Amǝ Mishan 23

1Bulǝs soa mǝsǝì arǝ amǝkurcau sǝ na ama, “Wun amǝ'eambǝam amǝ Isǝrayila! Mim ngga ǝn lumsǝna turo mem aban ká aban Ɓakuli, nǝ ɓabumam pwapwat yi puro a yalung.”

2Kara Pǝris Mǝgule mǝnana à tunǝki ama Hananiya ka, nea aɓwana mǝnana à cam tu aban Bulǝs ka ama ɓǝa kwe a takiri. 3Pǝlǝa Bulǝs ne wi ama, “Ɓakuli nǝ̀ kweo a takiro, yì we mǝnana a kǝ lǝmndǝ ɓamuro ama a nda mǝɓoarne sǝ aɓa mǝsǝcau ka a nda raka! A ndà ya ulang mǝɓashi nani, mǝnana à duk kana a kǝ pakkam ɓashi amur Nggurcau, sǝ we nǝ nggearǝo ka a kǝ yàl Nggurcau nǝ pa nzongcau ama ɓǝa kwem a takiram!”#23:3 Ɓalli gbal aɓa: Mat 23:27,28.

4Aɓwana mǝnana à came aban Bulǝs tu ka à banggi wi ama, “A sǝlǝ ama a ndaban sang Pǝris Mǝgule mala Ɓakuli!”

5Bulǝs pǝlǝa earia wia ama, “Ace rǝwun, wun amǝ'eambǝam, ǝn sǝlǝ nǝma yì ka, Pǝris Mǝgule na ɗang. Acemǝnana Malǝmce na ama, ‘A pa wu nǝ na mǝɓane amur murǝm mala aɓwana ma'wun ɗang.’#23:5 Ɓalli gbal aɓa: Pur 22:28.”

6Lang Bulǝs yi sǝlǝ ama aɓea aɓwana ata amǝkurcau mǝno ka amǝ Saduki na sǝ acilia ka amǝ Farisi na ka, pǝlǝa loasǝ gi a kuli na ama, “Wun amǝ'eambǝam! Mǝ nda ɓwa Farisi, kǝla mǝnana akêm ngga amǝ Farisi na ka. À kǝ pakkam ɓashi yalung acemǝnana tsǝkɓalǝu mem ngga nda aɓa lo mala alú nǝ yilǝmu!”#23:6 Ɓalli gbal aɓa: Aturo 26:4,5; Filp 3:5.

7Lang bangŋǝna anggo ka, kara amǝ Farisi andǝ amǝ Saduki tita munǝo a rǝarǝia, sǝ kpapi gau banì ɓari. 8Amǝ Saduki ka à kǝ na ama ɓwapǝndǝa pa nǝ̀ loapi ɓembe anzǝm lú ɗang, amǝturonjar ko abangŋo gbal ka à pà kàm ɗang. Sǝ amǝ Farisi ka à ear ama amǝno kat ka à ndakam.

9Loasǝban lo kǝrkǝr a rǝarǝia, sǝ aɓea amalǝm nggurcau mǝnana à nda ata amǝ Farisi ka, à lo, à kutia makgir mǝcande. À bangŋa ama: “Sǝm sǝn kǝgir mǝɓane mǝnana ɓwa man pe ka ɗang! Ear ka bangŋo, ko mǝturonjar na ne wi cau ka!”

10Lang mǝsarǝban mala asoje sǝn cau kǝ gulki ka, ɓangciu bwali, acemǝnana à kǝ nunggi Bulǝs, ndo à nǝ̀ tsǝki wi pengye. Pǝlǝa tsǝk asoje ɓǝa sulǝo ɓǝa kya amsǝi a ɓabuia nǝ rǝcandǝa, ɓǝa nyesǝi a banmǝcande mala asoje.

11Àkǝ̀ bu du mǝno ka, Mǝtalabangŋo lǝmndǝrǝi aban Bulǝs sǝ na ama, “Ɓǝ̀ ɓangciu ɓǝ̀ kǝa pakko ɗang! Kǝla mǝnana a na cau mem a Urǝshalima ka, dumǝna ama anggo sǝ a wu nǝ ngga nakunam a Roma gbal.”

À kurkun à nǝ̀ wal-lú Bulǝs

12Ban nǝ fa ka, aɓea amǝ Yahudi yi kurkunarǝia à na ama, à pà nǝ̀ li girlina ko à nǝ̀ nu kǝgir ɗang, she ɓǝa walna lú Bulǝs ka. 13Aɓwana mǝnana à kurkunia ka lakki malea kuti lumi-ine. 14Nda à wario aban agbani pǝris andǝ aɓwana-mǝgule à bangŋa ama, “Sǝm kanagìr ama pa sǝm nǝ̀ tsǝk kǝgir a kun sǝm ɗang she ɓǝ̀ sǝm walna lu Bulǝs ka. 15Ace mani ka, wun andǝ amǝkurcau wu turban nǝ cau aban mǝsarǝban mala asoje Roma ɓǝ̀ yiu nǝ Bulǝs aban wun ɗǝm. Wu lǝmndǝì wi kǝla wu ndaban earce wun nǝ̀ sǝnggi cau male kam pepe. Sǝ sǝm ngga sǝm nǝ̀ kumsǝi wi a njar sǝm nǝ̀ wal-lui.”

