Matayo 7
7
Eritswera abandi
(Lk 6.37-38,41-42)
1Simutswere abandi, mukasyatswerwa na Nyamuhanga. 2Kusangwa omũsĩndo mukatswera, gona Nyamuhanga asyabatsweramo; nʼolulengo olo mukalengamo, asyabalenga mulo. 3Kandi busana nakĩ ukalangira akati akali omo lĩso lya mũlĩkenyũ, nĩkwa sulilangira ekĩtĩka ekiri omo lĩso lyawe kwehĩ? 4Kutse wasyabwira mũlĩkyenyũ uti kwehĩ, uti, Uleke nyilole akati akali omo lĩso lyawe, nĩkwa lebaya, ekĩtĩka kiri omo lĩso lyawe. 5Uwe mũtebya! Ũtsũke erilola ekĩtĩka kyʼomo lĩso lyawe, neryo wasyalangira ndeke erilola akati akali omo lĩso lya mũlĩkyenyũ.
6Simuhe esyombwa syʼekĩbũyĩrĩre, kandi simuguse esyolulu syenyũ embere wʼesyongulube, sikasyalyatangirirasyo omo bisando byasyo, kandi isyabinduka nʼeribatulanga.
Mũbũlaye, mũsondaye, mukongote
(Lk 11.9-13)
7Mũbũlaye, mwasyahabwakyo; musonda-sondaye, neryo mwasyabanakyo; mukongote oko lũyĩ, neryo mwasyakingulirwalo. 8Kusangwa oyũkabũlaya, asyangirirakyo; nʼoyukasonda-sonda, akabanakyo; nʼolũyĩ lwasyakingukala oko yukakongota oko lũyĩ. 9Nindi ũkwʼĩnywe abotata oyo wangaha mugala wuwe erĩbwe omugulu akamũbũlaya obundu kwehĩ? 10Kutse mugala amamũbũlya erĩhere, anganamuha enzoka kwehĩ? 11Nomo mune babi, mũnasĩ eriha abana benyũ bʼolũsũnzo lubuya. Tata wenyũ oyuli elubula sĩalabĩre aho eriha ebindu bibuya oko bakamũbũlaya kwehĩ?
12Ebyosĩ ebyo mwanzĩre abandu ibabakolera, nenyũ mukolerebo mutya; kusangwa Emigambo ya Musa nʼerĩkangĩrĩrya lyʼabamĩnyererĩ ko bakabũga batya.
Olũkyo luke
(Lk 13.24)
13Mwingire omo lũkyo luke; kusangwa olũkyo ni lunene, nʼenzira ni nenenene eyĩkalolaya okwʼihera, kandi ni bangi abakingira omo lũkyo olo. 14Nĩkwa olũkyo ni luke, nʼenzira ni nge eyĩkalolaya oko ngebe, nʼabandu ni bake abakabanayo.
Abamĩnyererĩ bʼamabehĩ
(Lk 6.43-44)
15Mũyĩtegaye busana nʼabamĩnyererĩ bʼamabehĩ, abakabahĩkako ĩbayĩsosekenĩe ngʼesyombũlĩ, nĩkwa omwisi wʼemitima yabo ni mbwa syʼomolĩ esĩkalĩre kutsibu. 16Mwasyaminyererabo busana nʼemĩbĩrĩ yabo. Ebĩgũma byʼebĩnyũ bikohawa oko misakisaki, kutse emĩtĩnĩ yikohawa oko matolũ kwehĩ?
Omuti nʼebĩgũma byago
17Omuti mubuya akahetaya ebĩgũma byowene, nĩkwa omuti mubi akahetaya ebĩgũma bibi. 18Omuti owene sialitoka erĩhetya ebĩgũma bibi, kutse omuti mubi sialitoka erĩhetya ebĩgũma byowene. 19Obuli muti owatehetaya ebĩgũma byowene akakondawa nʼeriguswa omo muliro. 20Neryo mwasyaminyerera abamĩnyererĩ bʼamabehĩ busana nʼemĩbĩrĩ yabo.
Sĩnyĩbasĩ
(Lk 13.25-27)
21Si yo mundu oyukanyahula ati, Mukama, Mukama, yo wasyingira omo Bwami bwʼelubula; nĩkwa yo nʼoyukakola erisonda lya Tata wage oyuli elubula. 22Omugulu ekiro ekyo kyasyasa, abandu bangi basyabũga nage bati, Mukama, Mukama! Omo lĩna lyawe motũtatũla omwatsi wa Nyamuhanga kwehĩ? Nʼomo lĩna lyawe motutahiga esyombĩnga kwehĩ? Kandi omo lĩna lyawe motutakola ebitiko-tiko bingi kwehĩ? 23Neryo nasyabwirabo nyiti, Mondabaminya na kera. Mũlũe aho nyiri, ĩnywe bakola-nabi.
Abahĩmbĩ babiri bʼamanyũmba
(Lk 6.47-49)
24Neryo, obuli mundu oyũkowa ebĩnywa byage ebĩ nʼerikolabyo, asyasosekanĩbwa ngʼomundu wʼamenge, oyo wahĩmba enyũmba yiwe yʼokwʼĩbwe. 25Embũla moyawa, nʼesyonyũsĩ mosyasenda, nʼekihunga mokyabuhirira, mobyayĩswĩrya oko nyũmba eyo. Nĩkwa moyitatera, kusangwa yahandawa okwʼĩbwe. 26Kandi obuli mundu oyũkowa ebĩnywa byage ebĩ atekolabyo, asyasosekanĩbwa ngʼomundu mũkĩrũ, oyo wahĩmba enyũmba yiwe yʼoko musege. 27Neryo embũla moyawa, nʼesyonyũsĩ mosyasenda, nʼekihunga mokyabuhirira, mobyayĩswĩrya oko nyũmba eyo, nayo moyatera. Nʼeritera lyayo molyabya ĩnene.
Ehamũlĩ ya Yesu
28Yesu abere abibuga erĩkanĩa emyatsi eyĩ, esyondeko mobasweka busana nʼerĩkangĩrĩrya liwe. 29Kusangwa abya akakangĩrĩrya ngʼoyuwite hamũlĩ, butsira ngʼabakangĩrĩrya babo bʼemigambo.
Currently Selected:
Matayo 7: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.