nǝ ɓashi, wun amǝ Yahudi mana à kasǝ ɓata wun, wu ndanǝ Nggurcau mala Ɓakuli, sǝ wu kǝ kpate raka.

28Duk ɓwa Yahudi mǝɓafoe ka, pà acemǝnana ɓwa ka à ɓǝlì a tau mala amǝ Yahudi, ko acemǝnana à kasǝi wi ɓate ka ɗang. 29Awo pa anggo ɗang, ɓwa Yahudi mǝɓafoe ka, nda ɓwa mǝnana ɓabumi ka à nggaɗini, nrě gilǝkina andǝa Ɓakuli; sǝ mǝno ka turo mala Bangŋo mala Ɓakuli na, kpata Nggurcau na ɗang. Ɓwa kǝla mǝno ka, ɓwangsǝban male kǝ pur aban ɓwapǝndǝa ɗang, kǝ pur nǝban Ɓakuli.#2:29 Ɓalli gbal aɓa: Nggur 30:6.

Currently Selected:

Amǝ Roma 2: mbu

Highlight

Copy

Compare