Matayo 26
26
Embĩta yʼerĩĩta Yesu
(Mk 14.1-2; Lk 22.1-2; Yn 11.45-53)
1Neryo Yesu abere abĩbũga ebĩnywa byosĩ ebĩ, mwabwira abiga buwe ati. 2Mũnasĩ enyũma wʼebiro bibiri Erikiruka lĩkahĩka, nʼomugala wʼomundu asyahoterwa busana nʼeribambwa oko musalaba. 3Neryo abahererĩ bakulu nʼabakulu bʼabandu bʼAbayũda mobahĩndana haguma omo muhana gʼomukulu wʼabahererĩ bosĩ, ye Kayafa. 4Neryo mobaya embĩta yʼerihamba Yesu nʼamenge, nʼerĩmwĩta. 5Nĩkwa mobabũga bati, situkolekyo omo kiro kikulu, hakasyabya eyĩsesĩ omo katĩkatĩ kʼabandu.
Yesu akũtũlĩrawako amagũta
(Mk 14.3-9; Yn 12.1-8)
6Omugulu Yesu abya eBetanĩa omo nyũmba ya Sĩmonĩ omuhaga, 7omũkalĩ mwahĩka ahali Yesu, iniawite okwʼĩtambya lyʼamagũta awakakumba ndeke awʼenzwere nene, neryo mũtago oko mutwe wa Yesu omugulu abya akalya. 8Nĩkwa omugulu abiga balangira ekyo, mobahitana bati, Busana nakĩ amagũta aya akahera busa kwehĩ? 9Amagũta awakakumba ndeke aya kumbe angagũlĩbwe esyofranka nyingi isyahabwa abera. 10Nĩkwa Yesu, mwaminya ebyo, mwabwirabo ati, Busana nakĩ mũkendereraya omũkalĩ kwehĩ? Kusangwa abirinyikolera omũbĩrĩ mubuya. 11Kusangwa muli nʼabera ebiro byosĩ, nĩkwa ĩngye Sindi haguma nenyũ ebiro byosĩ. 12Kusangwa omugulu alyũta amagũta awakakumba ndeke aya oko mubiri wage, alyakola atya erinyĩsũga busana nʼerinyita. 13Kwenene ngabũga nenyũ, Aho Engulu Yowene yasyatũlaganĩbwa omo kihugo kyosĩ, ebyo mũkalĩ oyũ akabikola byasyatũlaganĩbwa busana nʼerimwibuka.
Yũda akalĩga erihotera Yesu
(Mk 14.10-11; Lk 22.3-6)
14Neryo omuguma wʼoko biga ĩkũmĩ nʼababiri, oyukahulawa mo Yũda Ĩskarĩota, mwaya oko bahererĩ bakulu, 15mwabũlyabo ati, Mwamalĩga erimbakĩ namahotera Yesu ũkwʼĩnywe kwehĩ? Nabo mobamulengera ebihande byʼebĩtsĩpa makũmĩ asatu. 16Erĩtsũka oko mugulu oyo, Yũda mwasonda-sondya omwanya wʼerihotera Yesu.
Yesu akalya Erikiruka haguma nʼabiga buwe
(Mk 14.12-21; Lk 22.7-14,21-23; Yn 13.21-30)
17Neryo oko kiro kyʼerĩmbere kyʼerirya obundu Bute mo Kĩhamya, abiga mobahĩka uku Yesu, bati, Wanzĩre ĩtwakũkokoterya erirya lyʼErikiruka lyo hahi kwehĩ? 18Neryo Yesu mwabwirabo ati, Mugende omo mũyĩ, oko mundu mulebe, mumubwire muti, Omũkangĩrĩrya ati, Omugulu wage abĩrĩhĩka, neryo abiga bage haguma nage twasyalya Erikiruka omo nyũmba yawe. 19Neryo abiga mobakola ngoko Yesu ategekabo, neryo mobakokotya erirya lyʼErikiruka.
