Matayo 27
27
Bakatwala Yesu uku Pilato
(Mk 15.1; Lk 23.1-2; Yn 18.28-32)
1Neryo bwabere bwabya tũtũtũ, abahererĩ bakulu bosĩ nʼabakulu bʼabandu mobaya embĩta yʼerĩĩta Yesu. 2Neryo mobaboha Yesu omo mahulula, mobamutwala oko mũtabalĩ Pilato.
Erihola lya Yũda
(Emĩb 1.18-19)
3Neryo Yũda, omũhoterĩ wa Yesu, abere abilangira ko Yesu amabitswerwa ambu akwe, mwabinduka, mwasũbya ebihande byʼebĩtsĩpa makũmĩ asatu oko bahererĩ bakulu nʼabakulu bʼAbayũda. 4Ati, Nabirikola nabi ngahotera omundu oyute nʼolubanza nyiti akwe. Nabo mobabũga bati, Tutsomene ekyo kwehĩ? Olo ni lwawe! 5Neryo Yũda mwagusa ebihande byʼebĩtsĩpa ebyo byʼahisi omo Hekalũ, neryo mwalũaho, Neryo Yũda mwagenda mwayayihanika.
6Neryo abahererĩ bakulu mobĩmya ebihande byʼebĩtsĩpa bati, Siritolere omo Migambo yetu erĩhĩrabyo omo kĩbo kyʼeHekalũ kusangwa ni nzwere yʼomusasi. 7Neryo mobaya embĩta, mobagula kubyo kwʼEkitaka kyʼomũbũmbĩ, busana nʼerita kukyo kwʼabandu bʼehandi. 8Kikaleka ibahula ekitaka ekyo mo Kitaka kyʼomusasi erĩhĩka na mũnabwĩre.
9Neryo mobyabererera ebyabũgawa nʼomũmĩnyererĩ Yeremĩa ati, Mobĩmya ebihande byʼebĩtsĩpa amakũmĩ asatu, enzwere yoyo abandu ba Ĩsraelĩ bahĩra busana naye. 10Kandi mobahabyo busana nʼEkitaka kyʼomũbũmbĩ, ngoko Mukama anyihana.
Pilato akabũlaya Yesu
(Mk 15.2-5; Lk 23.3-5; Yn 18.33-38)
11Nĩkwa Yesu mwahangana embere wʼomũtabalĩ. Naye mwamũbũlya ati, Uli mwami wʼAbayũda kwehĩ? Yesu mwasũbĩrya ati, Wamabũgakyo. 12Nĩkwa mwatasũbyakĩ omugulu abahererĩ bakulu nʼabakulu bʼAbayũda bamuhandikirira. 13Neryo Pilato mwabũga naye ati, Sũlĩtowa emyatsi yingaha bakakuhandikirira kwehĩ? 14Nĩkwa Yesu mwatamũsũbĩrya omo mwatsi nʼomuguma bamuhandikirira, kyaleka omũtabalĩ iniasweka kutsibu.
Yesu akatswerawa erĩkwa
(Mk 15.6-15; Lk 23.13-25; Yn 18.39—19.16)
15Neryo oko buli kiro kikulu kyʼErikiruka, omũtabalĩ agenda akaboholera endeko yʼomundu muguma wʼomũlĩkĩ oyo banzĩre. 16Nĩkwa oko mugulu oyo babya babohĩre mundu wʼomũlĩkĩ muguma oyũkũmayĩre, omundu oyukahulawa mo Baraba. 17Neryo omugulu endeko yahĩndana, Pilato mwabũga nabo ati, Mwanzĩre inababoholerandi kwehĩ? Ye Baraba, kutse Yesu oyukahulawa mo Kristo kwehĩ? 18Kusangwa Pilato abya asĩ ko bahotera Yesu busana nʼerimutsura.
19Kandi omugulu Pilato abya ĩkere oko kĩtũmbĩ kyʼeritswera bandu, omũkalĩ wuwe mwamutumako ati, Subye nʼahake oko mwatsi wʼomundu oyutunganene, kusangwa omo kiro kya mũnabwĩre nabiriagalwa kutsibu omwʼilota busana naye.
