Erĩbĩsũlĩrwa 6

Ebĩbohĩ

1Neryo monalangira Ekyana kyʼEmbũlĩ kĩkatwũa ekiguma kyʼoko bĩbohĩ birinda, kandi monowa ekiguma kyʼebĩhangĩkĩre bini kĩkabũga omo mulenge wʼomũlũmo, kiti, Wase! 2Kandi monalangira, neryo lebaya, mohabya esabayĩrĩ nyeru-nyeru. Nʼoyo wĩkere kuyo iniawite oko buta, kandi mwahabwa embĩta. Nĩkwa mwahuluka ĩnĩakakĩnda, nʼerisingula,

3Neryo Ekyana kyʼEmbũlĩ mokyatũa ekĩbohĩ kyʼakabiri, neryo monowa ekĩhangĩkĩre ekiriho kyʼakabiri kĩkabũga kiti, Wase! 4Neryo eyindi sabayĩrĩ yʼolukulakula moyahuluka. Nĩkwa oyo wĩkere kuyo, mwahabwa amaka wʼerĩlũsya Obuholo oko kihugo, abandu bĩtane, kandi mwahabwa omũyalĩ munene.

5Neryo Ekyana kyʼEmbũlĩ mokyatũa ekĩbohĩ kyʼakasatu, neryo monowa ekĩhangĩkĩre kyʼakasatu kĩkabũga kiti, Wase! Kandi monalangira, neryo lebaya, mohabya esabayĩrĩ eyĩkĩnĩre. Nʼoyo wĩkere kuyo iniawite olulengero omo byala biwe. 6Kandi monowa owali nga mulenge omo katĩkatĩ kʼebĩhangĩkĩre ebiriho bini, ati, Akalengĩ kaguma kʼengano busana nʼesyofranka ĩkũmĩ, nʼotũlengĩ tusatu twʼekisusu busana nʼesyofranka ĩkũmĩ. Nĩkwa sĩmũtsandaye amagũta nʼebĩnyũ!

7Neryo Ekyana kyʼEmbũlĩ mokyatũa ekĩbohĩ kyʼakani, neryo monowa omulenge wʼekĩhangĩkĩrwe ekiriho kyʼebini kiti, Wase! 8Neryo monalangira, nĩkwa talebaya, habya esabayĩrĩ yʼekigondo. Nʼoyo wĩkere kuyo erĩna liwe iyo Luholo, nʼEkũlĩmũ moyakwamalo hakũhĩ. Nabo mobahabwa ehamũlĩ oko kiguma kyʼebini byʼekihugo, erĩĩta omo mũyalĩ, nʼomo nzala, nʼomo syondwala, nʼomo syonyama sĩkalĩre syʼekihugo.

9Neryo Ekyana kyʼEmbũlĩ mokyatũa ekĩbohĩ kyʼakatanu. Neryo monalangira eyĩkwa oko kiherero ebĩrĩmũ byʼabandu abĩtawa busana nʼekĩnywa kya Nyamuhanga, kandi kusangwa batũla omwatsi wa Nyamuhanga. 10Neryo mobabirikira nʼomulenge munene bati, Uwe Mukama, oyũbũyĩrĩre nʼowʼekwenene! Wasyalinda emigulu yingahi okwʼitswera nʼerĩkĩsya omusasi wetu ukwʼabo bĩkere omo kihugo kwehĩ? 11Neryo obuli mundu wa kubo mwahabwa ekanzu nyeru-nyeru kandi mobabwirwa baluhuke akandi katambĩ, eriganza lyʼabagombe balĩkyabo, nʼabagala babo abakandĩsyĩtwa ngabo, lyasyabya lyahĩkana.

12Neryo monalangira Ekyana kyʼEmbũlĩ kĩkatũa ekĩbohĩ kyʼendatu. Mohabya omũsĩkĩ munene, nʼeryuba molyakĩna ngʼolukimba lʼobweya olũkĩnĩre, nʼomukera gosĩ mwahinduka erisosa ngʼomusasi. 13Nʼesyongũnũnũ syʼekyanya mosyatogera oko kitaka, ngʼomuti wʼomũtĩnĩ kwʼakatogaya ebĩgũma byago omo lihunga lĩkalĩre. 14Nʼekyanya mokyasatika nʼerĩlũaho ngʼakaratasi akakalĩbawa. Nʼobuli kitwa, nʼobuli kitsira mobyalũsĩbwa omo myanya yabyo. 15Neryo abami bʼekihugo, nʼabandu bakulu, nʼabandu abakasondola abasĩrĩkanĩ, nʼabandu bʼebindu, nʼesyombangĩ, nʼobuli mukobe, nʼobuli mundu wʼobwĩranda, mobayĩbĩsa omo myangalũ nʼomo katĩkatĩ kʼamabwe wʼebitwa. 16Kandi mobabirikira oko bitwa nʼamabwe bati, Mututogereko, mũtũbĩse oko meso agʼoyo wĩkere oko kĩtũmbĩ kyʼobwami, nʼokwʼihitana lyʼEkyana kyʼEmbũlĩ! 17Kusangwa ekiro kinene kyʼerihitana lyabo kyabĩrĩhĩka, kandi nindi wangatoka erihanganaho kwehĩ?

Currently Selected:

Erĩbĩsũlĩrwa 6: KB80

Highlight

Copy

Compare