Amǝ Roma 15

Wu pwasǝbum aɓwana

1Sǝm mǝnana sǝm ndanǝ rǝcandǝa ka, ɓoaro ɓǝ̀ sǝm bwali aɓwana mǝnana à gatti ka, ce sǝm lǝmndǝ earce ɓamuru ɗang. 2Koyan aɓalǝ sǝm ngga ɓǝ̀ kǝ̀ ɗenyi nǝ ɓi mǝ'murkala, sǝ ɓǝ̀ kǝ̀ pakki wi mǝɓoarne mǝnana nǝ̀ loasǝi aɓa paɓamuru ka. 3Ko nggearǝ Kǝrǝsti ka dukdo pwasǝbum ɓamuri ɗang. Kǝla mǝnana Malǝmce bang ngga, “Asangban mala aɓwana mǝnana à sangŋo ka, We Ɓakuli, à sulǝna a muram.”#15:3 Ɓalli gbal aɓa: Ang 69:9. 4Agir mǝnana à gilǝia kat aɓa Malǝmce ɗiɗyal ka, à gilǝia ace kwarkir sǝm, ace mǝnana nǝ ɓakɓabum andǝ munyi mǝnana sǝm nǝ̀ kumo aɓa cau mala Malǝmce ka, sǝm nǝ̀ dum nǝ tsǝkɓalǝu.#15:4 Ɓalli gbal aɓa: Rom 4:23-24; 1Kor 9:10; 2Tim 3:16.

5Sǝ Ɓakuli mǝnana pākiyi gandǝrǝu andǝ girikiban ngga, ɓǝ̀ pa wun ɓabum dotarǝu arǝarǝ wun, wu kǝ kpata ulang pe mala Kǝrǝsti Yesu. 6Sǝ anggo ka, wun a tarǝ wun kat ka, wu nǝ̀ ɓwangsǝ Ɓakuli, yì Tar Mǝtala sǝm Kǝrǝsti Yesu, nǝ giu mwashat.

Cau Amsǝban ace aɓwana mala anzali kat

7Ace mani ka, wu ak rǝarǝ wun, kǝla mǝnana Kǝrǝsti ak wun ngga, ace mǝnana mǝnia ka, nǝ̀ yinǝì Ɓakuli gulo. 8Mǝ nda aban bangga wun ama, turo mala Kǝrǝsti mǝnana yi pak ka, pè ace amǝ Yahudi ace lǝmndǝ ama Ɓakuli ka mǝ'mǝsǝcau na arǝ apacau male mǝnana pa aban akea ka. 9Ɗǝm ngga Kǝrǝsti pak ture ace mǝnana aɓwana mala acili anzali ka, à nǝ̀ ɓwangsǝ Ɓakuli ace ɓwamuru male. Malǝmce ka bangŋǝna ama,

“Ace mǝnia ka

mǝ nǝ ɓwangsǝo

aɓalǝ aɓwana mala

acili anzali.

Mǝ nǝ tukia anggyal

ɓwangsǝ lullǝo.”#15:9 Ɓalli gbal aɓa: 2Sam 22:50; Ang 18:49.

10Malǝmce ɗǝm ngga bangŋa ama,

“Wun aɓwana mala

acili anzali,

wu pak banɓoarnado

a tarǝ wun,

wunǝ aɓwana mala Ɓakuli.”#15:10 Ɓalli gbal aɓa: Nggur 32:43.

11Nyar ɗǝm ngga bangŋa ama,

“Wun aɓwana mala

acili anzali kat,

wu ɓwangsǝki Mǝtalabangŋo.

Wun aɓwapǝndǝa kat,

wu ɓwangsǝkì!”#15:11 Ɓalli gbal aɓa: Ang 117:1.

12Ɗǝm ngga, Ishaya bangŋa ama,

“Mǝkà Jeshi nǝ̀ yiu;

nǝ̀ yia duk murǝm,

amur aɓwana mala acili anzali.

Aɓwana mǝnana amǝ Isǝrayila

na raka,

à nǝ̀ tsǝk ɓalǝia a rǝì.”#15:12 Ɓalli gbal aɓa: Isha 11:10.

13Ɓǝ̀ Ɓakuli mǝpà tsǝkɓalǝu lumsǝ wun nǝ banɓoarnado, andǝ dorǝpwala, aɓa paɓamuru ma'wun abani, ace mǝnana ɓǝ̀ wu lumsǝ nǝ tsǝkɓalǝu nǝ bu rǝcandǝa mala Bangŋo Mǝfele.

Turo Mishan mala Bulǝs aban aɓwana arǝ anzali

14Wun amǝ'eambǝam, mim nǝ ɓamuram ngga ǝn sǝlǝna nǝma wu lumsǝna nǝ pe mǝɓoarne, wu ndanǝ sǝlǝ kat, wu nǝ̀ gandǝ kania rǝwun. 15Mim ngga aɓa cautera mǝnia ka, ǝn bangga wun cau bwāng amur aɓea gir, ɓangciu pa a rǝam ɗang, ace kasǝɓalǝ wun. Ən gilǝ mǝnia ka ace ɓwamuru mala Ɓakuli mǝnana lǝmndǝam sǝ twalam 16mǝ duk mǝturo mala Kǝrǝsti Yesu aban aɓwana mala acili anzali ka. Ɓakuli twalam ace mǝnana mǝ pak turo kǝla pǝris, aban hamnǝ bǝsa Cau Mǝɓoarne male. Sǝ aɓa mǝno anggo ka aɓwana mala acilia nzali ka ɓǝa duk ɓoro mǝnana gir-á na aban Ɓakuli, yia aɓwana mǝnana Bangŋo Mǝfele tarnia ace Ɓakuli ɓǝa duk amale ka.