20Nĩkwa abahererĩ bakulu nʼabakulu mobatsotsererya esyondeko bati babũlaye Pilato aboholerebo Baraba, nĩkwa bati, Yesu ĩtawe. 21Nĩkwa omũtabalĩ mwabũlyabo ati, Oko babiri aba mwanzĩre inababoholera wahi kwehĩ? Nabo mobasũbĩrya bati, Ye Baraba. 22Neryo Pilato mwabũga ati, Nyĩkolekĩ na Yesu oyukahulawa mo Kristo kwehĩ? Abosĩ mobabũga bati, Abambawe oko musalaba! 23Nĩkwa Pilato mwabũlyabo ati, Amakola kibi kyahi kwehĩ? Nĩkwa mobalabya kwʼaho emirenge yabo, bati, Abambawe oko musalaba! 24Neryo Pilato abere alangira kwʼamalemerwa nʼomwatsi, nĩkwa omwaga kwʼamatsũka, mwĩmya amagetsi mwanaba oko byala embere syʼendeko ati, Sindi kʼomusango wʼomusasi wʼomundu oyũ! Olũ nĩ lwenyũ! 25Neryo endeko yosĩ moyasũbĩrya iti, Omusasi wuwe atubyeko nʼoko bana betu! 26Neryo Pilato mwaboholerabo Baraba, nĩkwa mwaswĩrya Yesu omo mikoba, neryo Pilato mwahereryabo Kristo ati abambawe oko musalaba.
Abasĩrĩkanĩ bakasekereraya Yesu
(Mk 15.16-20; Yn 19.2-3)
27Neryo abasĩrĩkanĩ bʼomũtabalĩ mobatwala Yesu oko Kikali, neryo mobahĩndanĩa omulondo gosĩ hakũhĩ naye. 28Neryo mobambula Yesu yʼesyongimba siwe, mobamwambalya ekanzu yʼOmunyama. 29Neryo mobaluka embĩta yʼamahwa, mobahĩrayo oko mutwe wuwe, kandi mobahĩra oluseke lʼomo byala biwe byʼamali, kandi mobamũkũkamira nʼerĩmũsekererya, bati, Ukote, uwe Mwami wʼAbayũda! 30Neryo mobamũtwĩra kwʼamatande, kandi mobahamba oluseke olo mobatsũka erĩswĩrya Yesu oko mutwe. 31Neryo babere babĩmũsekererya, mobamwambula ekanzu eyo, mobasyamwambalya esyongimba siwe, mobamutwala eriyamubamba oko musalaba.
Bakabamba Yesu oko musalaba
(Mk 15.21-32; Lk 23.26-43; Yn 19.17-27)
32Kandi babere bakalũaho mobahĩndana nʼomundu akalũa eKũrene oyukahulawa mo Sĩmonĩ. Mobahatikana omundu oyo erihekera Yesu yʼomusalaba wuwe. 33Neryo babere bahĩka ahakahulawa mo Gologota, eribindula liti, Ahʼamahanga; 34eyo mobamuha ebĩnyũ ebĩtũlũngene nʼendulu, apũlaye, neryo abere abĩgeryabyo, mwaganabyo.
35Neryo mobabamba Yesu oko musalaba, neryo mobagabana esyongimba siwe, mobakanga obukanga busana nasyo. 36Neryo mobĩkala ahisi, mobamũteya aho. 37Mobahĩra endata oko mutwe wuwe erihandikirira eryo bamuhandikirira, bati, OYŨ NI YESU OMWAMI WʼABAYŨDA. 38Kandi mobabamba abanyeyĩ babiri oko misalaba haguma na Yesu, omuguma oko luhande lwʼamali, nʼogundi oko luhande lwʼamalembe.
39Neryo abandu abalabaho mobatsuma Yesu, ĩbakatsĩngaya emitwe yabo, 40bati, Uwe ukasambula eHekalũ nʼerĩswahĩmbayo omo biro bisatu, ũyĩlamaye! Wamabya uli Mugala wa Nyamuhanga, ũkĩme oko musalaba! 41Abahererĩ bakulu nʼabakangĩrĩrya bʼEmigambo nʼabakulu, nabo mobasekererya Yesu bati, 42Mwalamya abandi, nĩkwa sialitoka erĩyĩlamya! Iye ni Mwami wʼAbaĩsraelĩ, akĩme oko musalaba, netu twasyamwĩkĩrĩrya! 43Akayiketera Nyamuhanga, amũlamaye lino, amabya amũsĩmĩre. Kusangwa mwabũga ati, Ĩngye indi Mugala wa Nyamuhanga. 44Kandi abanyeyĩ ababambawa oko misalaba kuguma na Yesu, nabo mobamutsuma batya.
