Erĩbĩsũlĩrwa 21

Olubula luhya-luhya nʼekihugo kihya-kihya

1Neryo monalangira olubula luhya-luhya nʼekihugo kihya-kihya, kusangwa olubula lwʼerĩmbere nʼekihugo kyʼerĩmbere mobyalenga, nʼengetsi isiyikiriyo. 2Nage monalangira omũyĩ abũyĩrĩre, eYerũsalema, omũyĩ muhya-muhya, akandagala akalũa elubula ewa Nyamuhanga, ĩnĩabĩrĩyĩtegekanĩa ngʼomũherũkĩ oyũyĩsũgĩre busana nʼĩba wuwe. 3Kandi monowa omulenge akalũa oko kĩtũmbĩ kyʼobwami ati, Lebaya! eHema ya Nyamuhanga iri omo katĩkatĩ kʼabandu! Naye asyĩkala haguma nabo, basyabya bandu buwe. Kandi Nyamuhanga ĩyowene asyabya haguma nabo, nʼeribya Nyamuhanga wabo. 4Nĩkwa asyasangula emĩsonĩa yosĩ oko meso wabo. Kandi oluholo silwendisyaswabyaho, erĩsũsũmana kutse eririra, kutse eriagalwa. Emyatsi yʼerĩmbere yabirirenga.

5Nʼoyo wĩkere oko kĩtũmbĩ kyʼobwami mwabũga ati, Lebaya! Lino ngayira emyatsi yosĩ mo mihya-mihya. Neryo mwabũga ati, Usake ebĩ kusangwa ebĩnywa ebĩ ni byʼeriyiketera nʼebyʼekwenene. 6Kandi mwabũga ati, Byamakoleka! Ĩngye indi Alfa na Omega, erĩtsũka nʼendũlĩ. Oyũkwĩre enyota nasyamuha oko magetsi wʼengũnũnũko yʼamagetsi wʼengebe butsira erigula. 7Oyũkakĩnda nasyamuha emyatsi eyĩ: Nasyabya Nyamuhanga wuwe, naye asyabya mugala wage. 8Nĩkwa abuba, nʼabatĩkĩrĩrye, nʼabʼesyonye, nʼabĩtĩ, nʼabasĩngĩrĩ, nʼabakũmũ, nʼabakasaba esyosanamu, nʼababehĩ, omwanya wabo asyabya omo ngetsi eyikaka nʼomuliro nʼekirimi, olo lo luholo lwʼakabiri.

EYerũsalema nyihya-nyihya

9Neryo omuguma wʼoko bamalaĩka balinda ababya bawite ebibindi birinda ebyoswĩre mwʼamalĩge alinda wʼenyũmanyũma mwambĩkako, mwakanĩa nage ati, Wase hano, ngandĩkũkangya Omũherũkĩ, omũkalĩ wʼEkyana kyʼEmbũlĩ. 10Neryo omũlaĩka mwanyitwala omo Mũlĩmũ oko kitwa kinene kiri-kiri, mwanyĩkangya omũyĩ abũyĩrĩre, ye Yerũsalema, owakandagala akalũa elubula ewa Nyamuhanga. 11Omũyĩ oyo mwakangabasanĩa omo lukengerwa lwa Nyamuhanga. Erĩkangabasanĩa lyago lyabya lĩsosĩre erĩbwe lyʼobũgũlĩ bunene, ngʼerĩbwe erĩhenĩrye, lyʼeYaspĩ ngʼekĩrlaũlĩ. 12Omũyĩ oyo abya awite ekĩyĩte kinene kiri-kiri, nʼesyonyũyĩ erĩkũmĩ nʼesĩbĩrĩ, nʼoko syonyũyĩ esyo habya abamalaĩka erĩkũmĩ nʼababiri. Kandi oko syonyũyĩ habya hasakĩre amena wʼebihanda erĩkũmĩ nʼebibiri bya Ĩsraelĩ. 13Kandi habya esyonyũyĩ ĩsatu oko luhande lwʼeyo ryuba likasira, nʼesyonyũyĩ ĩsatu elutambi lwʼendata, nʼesyonyũyĩ ĩsatu elutambi lwʼeyĩkwa, nʼesyonyũyĩ ĩsatu eluhande lwʼeyĩkwa. 14Ekĩyĩte ekyo kyʼomũyĩ kyabya kĩhĩmbĩre omo mabwe ĩkũmĩ nʼawabiri, awasakĩre kwʼamena ĩkũmĩ nʼabiri wʼabakwenda erĩkũmĩ nʼababiri bʼEkyana kyʼEmbũlĩ.