20Neryo erĩgolo-golo lyabere ryahĩka, Yesu nʼabiga erĩkũmĩ nʼababiri mobĩkala okwʼirya. 21Neryo babere bakalya, Yesu mwabũga ati, Kwenene ngabũga nenyũ, omuguma wʼũkwʼĩnywe akandinyihotera. 22Nabo mobakwa bũlĩge bunene, mobatsũka erĩbũlya Yesu muguma muguma, bati, Mukama ĩkwa nĩ ĩngye kwehĩ? 23Yesu mwasũbĩryabo ati, Oyũkakolaya ebyala biwe omo kibindi haguma nage yukandinyihotera. 24Omugala wʼomundu akagenda ngoko kĩsakĩre busana naye, nĩkwa obũlĩge oko mundu oyukahotera Omugala wʼomundu! Kumbe lyowene busana nʼomundu oyo nga siabutawa! 25Neryo Yũda, oyo wamuhotera, mwasũbĩrya ati, Mũkangĩrĩrya, ĩkwa nĩ ngye kwehĩ? Yesu mwamũsũbĩrya ati, Wamabĩbugakyo.
Erirya lyʼomukama
(Mk 14.22-26; Lk 22.15-20; 1 Kor 11.23-25)
26Neryo omugulu babya bakalya, Yesu mwĩmya obundu, neryo abere abitsumulabo, mwatsũtsangabo, mwahabo abiga ati, Mwĩmayebo, mulye; oyũ ni mubiri wage. 27Neryo mwĩmya olũtehĩ mwaha ewasĩngya, neryo mwahalobo ati, Mũpũlaye kulo, ĩnywe bosĩ. 28Kusangwa oyũ ni musasi wage, omusasi wʼendagane, omusasi wage owakũtawa busana nʼabangi, busana nʼeribuyira ebibi. 29Nĩkwa ngababwira, sindiendisyaswapũlya oko bĩgũma ebĩ byʼebĩnyũ erĩtsũka lino erĩhĩka oko kiro nasyapũlya ebihyabihya haguma nenyũ omo bwami bwa Tata wage. 30Neryo babere babiimba Olwimbo, mobaya oko kitwa kyʼeMĩzeĩtũnĩ.
Yesu akaminyerera eriyigana lya Petero
(Mk 14.27-31; Lk 22.31-34; Yn 13.36-38)
31Neryo Yesu mwabwirabo ati, Ĩnywe bosĩ mukandinyitswako oko kiro ekĩ, kusangwa amasako ati, Nyamuhanga asyaswĩrya omũlĩsya, nʼesyombũlĩ syʼomo kĩhyo syasyapanzikana. 32Nĩkwa nasyabya nabĩlũbũkĩbwa, nasyabatanga eGalĩlaya. 33Nĩkwa Petero mwabũga naye ati, Nomo abosĩ bangatswa busana nawe, ĩngye sindiendisyakutswako na kera. 34Yesu mwabũga naye ati, Kwenene ngabũga nawe, omo kiro ekĩ kya mũnabwĩre, engoko-lume ite yabika, ukandinyigana ngendo ĩsatu. 35Petero mwamubwira ati, Sindiendikugana, nomo nangahola haguma nawe. Nʼabiga bosĩ mobabũga batya.
Yesu akasaba eGetesemane
(Mk 14.32-42; Lk 22.39-46)
36Neryo Yesu haguma nʼabiga buwe mobaya ahakahulawa mo Getesemane, neryo mwabwira abiga buwe ati, Mwĩkale hano omugulu ngaya halya eriyasaba. 37Neryo mwatwala Petero nʼabagala babiri ba Zebedayo, neryo mwatsũka eribya nʼobũlĩge nʼerĩhahũkya omutima. 38Neryo mwabwirabo ati, Omutima wage ali nʼobũlĩge bunene bukasonda erĩnyĩta. Mũsĩgale hano, mũtegaye haguma nage. 39Neryo mwaya embere yo hake, mwawa ahisi, mwasaba ati, Tata wage, kyamatokekana, Ũnyĩlũsaye kwʼolũtehĩ olũ! Nĩkwa butsira ngoko nyazĩre, nĩkwa ngoko wanzĩre.
