Erĩbĩsũlĩrwa 10

Omũlaĩka nʼekitabu kyike

1Neryo monalangira ogundi mũlaĩka wʼamaka manene, iniakandagala akalũa elubula. Abya ambite ekĩtũ, nʼekima kyabya oko mutwe wuwe. Obũsũ buwe bwabya ngʼeryuba, nʼebisando biwe byabya ngʼesyondũyĩ syʼomuliro. 2Abya awite oko katabu kake omo byala biwe, akasanzwĩre. Neryo omũlaĩka oyo mwahĩra ekisando kiwe kyʼamali oko ngetsi, nʼekisando kiwe kyʼamalembe mwahĩrakyo oko kitaka. 3Neryo mwabirikira nʼomulenge munene, ngʼendale ikaruruma. Neryo abere abirikira, emĩlũmo irinda moyalũma omo mirenge yayo. 4Neryo omugulu emĩlũmo irinda yʼobũtũkũ yamabĩlũma, nabya ngasonda erisaka. Nĩkwa monowa omulenge akalũa elubula ati, Uyire emyatsi eyo emĩlũmo irinda ĩkabĩbũga mwʼĩkũmbo, susakeyo!

5Neryo omũlaĩka oyo nalangira inianimene oko ngetsi nʼoko kitaka, mwasumbira ebyala biwe byʼamali byʼendata elubula, 6neryo mwalahĩrya omo lĩna lya Nyamuhanga, oyuliho kera na kera, oyo wahangika olubula nʼebindu byosĩ ko birimo, oyo wahangika ekihugo nʼebindu ebiri mukyo, nʼengetsi nʼebindu byosĩ ebiri muyo. Neryo omũlaĩka mwabũga ati, Sihendisyabya eririndirira kandi! 7Nĩkwa omo biro byʼomulenge wʼengubi yʼomũlaĩka wʼakalinda, omugulu akasonda eribuha engubi yiwe, neryo Nyamuhanga asyaberererya erĩkũmbo liwe ngoko akangĩrĩraya Engulu Yowene oko bamĩnyererĩ, abagombe buwe. 8Neryo omulenge ogo nowa akalũa elubula, mwaswabũga nage ati, Ugende, wĩmaye akatabu akasanzwĩre omo byala byʼomũlaĩka oyo wimene oko ngetsi nʼoko kitaka. 9Neryo monaya oko mũlaĩka oyo, monamubwira nyiti ambe akatabu kake ako. Naye mwambwira ati, Wĩmayeko, ulyeko. Kasyakalĩhya enda yawe, nĩkwa omo buno bwawe kasyasihirira ngʼobuki. 10Neryo monĩmya akatabu ako omo byala byʼomũlaĩka, monalyako, neryo omo buno bwage mokasihirira ngʼobuki, neryo nabere nabiryako, enda yage moyakalĩhĩbwa. 11Neryo mobambwira bati, Utolere ĩwaswatũla omwatsi wa Nyamuhanga busana nʼabandu bangi nʼebihanda, nʼemĩbũge mingi, nʼabami.

Currently Selected:

Erĩbĩsũlĩrwa 10: KB80

Highlight

Copy

Compare