15Nʼomũlaĩka oyo wabya akabũga nage abya nʼolulengo lwʼesyamagetsi busana nʼerirenga omũyĩ oyo, nʼerirenga esyonyũyĩ syago, nʼekĩyĩte kyago. 16Nĩkwa omũyĩ oyo inialingirirene oko syombande syosĩ, obuli bwago inialingirirene nʼobugali bwago. Neryo omũlaĩka mwalenga omũyĩ omo lulengo luwe. Obuli bwago bwabya ebilometere elfu ĩbĩrĩ nʼamagana ani (2,400). Obuli bwago nʼobugali bwago, nʼobuli bwago bwʼendata ibiringirirene. 17Kandi omũlaĩka oyo mwalenga ekĩyĩte kyago ini metere makũmĩ alinda omo buli bwʼendata, ngʼolulengo abandu bakalengamo, kandi ini lulengo lwʼabamalaĩka nibya. 18Ekĩyĩte ekyo kyabya kyʼamabwe wʼeYaspĩ, nʼomũyĩ abya wʼesyamagetsi nyibuya, esĩhenĩrye ngʼekĩraũlĩ. 19Amabwe wʼekibanza kyʼekĩyĩte kyʼomũyĩ abya abambĩre kwʼamabwe wʼemĩsĩndo yosĩ yʼobũgũlĩ bunene. Erĩbwe lyʼerĩtsũka lyʼekibanza lyabya Yaspĩ. Eryʼakabiri lyabya Safĩro, nʼeryʼakasatu lyabya Kaledonĩ, nʼeryʼakani lyabya lyʼeZũmarĩdĩ. 20Eryʼakatanu lyʼeSadonĩkĩ, eryʼendatu lyʼeSardĩo, nʼeryʼakalinda lyʼeKrĩsolĩto, nʼeryʼomunani lyʼeBerĩlo, nʼeryʼomwenda lyʼeTopazĩo, nʼeryʼerĩkũmĩ kyʼeKrĩsopũraso, nʼeryʼerĩkũmĩ nʼeriguma lyʼeHaĩkĩnto, nʼeryʼerĩkũmĩ nʼawabiri lyʼeAmazĩsĩto. 21Kandi esyonyũyĩ erĩkũmĩ nʼesĩbĩrĩ syabya lulu ĩkũmĩ nʼĩbĩrĩ, obuli lũyĩ lwabya lũkalũa mo lulu nguma. Neryo embalu yʼomũyĩ yabya yʼesyamagetsi nyibuya-buya, ngʼekiyo ekikalabangana mwʼameso.

22Nĩkwa mondalangira eHekalũ omo mũyĩ oyo, kusangwa Omukama Nyamuhanga, Omũtokĩ Wʼebyosĩ, nʼEkyana kyʼEmbũlĩ bo Hekalũ yʼomũyĩ oyo. 23Kandi omũyĩ oyo siali nʼobwaga bwʼeryuba kutse omukera byʼerĩkolerya mugo, kusangwa olukengerwa lwa Nyamuhanga lũkakolerayago nʼetala yago ni Kyana kyʼEmbũlĩ. 24Nĩkwa ebihanda, byasyalendera omo kyakakala kyago, nʼabami bʼekihugo basyaleta olukengerwa lwabo mugo. 25Neryo esyongyo syʼomũyĩ Sĩsyendisyakingwa na kera omugulu bũnalolĩre, kandi eyo sĩbwendĩsĩra. 26Nĩkwa erĩkangabasanĩa nʼerĩsĩkya lyʼebihanda byasyaletwa omo mũyĩ oyo. 27Kandi sihali ekĩtĩsĩrĩre, kutse omundu oyukakola esyonye, kutse oyukabiha. Nĩkwa ba nʼabandu amena wabo awasakĩre omo kitabu kyʼengebe kyʼEkyana kyʼEmbũlĩ, basyingira omo mũyĩ oyo.

Currently Selected:

Erĩbĩsũlĩrwa 21: KB80

Highlight

Copy

Compare