Amǝ Roma 1

Makkun mala Bulǝs

1Mǝnia yì cautera ka pur nǝban Bulǝs, guro mala Kǝrǝsti Yesu, mǝnana Ɓakuli tunǝi ɓǝ̀ duk mǝ'mishan, sǝ tarrì ace turo hamnǝ bǝsa Cau Mǝɓoarne mala Ɓakuli ka. 2Ɓakuli pacau ace mǝnia yì Cau Amsǝban ngga, ɓara-ɓara nǝban amǝ'ɓangna male aɓa Malǝmce Mǝfele. 3Cau Amsǝban ngga, ndá amur Muni, mǝnana do ɓanza male ka à ɓǝli a tau mala Dauda. 4Sǝ à yì lǝmndǝí, Muna mala Ɓakuli na, nǝ loasǝo mǝnana à loasǝi a ɓembe nǝ rǝcandǝa mala Bangŋo Mǝfele ka. Yì nda Yesu Kǝrǝsti Mǝtala sǝm.

5Nǝ ban Kǝrǝsti sǝ Ɓakuli pa sǝm ɓwamuru andǝ ɓoro mala do mǝ'mishan, ɓǝ̀ sǝm ne aɓwana arǝ anzali a koya ban ngga, gir mǝnana Ɓakuli pa acea ka, ace mǝnana ɓǝa paɓamuria, ɓǝa oki wi sǝ anggo ka lullǝi ɓǝ̀ kum gulo.#1:5 Ɓalli gbal aɓa: Aturo 26:16-18; Rom 15:17; Gal 2:7,9. 6Wun ngga, wu nda aɓalǝ aɓwana mǝnana à tunǝia ɓǝa duk amala Yesu Kǝrǝsti ka.

7Ən nggǝ gilǝa wun, wun kat a Roma, mǝnana Ɓakuli earce wun sǝ tunǝ wun ɓǝ̀ wu duk amale ka.

Ɓǝ̀ Ɓakuli Tar sǝm andǝ Mǝtalabangŋo Yesu Kǝrǝsti, pa wun ɓwamuru andǝ dorǝpwala.

Bulǝs earǝna ce ká Roma

8A tite ka, ǝn nggǝ pakki Ɓakuli mem yàwá nǝban Yesu Kǝrǝsti ace wun kat, acemǝnana paɓamuru ma'wun abani ka, ɓanza kat ongŋǝna ce. 9Ɓakuli mǝnana ǝn nggǝ pakki wi turo nǝ ɓabumam kat, aɓa hamnǝ Cau Amsǝban mala Muni ka, nda mǝ'nakunam ama ǝn nggǝ pak hiwi ace wun tutu. 10Aɓa hiwi mem koya pwari ka, ǝn nggǝ zǝmbǝa ɓǝ̀ Ɓakuli ear ka, ko ɓǝ̀ lang ngga ɓǝ̀ ǝn kum njar a masǝlǝate ɓǝ̀ ǝn kya aban wun.

11Mim ngga ǝn earce kǝrkǝr a ɓabumam ɓǝ̀ ǝn kya sǝn wun, ɓǝ̀ ǝn pa wun aɓoro ɓa Bangŋo mǝnana nǝ̀ pa wun rǝcandǝa ka. 12Gir mana ǝn nakiyi nda mana ama, ǝn nggǝ earce ɓak ɓabum wun nǝ paɓamuru mem, sǝ mim gbal ka mǝ kum ɓakɓabum nǝ ma'wun yì paɓamuru.

13Wun amǝ'eambǝam, ǝn nggǝ earce ɓǝ̀ wu sǝlǝ ama ǝn kànì a ɓabumam kusǝ pas mǝ nǝ ká a sǝn wun, sǝ ǝn kum njar ɗang, ba ado. Ən nggǝ earce yinǝ aɓwana aɓalǝ wun aban Yesu, kǝla mǝnana ǝn kum aɓea aɓwana aɓalǝ akún arǝ aɓea anzali ka.#1:13 Ɓalli gbal aɓa: Aturo 19:21.

14Dumǝnam pup ɓǝ̀ ǝn pakki amǝ Gǝrik andǝ aɓwana mǝnana amǝ Gǝrik na raka turo, amǝ sǝlǝe andǝ amǝ ɗwanyi sǝlǝe. 15Ace mani ka, ɓabumam kǝ pi arǝ ká aban wun gbal, wun mǝnana aɓa Roma ka, ɓǝ̀ ǝn kya hamnǝ Cau Amsǝban.

Rǝcandǝa mala Cau Amsǝban mala Ɓakuli

16Mim ngga kǝsǝkya kǝ pakkam arǝ Cau Amsǝban mala Kǝrǝsti ɗang, acemǝnana mǝnia ka rǝcandǝa mala Ɓakuli na ace amsǝ aɓwana mana à paɓamuria ka, tite nǝ ɓwa Yahudi, sǝ ɓwa mǝnana ɓwa Yahudi na raka.#1:16 Ɓalli gbal aɓa: Mar 8:38; 1Kor 1:18,24. 17Yì Cau Amsǝban ngga, ndá kǝ̀ lǝmndǝa sǝm lang sǝ Ɓakuli kǝ nggaɗi sǝm, ɓǝ̀ sǝm pǝlǝ aɓwana amǝɓoarne a ɓadǝmbǝi. Mǝnia ka kǝ pa anggo nǝ guli arǝ Kǝrǝsti, twal a tite kya pur a masǝlǝate, kǝla mǝnana Malǝmce na ka ama: “Ɓwa mǝnana kumǝna akban aban Ɓakuli ka, nǝ̀ dumnǝ yilǝmu aɓa guli arǝ Ɓakuli.#1:17 nǝ̀ dumnǝ yilǝmu aɓa guli arǝ Ɓakuli: Ko: “nǝ̀ dukdo guli arǝ Ɓakuli.””#1:17 Ɓalli gbal aɓa: Hab 2:4.

