Amǝ Roma 12
12
Turo mala amǝkwaɗi aban Ɓakuli andǝ aɓwana
1Ace mani ka, wun amǝ'eambǝam, ǝn nggǝ ɓuakia rǝ wun, nǝ ɓwamuru mala Ɓakuli, wu pa rǝwun aban Ɓakuli, kǝla aɓoro mǝyilǝmui, mǝnana wu nǝ̀ duk amale, sǝ nǝ̀ pwasǝbumi ka. Mǝnia ka nda peri ma'wun mǝɓafoe abani.#12:1 Ɓalli gbal aɓa: Rom 6:13,16,19; 1Bit 2:5. 2Wu kǝa kpata ɓealǝu andǝ kuncau mala mǝnia yì ɓanza ka ɗang. Wu ɗeki Ɓakuli ɓǝ̀ nggaɗi wun nǝ tsǝk ɗenyicau ma'wun ɓǝ̀ duk bǝshe. Anggo sǝ wu nǝ̀ gandǝ surǝ nê mala Ɓakuli, mǝnana mǝɓoarne na, andǝ mǝnana nǝ̀ duk gir-á abani, sǝ nda pepè ka.
3Nǝ ɓwamuru mǝnana à pam ngga, ǝn nggǝ zǝmbǝi koyan ata wun ngga, ɓǝ̀ kǝa twal ɓamuri kǝrkǝr ɓǝ̀ kuti bancame male ɗang. Ɓǝ̀ ɗenyicau mala koya ɓwa ka, ɓǝ̀ karǝ arǝ paɓamuru male mǝnana Ɓakuli pe wi ka. 4Kǝla mǝnana nggunrǝu ka abare na pas, sǝ koya bare ka turo male na ɗàng ngga,#12:4 Ɓalli gbal aɓa: 1Kor 12:12-14; Afi 4:4,16. 5anggo, aɓa Kǝrǝsti ka, sǝm mǝnana sǝm nda pas ka, sǝm dumǝna nggūrǝu mwashat, sǝ sǝm nda ace rǝarǝ sǝm.#12:5 Ɓalli gbal aɓa: 1Kor 10:17; 12:20,27; Afi 4:25. 6Sǝm ndanǝ aɓoro ɗàngɗáng aɓa ɓwamuru mǝnana Ɓakuli pa sǝm ngga. Ɓǝ̀ mo yì ɓoro nda na gì Ɓakuli ka, pe anjari mǝnana karǝ arǝ paɓamuru mo ka.#12:6 Ɓalli gbal aɓa: 1Kor 7:7; 12:4-11; 1Bit 4:10-11. 7Ɓǝ̀ pakkia aɓwana turo nda mo yì ɓoro ka, wu kǝ pe aɓa mǝsǝcau. Ɓǝ̀ mo ka kanigir na ka, wu kǝ kania aɓwana gir. 8Ɓǝ̀ mo ka ɓakɓabum aɓwana na ka, wu kǝ pak turo ɓakɓabum. Ɓǝ̀ pabu nda mo yì ɓoro ka, wu kǝ pè nǝ ɓabumo mwashat. Ɓǝ̀ mo ka turo lidǝmbǝa nǝ aɓwana na ka, wu kǝ pe nǝ ɓabumpina. Sǝ ɓǝ̀ lǝmndǝ ɓwamuru nda mo ka, wu kǝ̀ lǝmndǝi nǝ banɓoarnado.
Do mala mǝkpata Ɓakuli aɓa earcearǝu
9Earcearǝu ka, ɓǝà pè nǝ mǝsǝcau. Wu ginǝki ɓealɓikea, sǝ wu bwal gir mǝnana mǝɓoarne na ka kàngkàng. 10Wu earce rǝarǝ wun nǝ earceban mǝ'mǝsǝcau nì. Ɓǝ̀ ban ɓoara wun arǝ pe rǝarǝ wun gulo. 11Ce wu duk amǝnkundǝr, amǝ'ɗwanyi rǝɓǝla arǝ turo ɗang, wu duk amǝ bumpina aɓa pakki Mǝtalabangŋo turo nǝ ɓabum wun kat. 12Wu dum nǝ banɓoarnado aɓa tsǝkɓalǝu ma'wun; wu dum nǝ munyi aɓa tanni; wu do aɓa pak hiwi ko ya pwari.#12:12 Ɓalli gbal aɓa: Aturo 1:14; Rom 5:2; 1Tas. 13Wu kǝ gau gir ma'wun ace bwalia aɓwana mala Ɓakuli mǝnana à nda aɓa tǝle ka; wu kànì ak abǝri.
14Wu tsǝki aɓwana mǝnana à kǝ pa wun tanni ka bu; wu tsǝkia wia bu, ce wu suia ɗang.#12:14 Ɓalli gbal aɓa: Mat 5:44; Luk 6:28. 15Wu pak banɓoarnado wunǝ aɓwana mǝnana à kǝ pak banɓoarnado ka; wu ɓua wunǝ aɓwana mǝnana à kǝ ɓua ka. 16Wu do aɓa dotarǝu mala amǝ'eamrǝarǝu; wu kǝa twal ɓamur wun ɗang; wu dum nǝ earce kpapi ɓamuru wunǝ aɓwana mǝnana acili aɓwana twali à pà kun ɓe kǝgir raka. Wu kǝa twali kǝla wu kuti aɓwana nǝ sǝlǝe ɗang.
17Ce wu nyesǝi kǝ ɓwa ɓealɓikea ace ɓealɓikea ɗang. Wu pak gir mǝnana nǝ̀ lǝmndǝì aɓwana kat pemǝɓoarne ma'wun ngga.#12:17 Ɓalli gbal aɓa: Pas 20:22; 2Kor 8:21; 1Tas 5:15. 18Ɓǝ̀ nǝ̀ gandǝ pa ka, wu dukdo aɓa dorǝpwala wunǝ aɓwana kat.#12:18 Ɓalli gbal aɓa: Mar 9:50; Rom 14:19. 19Wun amǝ'eambǝam mǝnana ǝn earkiyicea ka, wu kǝa pak mǝɓane a kun mǝɓane mǝnana à pakka wun ngga ɗang. Wu nyinggi Ɓakuli mbwe tangnakusǝu aɓa ɓashi male. Acemǝnana Mǝtalabangŋo bangŋa aɓa Malǝmce ama,
“Mbweban a kuni ka
mem na,
mǝ nǝ mbwe.”#12:19 Ɓalli gbal aɓa: Pǝris 19:18; Nggur 32:35; Ib 10:30.
20A kun mani, kǝla mana Malǝmce na ka,
“Ɓǝ̀ ɓio mǝbura na
aɓa nzala ka,
pe wi girlina;
ɓǝ̀ mǝsamur wali ka,
pe wi mur ɓǝ̀ nu.
Aɓa pě anggo ka,
a nǝ rambǝi wi
nkalang bǝsa
mǝ earke amuri.”#12:20 Ɓalli gbal aɓa: Pas 25:21,22.
21Wu kǝa eari ɓealɓikea ɓǝ̀ li murǝm amur wun ɗang, wu li murǝm amur ɓealɓikea nǝ pemǝɓoarne.
Currently Selected:
Amǝ Roma 12: mbu
Highlight
Copy
Compare
Share
Want to have your highlights saved across all your devices? Sign up or sign in
© Wycliffe Bible Translators, Inc. and © The Nigeria Bible Translation Trust 2016
