Matayo 16
16
(Mk 8.11-13; Lk 12.54-56)
1Neryo Abafarĩsayo nʼAbasadũkayo mobahĩka uku Yesu. Babya banzĩre erimulengako, mobamũbũlya bati akangayebo ekitiko-tiko ekĩkalũa elubula. 2Nĩkwa Yesu mwasũbĩryabo, ati, Omugulu wʼerĩgolo-golo mũkabũga muti, Obũtũkũ bũkandĩsyowana, kusangwa ekyanya kĩhenĩrye. 3Nʼengyakya-ngyakya muti, Bukandibya mũlũmbĩ mũnabwĩre, kusangwa ekyanya kyamabya lukula-kula nʼebĩtũ byamahimba. Mũnasĩ eriminyerera omũsĩndo wʼekyanya, nĩkwa simulitoka eriminyerera ebiminyikalo byʼemigulu kwehĩ? 4Abandu ba sesene ni babi, kandi sibawite Nyamuhanga, bakasonda-sonda ekitiko-tiko, nĩkwa sibendisyahabwa ekitiko-tiko kye nʼekitiko-tiko kya Yona. Neryo Yesu mwasĩganĩabo, mwalũaho.
Ekĩhamya kyʼAbafarĩsayo nʼAbasadũkayo
(Mk 8.14-21)
5Neryo abiga babere babĩhĩka eyisirya wʼengetsi mobibirirwa eriheka obundu. 6Neryo Yesu mwabwirabo ati, Mũlebaye, mũyĩtegaye busana nʼekĩhamya kyʼAbafarĩsayo nʼAbasadũkayo. 7Nĩkwa mobatsũka erĩkanĩrya omo katĩkatĩ kabo bati, akabũga atya kusangwa sitwetaheka bundu. 8Nĩkwa Yesu, ĩnĩanasĩ omwatsi oyo mwabũga ati, Ĩnywe bandu bʼerĩkĩrĩrya ĩke, busana nakĩ mũkakanĩranaya muti simuwite bundu kwehĩ? 9Simulitaminya kwehĩ? Kutse simulyibuka amandu atanu wʼamaelfu atanu (5,000), nʼebitiri bingahi mwakumiramo kwehĩ? 10Kutse amandu alinda busana nʼabandu elfu ĩnĩ (4,000), nʼebitiri bingahi ebyo mwasongerayamo kwehĩ? 11Ko mukabula muti eriminya ngoko ndabũga nenyũ busana nʼobundu kwehĩ? Mũyĩtegaye busana nʼekĩhamya kyʼAbafarĩsayo nʼAbasadũkayo! 12Neryo abiga mobaminya kwʼatalyabwirabo erĩyĩteya busana nʼekĩhamya kyʼobundu, nĩkwa busana nʼerĩkangĩrĩrya lyʼAbafarĩsayo nʼAbasadũkayo.
Erĩtũlago lya Petero busana na Yesu
(Mk 8.27-30; Lk 9.18-21)
13Nĩkwa omugulu Yesu ahĩka omo kihugo kyʼeKaĩsarĩ-Fĩlĩpĩ, mwabũlya abiga buwe ati, Abandu bakabũga bati, Omugala wʼomundu yondi kwehĩ? 14Nabo mobasũbĩrya bati, Abandi bati, Yoane Mũbatĩsya; nʼabandi bati, Elĩa; nʼabandi bati, Yeremĩa, kutse omuguma gʼoko bamĩnyererĩ. 15Nĩkwa Yesu mwabũlyabo ati, Nenyũ mũkabũga muti Ĩngyendi kwehĩ? 16Sĩmonĩ Petero mwasũbĩrya ati, Uli Kristo, Mugala wa Nyamuhanga oyuliho. 17Yesu mwamũsũbĩrya ati, Uli nʼobutseme, uwe Sĩmonĩ mugala wa Yona! Kusangwa sihali mundu wakũmĩnyĩsaya omwatsi oyũ, nĩkwa nina Tata wage oyuli elubula. 18Kandi ngakubwira kʼuli Petero, nʼoko lĩbwe erĩ nasyahĩmba ekanĩsa yage; kandi amaka wʼoluholo siendĩsyakĩndayo na kera. 19Nasyakuha ebĩboholĩ byʼobwami bwʼelubula, nʼekĩndũkĩ wasyaganĩa muna-kihugo, kyasyaganwa elubula, nʼekĩndũkĩ wasyalĩga muna-kihugo kyasyalĩgwa elubula. 20Neryo Yesu mwaganĩa abiga ati sibabwire mundu kwʼali Kristo.
Yesu akahula eriagalwa liwe nʼoluholo luwe
(Mk 8.31—9.1; Lk 9.22-27)
21Erĩtsũka omugulu oyo Yesu Kristo mwatsũka erĩkangya abiga buwe kwʼatolere eriya eYerũsalema, nʼerĩagalĩbwa omo myatsi mingi nʼabakulu, nʼoko bahererĩ bakulu, nʼabakangĩrĩrya bʼEmigambo, nʼerĩĩtwa, nʼerĩlũbũkĩbwa enyũma wʼebiro bisatu. 22Neryo Petero mwatwala Yesu aho lutambi, mwatsũka erimukunga ati, Mukama, Nyamuhanga aganaye ekyo! Ekĩ sĩkĩkũhĩkeko na kera! 23Nĩkwa Yesu mwakeba mwabũga na Petero ati, Uwe Satanĩ, ubye enyũma kwĩngye! Uli ndwĩkale yage kusangwa amalengekanĩa wawe si wa Nyamuhanga nĩkwa ni wʼabandu.
24Neryo Yesu mwabwira abiga buwe ati, Omundu amanza erinyikwama, ayigane, aheke omusalaba wuwe, anyikwame. 25Kusangwa omundu Oyukasonda erĩlamya engebe yiwe asyatalyayo; nĩkwa omundu Oyũkatalaya engebe yiwe busana nage, asyabanayo. 26Kusangwa omundu akabana endũndĩ yahi amatunda ekihugo kyosĩ, akalwĩka engebe yʼomutima wuwe kwehĩ? Kutse omundu asyahĩnganĩakĩ busana nʼengebe yiwe kwehĩ? 27Kusangwa Omugala wʼomundu asyasa nʼabamalaĩka buwe omo lukengerwa lwa Tata wuwe; nʼoko mugulu oyo asyahemba obuli mundu ngʼemĩbĩrĩ yiwe kwʼiri. 28Kwenene ngabũga nenyũ, hali abandi oko bimene hano abatendisyahola bate balangira Omugala wʼomundu akasa mo Mwami.
Currently Selected:
Matayo 16: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.