Bumlulla mala Ɓakuli amur cauɓikea

18Ɓakuli kǝ lǝmndǝ bumlulla male nǝ kuli amur amǝ'cauɓikea andǝ amǝ'ɓealɓikea mǝnana à kǝ par mǝsǝcau nǝ aɓealɓikea malea ka, 19acemǝnana gir mana ɓoaro ɓǝa surǝì amur Ɓakuli ka, sǝmbǝrǝia wia ɗang. Ɓakuli ka lǝmndǝnia wia a banfana. 20Ɗiɗyal mǝnana Ɓakuli pusǝ ɓanza ka, ɓwapǝndǝa sǝnǝna nzali andǝ kuli. Nǝ agir mǝnana Ɓakuli pea ka, à sǝnǝna aɓǝalǝu male bwāng, kǝla rǝcandǝa male mana kǝ mal raka, andǝ pǎ male mala Ɓakuli. Ace mani ka, à pànǝ kun nacau ace ɗwanyi surǝ Ɓakuli ɗang ko bǝti!

21E, à surǝna Ɓakuli, sǝ à ɓinǝ peri abani kǝla Ɓakuli, à kǝ pakki wi yàwá ɗang. A kun mani ka, ɗenyicau malea pǝlǝ mǝɓane, sǝ ɓabumia do a pǝndǝa.#1:21 Ɓalli gbal aɓa: Afi 4:17,18. 22A ne malea ka, à nda ka amǝ'sǝle, sǝa ma yia ka, à kwar ɗang. 23Amur mǝnana ɓǝa peri aban Ɓakuli mǝɓoarɓwe mǝnana nǝ yilǝmu málá male pà kàm raka, à kara à kutia peri aban aɓǝ̀nzál mǝnana à pea kǝla ɓwapǝndǝa andǝ anyal, andǝ agirkusǝu andǝ agir-nzali ka.#1:23 Ɓalli gbal aɓa: Nggur 4:16-18; Aturo 17:29.

24Ace mani ka, Ɓakuli vwaki bui a rǝia aɓa pakkia agir mɓeami malea mala nonggi nǝ rǝarǝu, mǝnana ɓabumia earkiyi ce ka, sǝ à kutia pakkia agir kǝsǝkya a rǝarǝia. 25Yia ka à nggaɗi mǝsǝcau mala Ɓakuli nǝ nyir, sǝ à kǝ peri aban agir mǝnana Ɓakuli pusǝia ka, à ɗeki nggearǝ Ɓakuli mǝnana pusǝ agir kat, mǝnana ɓoaro ɓǝa kpate, ɓǝa ɓwangsǝi ba ka! Amin.

26Acemǝnana à pa anggo ka, nda Ɓakuli nyia aɓalǝ anpel mala agir kǝsǝkya malea. Nggearǝ amamǝna malea ka à nying dolabura, à kǝ pak mɓwama nǝ rǝarǝia. 27Anggo gbal sǝ aburana nying nongŋo nǝ amālea, à kuti aban nonggi nǝ rǝarǝia. Aburana kǝ pak agir kǝsǝkya nǝ rǝarǝia. Nda gir mǝnana tsǝa sǝ à nunmbi ɓamuria ɓashi andǝ tanni, ata cau mala mǝno yì agir mǝɓane mǝnana à kǝ pakkia ka.

28Acemǝnana amǝno yì aɓwana ka à ɓinǝ pak turo nǝ sǝlǝe mala Ɓakuli ka, Ɓakuli nyia gbal andǝ aɗenyicau mǝɓane malea, ɗekia ɓǝa pakkia agir mǝnana ɓoaro ɓǝa pea raka. 29Yia ka, do malea lumsǝ nǝ koya ulang turo ɓealɓikea, andǝ mɓali, andǝ ɓinǝmuru andǝ mwararǝu, andǝ walki-alú, andǝ munǝki-amunǝo, andǝ swarkiban, andǝ ce'shiria, andǝ twal lullǝú. 30Yia ka à kǝ na cau mǝɓane anzǝm aɓwana, amǝɓinǝ mur Ɓakuli na, à kǝ okban ɗang, à ndanǝ twalmuru, andǝ nggori. Ɗenyicau malea ka nda aɓa pusǝki abǝsa njar mala pakkia agir mǝɓane, sǝ à kǝ oki amǝɓǝlia ɗang. 31À pànǝ ɓabum ɗang, à kǝ lumsǝ cau malea mǝnana à ne ka ɗang. Yia ka à lǝmndǝkiyi pe mǝɓoarne ɗang, sǝ à pànǝ mǝsǝswatǝr arǝ aɓwana ɗang. 32À sǝlǝna ama nzongcau mala Ɓakuli bangŋa ama, aɓwana mǝnana à kǝ pakkia ulang amǝnia yì agir ka, à nǝ̀ ká lú. Sǝ kat andǝ sǝlǝe mǝno ka à go amur pakkia agir nì nǝmurǝia ɗang, à kǝ earnǝ aɓwana mǝnana à kǝ pakkia agir nì ka.

Currently Selected:

Amǝ Roma 1: mbu

Highlight

Copy

Compare