16Lang mǝkina Bulǝs ok ce gir mǝnana à earce à nǝ̀ pakki Bulǝs ka, pǝlǝa wario a banmǝcande mala asoje kya ne Bulǝs ce. 17Bulǝs pǝlǝa tunǝ ɓe soje mǝgulo ne wi ama, “Kyan nǝ lagga man aban mǝsarǝban mala asoje, ndanǝ ɓe cau mǝnana nǝ̀ ne wi ka.”

18Pǝlǝa soje mǝgulo man twali, sǝ wari nǝi aban mǝsarǝban malea kat, kya ne wi ama, “Bulǝs mǝnana à kùrrì ka, nǝ̀ nam ama ɓǝn yiu nǝ lagga man a bano, acemǝnana ndanǝ ɓe cau mǝnana ɓoaro ɓǝ̀ banggo ka.”

19Mǝsarǝban mala asoje pǝlǝa bwali um nǝi a nkanggariban, sǝ ɗi ama, “Mana a kǝ earce nam ɗe?”

20Mǝkina Bulǝs pǝlǝa ne wi ama, “Aɓwana-mǝgule mala amǝ Yahudi kùrna kunarǝia, à nǝ̀ yiu a zǝmbǝo li ama wu kyan nǝ Bulǝs aban amǝkurcau. À nǝ̀ lǝmndǝa kǝla amǝkurcau kǝ earce à nǝ̀ ɗiki à nǝ̀ ok mǝsǝcau pepe a kuni. 21Ce a earcau malea ɗang, acemǝnana aɓwana kuti lumi-ine mǝnana à nǝ̀ kumsǝi wi ka. À kanagìr ama à pà nǝ̀ tsǝk kǝgir a kunia ɗang, she ɓǝa walna lú Bulǝs ka. Ado ka, à gilǝna rǝia, eare mo na ado a kundǝki ka.”

22Mǝsarǝban mala asoje pǝlǝa ne lagga ama, “Ce a eare a ne kǝɓwa ama a na nam man yì cau ka ɗang.” Pǝlǝa tasǝ ta lagga bwal njar o.

À tasǝta Bulǝs aban Nggwamna Felis

23Pǝlǝa mǝsarǝban mala asoje tunǝ ɓari ata asoje amǝgulo male sǝ nea wia ama, “Wu twal asoje gbǝman ɓari mǝnana à nǝ̀ o a Kaisariya ka. Wu twal atea amǝpǝ̀r lumi-tongno-nong-ɓari andǝ amǝkusǝu gbǝman ɓari nǝ ankongŋo a buia. Wu nying ban man nǝ bu-pwari tongno-nong-ine mala bu du man yalung ngga. 24Wu pe Bulǝs pǝr mǝnana nǝ̀ eauwe a nzǝmi ka. Wu um nǝi jam a ɓadǝm Nggwamna Felis.”

25Pǝlǝa mǝsarǝban mala asoje gilǝ man yì cautera ka, sǝ terî mǝtala-nzali ama:

26Makkun pur a buam mim Kǝlaudiyus Lisiyas, aban ká aban mǝtala-nzali Felis.

27Amǝ Yahudi bwal man yì ɓwa ka, ama à nǝ̀ wal-lui. Lang ǝn yi sǝlǝa ama yì ka, ɓwa Roma na ka, pǝlǝa ǝn wario sǝnǝa asoje mem ǝn nggea amsǝi, ǝn é a buia.

28Ən wari nǝi a ɓadǝmbǝ amǝkurcau malea ace mǝnana ɓǝ̀ ǝn kya ok gir mǝnana pakkia wia ka. 29Sǝ ǝn yi sǝlǝ ama ce ka, cau mala nggurcau mala kwaɗi malea na; sǝ ce ka, kārǝa ɓǝa kùr ɓwa ko à nǝ̀ wal-lú ɓwa ace ɗang.

30Lang à yì banggam ama à kùrnakun amuri à nǝ̀ wal-lui ka, nda ǝn gbara ǝn tasǝi ɓǝ̀ yiu a bano. Ən nani aɓwana mǝnana nǝ cau a rǝì ka ama ɓǝa yiu nǝ cau malea a bano.

31Anggo aɓa du mǝno ka asoje kpata nzongcau mǝnana à pea wia ka, à twal Bulǝs à um nǝi a nggeala Antipatǝris. 32Ban nǝ fa ka, asoje nying amǝpǝ̀r a kutio a um nǝ Bulǝs aban ká a Kaisariya, sǝ yia ka à nyare a banmǝcande malea. 33Lang amǝpǝ̀r yi bwalǝna Kaisariya ka, à pe Nggwamna cautera sǝ à nyinggi wi Bulǝs a bui.

34Nggwamna pǝlǝa ɓal cautera sǝ ɗi Bulǝs aya buban sǝ puro. Lang yì ka, ongŋǝna ama Bulǝs pur a bu-nzali Sǝlisiya ka, 35Nggwamna pǝlǝa ne wi ama, “Mǝ nǝ ok cau mo nǝ nggearǝam ɓǝa aɓwana mǝnana à ndanǝ cau a rǝo à yina ka.” Pǝlǝa na ama ɓǝa nying Bulǝs ɓǝ̀ do a fadan mala Nggwamna Hirǝdus.

Currently Selected:

Amǝ Mishan 23: mbu

Highlight

Copy

Compare