Oluholo lwa Yesu
(Mk 15.33-41; Lk 23.44-49; Yn 19.28-30)
45Neryo bwabere bwahĩka saa ndatu omwĩrĩmya mwaswika ekihugo kyosĩ, erĩhĩka oko saa tĩsa. 46Neryo oko saa tĩsa Yesu mwayilakira nʼomulenge munene ati, Eloĩ, Eloĩ, lama sabaktanĩ? Eribindula liti, Nyamuhanga wage, Nyamuhanga wage, busana nakĩ ũkanyĩsĩganaya kwehĩ? 47Neryo abandi ababya bahangeneho bakahulikirira, mobabũga bati, Omundu oyũ akabirikira Elĩa. 48Neryo lũba omuguma wa kubo mwatibita mwĩmya embũhũma, mũsũlya muyo mwʼepada, mwahĩrayo oko luseke, mwahayo Yesu erĩpũlyayo. 49Nĩkwa abandi bati, Tulinde, tũlebaye Elĩa ngʼanasa nʼerĩmũlamya. 50Neryo Yesu mwaswalaka nʼomulenge munene, neryo mwataswahumula.
51Neryo lebaya, olukimba olũkasũkũlĩraya olʼomo Hekalũ molwasatika mo bihande bibiri, erĩtsũka endata nʼerĩhĩka ahisi. Nʼekitaka mokyatitimana, nʼamabwe mwasatangika. 52Nʼesisinda mosyalĩbũkala, neryo abandu bangi ba Nyamuhanga ababya ibabirihola, mobalũbũkĩbwa. 53Mobalũa omo sisinda enyũma wʼerĩlũbũka lya Yesu, mobaya omo mũyĩ abũyĩrĩre, mobabutukira abandu bangi.
54Nĩkwa omugulu omukulu wʼabasĩrĩkanĩ nʼabasĩrĩkanĩ ababya haguma naye bakateya Yesu, babere balangira omũsĩkĩ, nʼemyatsi eyo yabya, mobubaha kutsibu bati, Kwenene oyũ alũe Mugala wa Nyamuhanga! 55Kandi habya bakalĩ bangi ibakasamalira ibimene hali. Nabo ba babya bakakwama Yesu ĩbakalũa eGalĩlaya, ĩbakamũwatĩkaya. 56Kandi Marĩa Magdalene, na Marĩa nyĩnya wa Yakobo na Yese, na nyĩnya wʼabagala ba Zebedayo babya haguma nabo.
Eritabwa lya Yesu
(Mk 15.42-47; Lk 23.50-56; Yn 19.38-42)
57Neryo bwabere bwabya ĩgolo-golo, omundu wʼebindu mwasa Omunya Arĩmatea, erĩna liwe iyo Yosefũ, naye abya mwiga wa Yesu nibya. 58Omundu oyo mwasa uku Pilato, mwasaba omubiri wa Yesu. Neryo Pilato mwahamula Yosefũ ahabawego. 59Neryo Yosefũ mwĩmya omubiri wa Yesu, mwalĩngĩra kugo kʼolukimba lowene lwʼekĩtanĩ. 60Neryo mwahĩrago omwʼisinda yiwe nyihyanyihya eyo abatsa omwʼĩbwe. Kandi Yosefũ mwakũmbagalĩrya erĩbwe rĩnene oko lũkyo lwʼeyisinda, neryo mwalũaho. 61Marĩa Magdalene, nʼogundi Marĩa ababiri bosĩ babya bĩkere eyisirya okwʼisinda.
Abateya okwʼisinda
62Neryo engyakya, ekiro ekikakwama ekiro kikulu kyʼErĩkokotya, abahererĩ bakulu nʼAbafarĩsayo mobahĩndana embere sya Pilato, 63bati, Mukama twamibuka ngoko mũtebya oyo abũga omugulu abya akiriho ati, Enyũma wʼebiro bisatu nasyalũbũka. 64Neryo, uhamule uti eyisinda ĩteyĩbawe erĩhĩka oko kiro kyʼakasatu ekyo, abiga buwe bakasyahĩka, bakamwĩba, ibabwira bandu bati, Abĩrĩlũbũka oko baholĩ, neryo, erĩtebya lyʼenyũma iryabya libi kwilaba eryʼerĩmbere. 65Nĩkwa Pilato mwabwirabo ati, Mwĩmaye abateya, mugende, mũtegaye eyisinda yo ndeke ngoko mwangakola. 66Neryo mobagenda, mobateya eyisinda yo ndeke, mobahĩraho abateya, kandi mobahĩra ekĩmĩnyĩsyo okwʼĩbwe.
Currently Selected:
Matayo 27: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.