40Neryo mwasuba ahali abiga basatu mweyabo ibanagotsere, neryo mwabũga na Petero ati, Mwatalũkĩre erĩteya haguma nage esaa nguma kwehĩ? 41Mubye mukasaba nʼerĩteya, isimwingira omwʼirengwako; omutima akalĩga, nĩkwa omubiri ni molo.
42Kandi engendo yʼakabiri Yesu mwayasaba ati, Tata wage, olũtehĩ olũ lwamatenditokekana erĩnyĩlũako namatindapũlyalo, erisonda lyawe likolawe. 43Kandi mwasa mweyabo ibaneto, kusangwa ameso wabo ĩnĩalĩtohĩre.
44Kandi Yesu mwasĩgabo, mwayasaba engendo yʼakasatu, iniakasuba omo bĩnywa ebyo kandi. 45Neryo mwasuba oko biga, mwabwirabo ati, Mukineto, mukinauhuka kwehĩ? Lebaya! Endambĩ yamahĩka, nʼomugala wʼomundu akahĩrawa omo byala byʼabandu babi. 46Muhangane, tugende! Mũlebaye, oyukanyihotera yoyũ hano!
Bakahamba Yesu
(Mk 14.43-50; Lk 22.47-53; Yn 18.3-13)
47Neryo Yesu abere akĩnabũga, lebaya, Yũda, omuguma wʼoko biga ĩkũmĩ nʼababiri, mwasa. Haguma naye habya endeko nene eyĩhekĩre emĩyalĩ nʼesyongonĩ, ibakatumawa nʼabahererĩ bakulu nʼabakulu bʼAbayũda. 48Neryo oyo wamuhotera mwahabo ekĩmĩnyĩsyo ati, Oyo ngandilyatsirira, ini iye; mumuhambe! 49Neryo Yũda abere ahĩka, mwaya uku Yesu ati, Wasĩbĩre, Mũkangĩrĩrya! neryo mwamulyatsirira. 50Neryo Yesu mwamubwira ati, Mwĩra, Ukole ekyo uliasira! Neryo mobahĩka mobahamba Yesu mobamuwatako kutsibu. 51Neryo lebaya, omuguma wʼoko bandu ababya na Yesu mwasumba ebyala biwe mwakula omũyali, mwabanda omukobe wʼomukulu wʼabahererĩ bosĩ, mwatwa okũtũ kuwe. 52Neryo Yesu mwabũga naye ati, Sũbaya omũyalĩ gʼomo lubo lwago; kusangwa abosĩ abakawata oko mũyalĩ, basyahera omo mũyalĩ. 53Kutse Ũkaganĩraya uti sinangatoka erilakira Tata wage, naye iniamba abamalaĩka elfu makũmĩ alinda nʼĩbĩrĩ kwehĩ? 54Nĩkwa Amasako asyabererera ati awakabuga ati, Litolere ibyabya bitya?
55Oko ndambĩ eyo Yesu mwabũga nʼendeko ati, Mwabiriasa nʼemĩyalĩ nʼesyongoni erinyihamba ngʼabakahamba omũnyeyĩ kwehĩ? Obuli kiro nabya nyĩkere omo Hekalũ ngakangĩrĩrya, momutanyihamba. 56Nĩkwa ebyosĩ ebĩ byabiribya bitya erĩberererya ebyo bamĩnyererĩ basaka.
Neryo abiga bosĩ mobamutswako, mobatibita.
Yesu akahĩka omwʼĩbũgĩro
(Mk 14.53-65; Lk 22.54-55,63-71; Yn 18.13-14,19-24)
57Neryo abahamba Yesu mobamutwala ewʼomukulu wʼabahererĩ bosĩ ye Kayafa, aho abasakĩ bʼEmigambo nʼabakulu babya bahĩndene. 58Nĩkwa Petero mwamukwama enyũma inianayĩsũnĩre, mwahĩka oko muhana gʼomukulu wʼabahererĩ bosĩ. Neryo Petero mwingira omo muhana, mwĩkala nʼabateya erilangira endũlĩ yʼomwatsi. 59Nĩkwa abahererĩ bakulu nʼabʼomwʼĩbũgĩro mobasonda-sonda emyatsi yʼamabehĩ busana na Yesu, ibatoka erĩmwĩta. 60Nĩkwa mobatabana ebyʼamabehĩ, nomo abatũlĩ bʼamabehĩ bangi banahĩkaho. Nĩkwa enyũma wʼaho ababiri bʼamabehĩ mobahĩka, 61bati, Omundu oyũ mwabũga ati, Ĩngye nangatoka erĩhĩmbũla eHekalũ ya Nyamuhanga, nʼerĩswahĩmbayo omo biro bisatu.
62Neryo omukulu wʼabahererĩ bosĩ mwahangana, mwabũlya Yesu ati, Sũlĩsũbĩraya kwehĩ? Ni byahi ebyo bandu aba bakakũhandĩkĩrĩraya kwehĩ? 63Nĩkwa Yesu mwabya bũkũtũ. Neryo omukulu wʼabahererĩ bosĩ mwabwira Yesu ati, Ngakusema busana na Nyamuhanga oyuliho, utubwire wamabya uli Kristo, Mugala wa Nyamuhanga. 64Yesu mwabũga naye ati, Uwe wamabũgakyo, nĩkwa ngababwira nyiti, Enyũma wʼaho mwasyalangira Omugala wʼomundu ĩnĩanĩkere oko byala byʼamali byʼOmũtokĩ Wʼebyosĩ, iniakasa oko bĩtũ byʼekyanya. 65Neryo omukulu wʼabahererĩ bosĩ mwatulanga ekanzu yiwe, ati, Abiritsuma! Tukine nʼobwaga bwʼabalangĩrĩ kwehĩ? Lebaya, mwamabyowa eritsuma liwe! 66Mũkaganĩrayakĩ kwehĩ? Nabo mobasũbĩrya bati, Atolere oluholo!
67Neryo mobatwĩra matande omo bũsũ bwa Yesu nʼerĩmũswĩrya ebĩkũndĩ, nʼabandi mobamũswĩrya esyongũmbe. 68Mobabũga bati, Uwe Kristo, utuminyerereko! Nindi wamakũswĩrya kwehĩ?
Petero akagana Yesu
(Mk 14.66-72; Lk 22.56-62; Yn 18.15-18,25-27)
69Nĩkwa Petero abya ĩnĩanĩkere eyĩhya omo muhana. Neryo omugombe mwana-muto muguma mwamũhĩkako ati, Nawe wabya na Yesu Omũgalĩlaya. 70Nĩkwa Petero mwayigana embere wʼabosĩ ati, Sĩnyasĩ ebyo ũkabũga nga ni byahi. 71Neryo Petero mwaya eyĩhya oko lũkyo lwʼomuhana, nʼogundi mugombe mwana-muto mwamulolako, mwabwira bandu ababyaho ati, Omundu oyũ abya na Yesu Omũnazaretĩ. 72Neryo Petero mwaswagana nʼerĩlahĩrya ati, Sĩnyasĩ omundu oyo. 73Kandi enyũma hake ababya bimeneho mobahĩka mobabwira Petero bati, Kwenene nawe uli muguma wa kubo, kusangwa emĩbũgĩre yawe ĩkakũmĩnyĩkalaya. 74Neryo Petero mwatsũka eritakira nʼerĩlahĩrya ati, Sĩnyasĩ omundu oyo! Neryo-neryo engoko-lume moyabika. 75Neryo Petero mwibuka ekĩnywa ekyo Yesu abũga ati, Engoko-lume ite yabika, ukandinyigana ngendo ĩsatu. Neryo mwahulukira eyĩhya, mwalira nʼobũlĩge.
Currently Selected:
Matayo 26: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.