Matayo 2
2
Abʼamenge bakalũa ebwanga bwʼendata
1Neryo Yesu mwabutwa omo mũyĩ wʼeBetelehemũ, omo kihugo kyʼeYũdea oko mugulu Herode abya mwami. Neryo lebaya, abandu bʼamenge mobalũa eyo eryuba likahulukira, mobahĩka eYerũsalema, bati, 2Ali hahi oyo wabutawa mo mwami wʼAbayũda kwehĩ? Kusangwa twabirilola oko ngũnũnũ yiwe eyo eryuba likahulukira, neryo twabĩrĩhĩka erĩmũramya. 3Omugulu omwami Herode owa ekĩ, mwahanga-hangya, nʼabandu bosĩ bʼeYerũsalema mobabya batya. 4Neryo Herode mwahĩndanĩa abahererĩ bakulu bosĩ nʼabakangĩrĩrya bʼemigambo, neryo mwabũlyabo Kristo ngʼangabutirwahi. 5Mobamũsũbĩrya bati, Omo mũyĩ wʼeBetelehemũ yʼeYũdea, kusangwa kĩsakĩre nʼomũmĩnyererĩ ati,
6Uwe Betelehemũ omo kihugo kyʼe Yũda,
Suli muke nʼahake omo katĩkatĩ kʼabakulu bʼeYũda;
Kusangwa omũtabalĩ asyalũa ewawe,
Oyo wasyateya abandu bage Ĩsraelĩ.
7Neryo omwami Herode mwabirikira abʼamenge bo bũbĩso-bĩso, mwabũlyabo engũnũnũ eyo nga yahuluka mugulu wahi. 8Neryo Herode mwatumabo eBetelehemũ, ati, Mugende mukwese ndeke busana nʼomwana oyo; neryo mwamabimubana mwasyambwira, nage inayayo nʼerĩmũramya. 9Neryo babere babĩowa ebyo mwami Herode abũga, mobagenda, neryo lebaya engũnũnũ eyo balangira eyo eryuba likahulukira, moyagenda embere syabo erĩhĩka aho yahangana endata wʼaho mwana oyo abya. 10Neryo omugulu balangira engũnũnũ eyo mobatsema kutsibu nʼobutseme bunene. 11Neryo mobingira omo nyũmba, mobalola oko mwana oyo haguma na nyĩnya wuwe ye Marĩa. Mobakũkama ahisi nʼerĩmũramya; kandi mobasengula ebindu byabo mobamuha olũsũnzo lwʼesyofranka syʼamagetsi, nʼobukwa nʼamanemane. 12Neryo Nyamuhanga mwahanabo omwʼilota sibasube ewʼomwami Herode; neryo mobasuba ewabo omo yindi nzira.
Erisagira eMĩsĩrĩ
13Neryo, abʼamenge babere babigenda, omũlaĩka wʼomukama mwabutukira uku Yosefũ omo nzolĩ ati, Hangana, wĩmaye omwana na nyĩnya wuwe, musagire eMĩsĩrĩ, ubyeyo erĩhĩka aho nasyakubwirira. Herode akandisonda-sonda omwana erĩmwĩta. 14Neryo Yosefũ mwahangana, mwĩmya omwana na nyĩnya wuwe, mwagenda eMĩsĩrĩ omo kiro. 15Neryo mwĩkalayo erĩhĩka okwʼihola lya Herode. Ebĩ byakolawa erĩberererya ebyo Mukama abũgĩra omo mũmĩnyererĩ ati, Monabirikira Mugala wage erĩlũa eMĩsĩrĩ.
Erĩĩta abana
16Neryo omugulu omwami Herode aminya abandu bʼamenge ko babirimuteba mwahitana kutsibu. Neryo mwahamula erĩĩta abana bosĩ bʼobulume ababya eBetelehemũ nʼababya hakũhĩ nʼeBetelehemũ, ababya bʼemyaka ĩbĩrĩ nʼabalere kwʼaho, iniakaganza omugulu aminya oko bʼamenge abo.
17Neryo mokyabererera ekyabũgawa nʼomũmĩnyererĩ Yeremĩa ati,
18Omulenge akogũbawa eRama,
Eririra nʼerĩsũsũmana ĩnene,
Rakelĩ akalira busana nʼabana buwe,
Rakelĩ akagana erĩkĩranĩbwa,
Kusangwa abosĩ babirihola.
Yosefũ na Marĩa na Yesu bakalũa eMĩsĩrĩ
19Nĩkwa omwami Herode abere abihola, lebaya, omũlaĩka wʼomukama mwabutukira uku Yosefũ omo nzolĩ eMĩsĩrĩ, ati, 20Hangana, wĩmaye omwana na nyĩnya, usube omo kihugo kyʼeĨsraelĩ, kusangwa abasonda erĩĩta omwana babirihola. 21Neryo Yosefũ mwahangana, mwĩmya omwana na nyĩnya, mobasuba omo kihugo kyʼeĨsraelĩ.
22Nĩkwa omugulu Yosefũ owa ko Arkelayo akatabala eYũdea omo mwanya wa Herode ĩse wuwe, Yosefũ mubaha erisubayo. Kandi Nyamuhanga mwamuhana omo nzolĩ, kyaleka iniaya omo bihugo byʼeGalĩlaya. 23Nĩkwa mwahĩka oko mũyĩ wʼeNazaretĩ neryo mwĩkalayo, erĩberererya ebyo bamĩnyererĩ babũga bati, Asyahulwa mo Mũnazaretĩ.
Currently Selected:
Matayo 2: KB80
Highlight
Share
Copy
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.