Tĩto 2

Erĩkangĩrĩrya lyʼekwenene

1Nĩkwa uwe, ũbũge emyatsi eyitolere erĩkangĩrĩrya eritunganene. 2Ubwire abasyakulu uti sĩbakũnde, babye bʼamenge, bayĩtegaye; babye abakalĩre omwʼĩkĩrĩrya, nʼomo lwanzo, nʼomwʼĩyĩyĩnĩa. 3Kandi mubwire abakekulu, nabo nibya babye nʼemibere eyikakenga Nyamuhanga, Sibabye bakatonga abandu, kandi Sibabye bakakũnda obwabũ, babye Ĩbakakangĩrĩraya emyatsi mibuya. 4Kandi bakangĩrĩraye abakalĩ balere erianza abĩba wabo, banze abana babo, 5bayĩtegaye, babye bakayihigula oko bibi. Babye bakakola omũbĩrĩ wʼeka, babye bagenge, bakenge abĩba wabo, neryo ekĩnywa kya Nyamuhanga sikitsumawe.

6Kandi mulemba-lembe abalwana nibya, bayĩtegaye. 7Nawe ubye kĩmĩnyĩsyo kyʼemikolere mibuya, ũkangĩrĩraye ebyʼamenge, awate ko matebo. 8Ũbũge ebĩnywa bitunganene, ebite kwʼekyangakungwa. Neryo enzĩgũ yawe iyahemuka, isiawite omwatsi mubi wʼerĩbũga busana netu.

9Mubwire abagombe, bowe abakama babo omo myatsi yosĩ, nʼerĩtsemesyabo, kandi sibakube buhaka. 10Kandi sĩbĩbe, nĩkwa bayĩkangaye ngʼabandu babuya abateregula, batoke erĩowanĩa erĩkangĩrĩrya lya Nyamuhanga Omũlamya wetu omo byosĩ bakakola.

11Kusangwa Nyamuhanga abĩrĩmĩnyĩkalya olukogo luwe, olukaleta erilama, busana nʼabandu bosĩ. 12Olukogo olo lukatutegeka luti, tugane emikolere eyitekenga Nyamuhanga, nʼesyongumbu syʼekihugo, luti, tũyĩtegaye, nʼerikwama ekitunganene, nʼerikenga Nyamuhanga omo mikolere yetu oko mugulu ono, 13itukalindirira nʼamaha gʼomũyĩsa ekiro kyʼobutseme, kandi tukalindirira erihuluka lyʼolukengerwa lwa Nyamuhanga wetu mukulu, nʼomũlamya wetu, Yesu Kristo. 14Kristo mwayiha busana netu erĩtũtongolya oko bibi byosĩ, nʼerĩerya abandu busana naye ĩyowene-wene, abali nʼomũhwa wʼerikola emĩbĩrĩ yowene.

15Ũbũge emyatsi eyĩ, kandi Ũsĩkaye nʼerikunga abandu nʼehamũlĩ yosĩ. Suleke mundu akakupona.

Currently Selected:

Tĩto 2: KB80

Highlight

Copy

Compare