17Ace mani ka, ǝn nggǝ nggori nǝ Kǝrǝsti Yesu aɓa turo mem aban Ɓakuli. 18Amuri ka, ǝn nggori nǝ kǝgir ɗang, she kǝ gir mǝnana Kǝrǝsti pe nǝ buam aban yinǝ aɓwana mala acili anzali, aban oki Ɓakuli nǝ cau mǝnana ǝn hamnǝi andǝ turo mǝnana ǝn pe aɓalǝia ka. 19Amur mǝno ka, mǝ nǝ nggori nǝ agir-ndǝlǝki andǝ agir-gyambǝliban mǝnana Kǝrǝsti pea aɓa rǝcandǝa mala Bangŋo mala Ɓakuli ka. Anggo sǝ ǝn hamnǝ Cau Amsǝban mala Kǝrǝsti pupup aɓa gya mem kat, twal a Urǝshalima kya bwal a Ilirikum. 20Mǝnia ka nda cau mǝnana ǝn twal a ɓabumam ngga, ɓǝ̀ ǝn hamnǝ Cau Amsǝban mala Kǝrǝsti aban mǝnana à malaká oe kam raka, ace mǝnana mǝ ngga ɓakɓa amur kusǝɓǎ mala ɓe kǝ ɓwa ɗang. 21Sǝ, kǝla mǝnana à gìlǝì aɓa Malǝmce ka:

“Aɓwana mǝnana

à malaká banggia wia

cau male raka,

à nǝ̀ sǝn mǝsǝcau male,

sǝ aɓwana mǝnana

à malaká ok raka,

à nǝ̀ bwalte.”#15:21 Ɓalli gbal aɓa: Isha 52:15.

22Ɓafo ka, ǝn gandǝ kum dǝmbǝu ǝn yiu aban wun ɗang, acemǝnana mǝ nda aban hamnǝ cau arǝ amǝnia yia aban ngga.

Bulǝs tsǝa a ɓabumi nǝ̀ ká a Roma

23A dyan ngga, ɓe kǝgir uekam mǝnana mǝ nǝ pe a bu ka anzali mǝnia ka ɗang. Sǝa ma mǝ ndanǝ ɗenyi a ɓabumam arǝ apǝlǝa pas nǝma mǝ nǝ yiu aban wun. 24Ən kanìna mǝ nǝ pǝlǝa aban wun, ɓǝ̀ mǝ nǝ kutio aban ká a Sǝpen ngga. Mǝ nǝ sǝn wun, yale wu nǝ̀ tsǝktam aban ka abanì, anzǝm mǝnana ǝn dumǝna aban wun zuku ka. 25Sǝ ado ka, mǝ nda amur njar aban ká Urǝshalima nǝ gbasha aban amǝkpata Yesu mǝnana abanì ka. 26Acemǝnana amǝkpata Ɓakuli mǝnana a Masǝdoniya andǝ Akaya ka, à pa ɓoro nǝ banɓoarnado, ɓǝa kya pea amǝtǝr mǝnana à nda aɓalǝ amǝkpata Ɓakuli a Urǝshalima ka. 27Ban ɓoaria wia nǝ pâ mǝnia yì ɓoro ka, acemǝnana à sǝlǝna ama dumǝnia wia kǝla tangna mǝnana à nǝ̀ mbwe ka. Sǝ ɓǝa aɓwana mǝnana amǝ Yahudi na raka, à yì kum kāmbe ata amǝ Yahudi aɓalǝ atsǝkbu aɓa bangŋo ka, dumǝnia wia gbal ama ɓǝa pakki amǝ Yahudi turo nǝ agirkuma malea. 28Ɓǝ̀ ǝn pana mǝnia yì boalo, ǝn lumsǝna turo mǝɓoarne malea, sǝ ɓǝ̀ mǝ nǝ ká a Sǝpen ngga, mǝ nǝ kyangye mǝ nǝ sǝn wun peatu. 29Ən sǝlǝna nǝma ɓǝ̀ mǝ nǝ yiu aban wun ngga, mǝ nǝ yina wun nǝ tsǝkbu mǝgule mala Kǝrǝsti.

30Ən nggǝ zǝmbǝa wun, wun amǝ'eambǝam, aɓa lullǝ Mǝtalabangŋo Yesu Kǝrǝsti sǝ nǝ̀ earcearǝu mǝnana Bangŋo kǝ pa ka, wu bwalam nggam aɓa pak hiwi nǝ ɓabum wun kat aban Ɓakuli acem. 31Wu pak hiwi ama, ɓǝ̀ ǝn api turo mǝɓike mala amǝ mgbikiru aɓa nzali Yahudi. Wu pak hiwi ɗǝm ama amǝkpata Ɓakuli mǝnana a Urǝshalima ka, ɓǝa kum ɓabum ak ɓoro mǝnana ǝn nggǝ kánia wia nǝi ka. 32Anggo, nǝ eare mala Ɓakuli, mǝ nǝ yiu aban wun nǝ banɓoarnado mǝgule, sǝ sǝm nǝ̀ do a tarǝ sǝm kat nǝ bumpwasǝa. 33Adyan ngga, yì Ɓakuli, mǝtala dorǝpwala ɓǝ̀ do ata wun. Amin.

Currently Selected:

Amǝ Roma 15: mbu

Highlight

Copy

Compare