YouVersion Logo
Search Icon

Matayo 1

1
Esyondengo sya Yesu Kristo
(Lk 3.23-38)
1Ekitabu kyʼesyondengo sya Yesu Kristo, mugala wa Dawĩdĩ, mugala wa Abrahamũ.
2Abrahamũ abya ĩse wa Isaka; na Ĩsaka abya ĩse wa Yakobo; na Yakobo abya ĩse wa Yũda nʼabagala babo. 3Yũda abya ĩse wa Perezĩ na Zera (nyĩnya wabo abya Tamarĩ); na Perezĩ abya ĩse wa Hesĩronĩ; na Hesĩronĩ abya ĩse wa Ramũ; 4Ramũ abya ĩse wa Amĩnadabũ; na Amĩnadabũ abya ĩse wa Nasonĩ; Nasonĩ abya ĩse wa Salmonĩ; 5Salmonĩ abya ĩse wa Boazĩ (nyĩnya wa Boazĩ abya Rahaba); Boazĩ abya ĩse wa Obedĩ (Rũta abya nyĩnya wuwe); Obedĩ abya ĩse wa Yese; 6Yese abya ĩse wʼOmwami Dawĩdĩ.
Dawĩdĩ abya ĩse wa Solomono (nyĩnya wuwe abya mũkalĩ wa Ũrĩa); 7Solomono abya ĩse wa Reheboamũ; Reheboamũ abya ĩse wa Abĩa; Abĩa abya ĩse wa Asa; 8Asa abya ĩse wa Yosafatĩ; Yosafatĩ abya ĩse wa Yoramũ; Yoramũ abya ĩse wa Ũzĩa; 9Ũzĩa abya ĩse wa Yotamũ; Yotamũ abya ĩse wa Ahazĩ; Ahazĩ abya ĩse wa Hezekĩa; 10Hezekĩa abya ĩse wa Manase; Manase abya ĩse wa Amonĩ; Amonĩ abya ĩse wa Yosĩa; 11Yosĩa abya ĩse wa Yekonĩa nʼabagala babo, oko mugulu abandu ba Ĩsraelĩ batwalawa eBabelĩ.
12Abandu babere babitwalwa eBabelĩ: Yekonĩa abya ĩse wa Salatĩelĩ; Salatĩelĩ abya ĩse wa Zerũbabelĩ; 13Zerũbabelĩ abya ĩse wa Abĩhũdĩ; Abĩhũdĩ abya ĩse wa Elĩakĩmũ; Elĩakĩmũ abya ĩse wa Azoro; 14Azoro abya ĩse wa Sadokĩ; Sadokĩ abya ĩse wa Akĩmũ; Akĩmũ abya ĩse wa Elĩhũdĩ; 15Elĩhũdĩ abya ĩse wa Eleazarĩ; Eleazarĩ abya ĩse wa Matanĩ; Matanĩ abya ĩse wa Yakobo; 16Yakobo abya ĩse wa Yosefũ, ĩba wa Marĩa, oyo wabya nyĩnya wa Yesu, oyukahulawa mo Kristo.
17Neryo esyondengo syosĩ erĩtsũka uku Abrahamũ erĩhĩka uku Dawĩdĩ ni ndengo ĩkũmĩ nʼĩnĩ; nʼerĩtsũka uku Dawĩdĩ erĩhĩka oko mugulu abandu batwalawa eBabelĩ ni ndengo ĩkũmĩ nʼĩnĩ; nʼerĩtsũka oko mugulu abandu batwalawa eBabelĩ erĩhĩka uku Kristo ni ndengo ĩkũmĩ nʼĩnĩ.
Eributwa lya Yesu
(Lk 2.1-7)
18Neryo eributwa lya Yesu Kristo ko lyabya litya. Nyĩnya wuwe ye Marĩa mwasĩmolĩbwa na Yosefũ. Nĩkwa Marĩa ate aheruka mwaminyikala kʼobukule bwʼOmũlĩmũ Abũyĩrĩre. 19Neryo Yosefũ oyo wamũsĩmolaya, ini mundu utunganene, siabya anzĩre erĩmwĩta esĩsonĩ, neryo mwasonda erimuleka bũbĩso-bĩso. 20Nĩkwa omugulu Yosefũ abya akaganĩrya omwatsi oyũ, lebaya, omũlaĩka wʼomukama mwamubutukira omo nzolĩ mwamubwira ati, Uwe Yosefũ, mugala wa Dawĩdĩ, Sigubahe erĩherũkya Marĩa mo mũkalĩ wawe, kusangwa obukule buwe ni bwʼOmũlĩmũ Abũyĩrĩre. 21Asyabuta omugala, nawe wasyamwahula mo Yesu, kusangwa asyalamya abandu buwe oko bibi byabo.
22Nĩkwa ebyosĩ ebĩ mobyabya bitya erĩberererya ebyo Mukama abũgĩra omo mũmĩnyererĩ ati, 23Lebaya, omumbesa asyaheka obukule, asyabuta omugala, nʼerĩna liwe lyasyahulwa mo Emanuelĩ, nĩʼbũga ambu: Nyamuhanga haguma netu.
24Neryo Yosefũ abere abuka omo tũgotserĩ, mwakola ngoko mũlaĩka wʼomukama amutegeka, mwaherũkya Marĩa. 25Nĩkwa mwatamuminya erĩhĩka aho abutira mugala wuwe. Neryo Yosefũ mwaluka erĩna liwe mo Yesu.

Currently Selected:

Matayo 1: KB80

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy