Matayo 22
22
Omũsyo wʼerirya lyʼerĩherũkya
(Lk 14.15-24)
1Yesu mwatwa emĩsyo kandi omugulu abya akabũga nʼabandu ati, 2Obwami bwʼelubula buli ngʼOmwami oyo wakokotaya erirya lyʼerĩherũkya busana nʼomugala wuwe. 3Neryo mwatuma abagombe buwe eriyabwira bagenĩ bʼerirya ĩnene lyʼerĩherũkya abatumirawako ambu base, nĩkwa mobatanza erĩhĩka. 4Kandi mwatuma abandi bagombe ati, Mubwire abatumirawako muti, Lebaya, nabĩrĩkokotya erirya; esyonde syage, nʼesyosabwe syabĩrĩsĩnzwa, nʼebyosĩ bĩlũmĩre. Mwase okwʼirya lyʼerĩherũkya! 5Nĩkwa abagenĩ abo mobatatsomana, mobaya oko mĩbĩrĩ yabo, omuguma omwʼirima liwe, nʼogundi omo dũka yiwe. 6Nʼabandi bagenĩ mobahamba abagombe buwe, mobayirabo nabi, mobĩtabo. 7Nĩkwa omwami oyo mwahitana kutsibu, mwatuma emilondo yiwe, mwaherya abĩtĩ abo, kandi mwahĩsya omũyĩ wabo. 8Neryo mwabwira bagombe buwe ati, Erĩherũkya lĩlũmĩre, nĩkwa abatumirawako sibabya batolere. 9Neryo mugende omo syombalu, nʼabosĩ mũkandĩeya eyo, mubirikirebo okwʼirya lyʼerĩherũkya. 10Abagombe abo mobagenda omo syombalu mobahĩndanĩa abosĩ begayayo, ababi nʼababuya. Litya enyũmba yʼerĩherũkya moyũsũla mwʼabagenĩ.
11Nĩkwa omugulu omwami ahĩkamo erĩrebya abagenĩ, mwalangira omundu oyutambite olukimba lwʼerĩherũkya. 12Neryo omwami mwabũlya ati, Mwĩra wetu, ulingira muno uti iwe utambite olukimba lwʼerĩherũkya kwehĩ? Naye mwabya bũkũtũ. 13Neryo omwami oyo mwabwira bagombe ati, Mumubohe oko byala nʼoko bisando, mumuguse omo mwĩrĩmya, eyo hasyabya eririra nʼerikeregeta ameno. 14Neryo Yesu mwabũga ati, Abangi bakabirikirawa, nĩkwa ni bake abakayisogawa.
Omwatsi wʼomusolo
(Mk 12.13-17; Lk 20.20-26)
15Neryo Abafarĩsayo mobagenda mobaya embĩta ngoko bangatega Yesu omo bĩnywa. 16Neryo mobatuma abiga babo haguma nʼAbanya Herode uku Yesu bati, Mũkangĩrĩrya, tũnasĩ kʼuli wʼekwenene, kandi Akakangĩrĩraya enzira ya Nyamuhanga omo kwenene, sulitsomana mundu, sulitsomana amalengekanĩa wʼabandu, kandi sulisombola ebitaga nʼebite bitaga. 17Neryo utubwire ngʼukaganĩrayakĩ. Emigambo ĩkatũlĩgĩra erisolera Kaĩsarĩ, kutse iyihi kwehĩ? 18Nĩkwa Yesu mwaminya obubi bwabo neryo mwabũga ati, Ĩnywe batebya! Busana nakĩ mukanyirengako kwehĩ? 19Mũnyĩkangaye ekĩtsĩpa kyʼerisolera. Neryo mobamuletera edĩnarĩ. 20Yesu mwabũlyabo ati, Ekĩsosekanĩo nʼamasako ni byandi kwehĩ? 21Nabo mobamũsũbĩrya bati, Ni bya Kaĩsarĩ. Neryo Yesu mwabwirabo ati, Mulihe Kaĩsarĩ ebindu bya Kaĩsarĩ, kandi mulihe Nyamuhanga ebindu bya Nyamuhanga. 22Neryo omugulu bowa ebĩ mobasweka, mobamũsĩga, mobagenda.
