Erĩbĩsũlĩrwa 1

1Omo kitabu ekĩ mũsakĩre emyatsi eyo Yesu Kristo abĩsũla. Erĩbĩsũla erĩ Nyamuhanga amuhalyo erĩkũmbũlĩra abagombe buwe emyatsi eyikandisyabya lũba. Kristo mwamĩnyĩsya emyatsi eyĩ uku Yoane omugombe wuwe iniakamutumira omũlaĩka wuwe. 2Yoane mwabũga ebyosĩ ebyo alangira, ĩnĩakatũla omwatsi wʼekĩnywa kya Nyamuhanga nʼomwatsi wʼekwenene ogo Yesu Kristo abĩsũla. 3Obutseme buli nʼomundu oyukasoma ekitabu ekĩ, kandi obutseme buli nʼabandu abakowa ebĩnywa byʼeriminyerera erĩ, nʼabakakwama emyatsi eyĩsakĩre omo kitabu ekĩ! Kusangwa emyatsi eyĩ ikandisyabererera lũba.

Erĩkerya amakanĩsa alinda

4Ĩngye Yoane oko makanĩsa alinda awali eAsĩa:

Olukogo nʼobuholo bibye kwĩnywe ebĩkalũa ewa Nyamuhanga, oyuliho, nʼoyutula, nʼoyukandisyasa. Kandi bĩkalũa oko Mĩrĩmũ irinda eyiri embere syʼekĩtũmbĩ kiwe kyʼobwami; 5kandi bĩkalũa uku Yesu Kristo, omũtũlĩ wʼomwatsi oyuteregula, Omugala, akambere oyo walũbũkĩbawa oko luholo, omũtabalĩ, wʼabami bʼekihugo.

Ukwʼoyukatwanza, kandi yo watubohola oko bibi byetu omo musasi wuwe, 6kandi oyo watuyira eribya bwami bwʼabahererĩ erikolera Nyamuhanga wuwe na Tata. Uku Yesu Kristo kubye olukengerwa, nʼobũtokĩ, kera na kera! Amina.

7Mũlebaye! Akasa omo bĩtũ! Nʼobuli rĩso nʼasyamulangira, nʼabamutsimita nibya. Nʼebihanda byosĩ bya muna-kihugo byasyamulirira. Inga, bibye bitya! Amina.

8Omukama Nyamuhanga, Omũtokĩ Wʼebyosĩ, akabũga ati, Ĩngye indi Alfa na Omega; oyuliho, oyutula, nʼoyukandisyasa.

Esyonzolĩ syʼerilangira Kristo

9Ĩngye indi Yoane, omũlĩkyenyũ, kandi indi mũsangĩrĩ wenyũ omo malĩge, nʼomo bwami, nʼerĩyĩyĩnĩa, ebikawatana na Yesu, nabya omo kitsira ekikahulawa mo Patemo. Nabyaho kusangwa nakangaya ekĩnywa kya Nyamuhanga, ĩnĩngatũla omwatsi wa Yesu. 10Oko kiro kyʼomukama, Omũlĩmũ mwambĩkako, neryo monowa omulenge munene ngʼomulenge wʼengubi akabũgĩra enyũma kwĩngye. 11Ati, Usake omo kitabu ebyo ukalangira, utumebyo oko makanĩsa alinda: EyʼeEfeso, nʼeyʼeSmũrna, nʼeyʼePergamo, nʼeyʼeTũatera, nʼeyʼeSardĩ, nʼeyʼeFĩladelfĩa, nʼeyʼeLaodĩkĩa.

12Neryo monakeba erĩrebya oyo wabũga nage. Nage nabere nakeba monalangira emitagala irinda yʼesyamagetsi. 13Kandi omo katĩkatĩ kʼemitagala eyo, monalangira oyũsosĩre Omugala wʼOmundu, iniambite olukimba olũhĩkĩre oko bisando biwe, nʼobupa bwʼesyamagetsi oko kĩkũba kiwe. 14Omutwe wuwe nʼesyonzwiri siwe byabya byeru-byeru ngʼobweya bwʼembũlĩ, ngʼenzururu, nʼameso wuwe abya ngʼebirimi byʼomuliro. 15Nʼebisando biwe byabya bĩkangabasenĩe ngʼomulinga owʼenduku, owabĩrĩerĩbwa omo muliro wʼomo lũhĩtsa, nʼomulenge wuwe abya ngʼomulenge wʼekisalala. 16Kandi abya ahambĩre esyongũnũnũ sirinda omo byala biwe byʼamali, nʼomũyalĩ owʼamoya abiri mwalũa omo buno buwe. Nʼobũsũ buwe bwabya ngʼerikola lyʼeryuba erikakanyayira omo maka walyo gosĩ. 17Neryo omugulu namulolako, monawa ahisi oko bisando biwe ngʼomundu oyũholĩre. Naye mwambĩra kwʼebyala biwe byʼamali, ati, Sigubahe, ĩngye indi wʼerĩmbere nʼowʼenyũma. 18Kandi indi oyuliho! Nabya nyĩholĩre, neryo lebaya, nyiriho kera na kera. Kandi nyiwite ebĩboholĩ byʼoluholo nʼebyʼEkũlĩmũ. 19Neryo Usake emyatsi eyo wabirilangira, nʼemyatsi eyiri lino, nʼemyatsi eyĩkandĩsyahĩka enyũma wʼemyatsi eyĩ. 20Nĩkwa omwatsi wʼerĩkũmbo lyʼesyongũnũnũ sirinda esyo Wamalangira omo byala byage byʼamali, nʼemitagala irinda yʼesyamagetsi: esyongũnũnũ sirinda ni bamalaĩka bʼesyokanĩsa sirinda, nʼemitagala irinda nĩ kanĩsa sirinda.

Currently Selected:

Erĩbĩsũlĩrwa 1: KB80

Highlight

Copy

Compare