Omwatsi wʼerĩlũbũka oko baholĩ
(Mk 12.18-27; Lk 20.27-40)
23Oko kiro ekyo Abasadũkayo mobahĩka uku Yesu. Aba ni bandu abakabũga bati, sihali erĩlũbũka. 24Mobamũbũlya bati, Mũkangĩrĩrya, Musa mwabũga ati, Omundu amahola isiawite bana, mugala wabo asyĩmya omũkalĩ oyo iniabutira mugala wabo yʼabana. 25Nĩkwa haguma netu habya bagala babo balinda, owʼerĩmbere mwahĩkya omũkalĩ, neryo mwahola, isialyabuta mwana, neryo mwasĩgĩra mugala wabo yʼomũkalĩ. 26Litya mugala wabo wʼakabiri mwakola atya, nʼowʼakasatu mwakola atya erĩhĩka oko wʼakalinda. 27Nʼenyũma wʼabosĩ omũkalĩ oyo naye mwahola. 28Neryo oko kiro kyʼerĩlũbũka, omũkalĩ oyo asyabya wandi oko balinda abo kwehĩ? Kusangwa abosĩ ĩbabĩrĩmwĩmya.
29Nĩkwa Yesu mwasũbĩryabo ati, Mukatala, sĩmwasĩ Amasako, kutse amaka wa Nyamuhanga. 30Kusangwa oko mugulu wʼerĩlũbũka bali ngʼabamalaĩka omo lubula. Sĩbehĩkaya kutse erĩherũkanĩa. 31Nĩkwa busana nʼerĩlũbũka lyʼabaholĩ simwetasoma ebyo Nyamuhanga ababwira kwehĩ ati, 32Ĩngye indi Nyamuhanga wa Abrahamũ, na Nyamuhanga wa Ĩsaka, na Nyamuhanga wa Yakobo. Nyamuhanga si Nyamuhanga wʼabaholĩ, nĩkwa ni Nyamuhanga wʼabaliho. 33Omugulu esyondeko syowa ebĩ, mobaswekera erĩkangĩrĩrya liwe.
Omugambo mukulu
(Mk 12.28-34; Lk 10.25-28)
34Nĩkwa omugulu Abafarĩsayo bowa ko Yesu abĩrĩtũlerya Abasadũkayo, mobahĩndana haguma. 35Nʼomuguma wa kubo oyo wabya mũkangĩrĩrya wʼEmigambo mwabũlya Yesu ekĩnywa erimulengako, ati, 36Mũkangĩrĩrya, ekihano kikulu omo Migambo ni kyahi kwehĩ? 37Neryo Yesu mwamubwira ati, Wanze Omukama Nyamuhanga wawe nʼomutima wawe gosĩ, nʼekĩrĩmũ kyawe kyosĩ nʼobũlengekanĩa bwawe bosĩ. 38Ekihano kikulu nʼekyʼerĩmbere kyekyo. 39Omugambo wʼakabiri owali ngago, ati, Wanze mũlĩkyenyũ ngoko ũyanzĩre. 40Oko bihano bibiri ebĩ, Emigambo yosĩ ya Musa nʼerĩkangĩrĩrya lyʼabamĩnyererĩ bihangene.
Omwatsi wa Masĩya (Kristo)
(Mk 12.35-37; Lk 20.41-44)
41Neryo omugulu Abafarĩsayo bahĩndana haguma, Yesu mwabũlyabo, 42ati, Mũkaganĩrayakĩ busana na Kristo kwehĩ? Ni mugala wandi kwehĩ? Nabo mobamubwira bati, Ni mugala wa Dawĩdĩ. 43Neryo Yesu mwabwirabo ati, Omũlĩmũ Abũyĩrĩre asondola Dawĩdĩ eriahula Kristo mo Mukama ati kwehĩ? ati,
44Omukama mwabwira Omukama wage ati,
Wĩkale oko byala byage byʼamali,
Erĩhĩka aho nasyahĩrĩra esyonzĩgũ syawe omwisi wʼebisando byawe.
45Neryo Dawĩdĩ amabya akamwahula mo Mukama, Kristo ni mwana wa Dawĩdĩ ati kwehĩ? 46Neryo mohatabya mundu oyo watoka erĩsũbĩrya Yesu omwatsi, kutse erĩtsũka ekiro ekyo, sihabya mundu oyo walenga erĩswamũbũlya mwatsi.
Currently Selected:
Matayo 22: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.