Yakobo 5

1Neryo muhulikirire lino, ĩnywe bandu bʼebindu! Mulire, muyilakire busana nʼamalĩge awakandĩsyabahĩkako. 2Ebindu byenyũ byabirihonda, nʼesyongimba syenyũ syabiriribwa nʼehinyurugunzu. 3Esyamagetsi nʼebĩtsĩpa byenyũ, byabĩrĩhwa amakenge, nʼamakenge wabyo asyabya mũlangĩrĩ wenyũ, kandi asyalya emĩnyokũ yenyũ ngʼomuliro. Mwabiriyibikira ebindu byenyũ omo biro byʼenyũma-nyũma. 4Mũlebaye, simwetaliha abandu abahingira omo malima wenyũ, nʼabandu abasolomago. Nabo bakabatsongera. Nʼerilaka lyabo lyabĩrĩhĩka omo matwĩ wʼOmukama wʼAmaka Gosĩ. 5Mwabirisiba muna-kihugo ngʼabami, nʼerĩyĩtsemesya ndeke. Mwabĩrĩnenehya emitima yenyũ busana nʼekiro kyʼerikerwa. 6Mwabĩrĩsĩnga nʼerĩĩta omundu mutunganene; naye sialilwa nenyũ.

Muyibombeke musabe

7Neryo balĩkyetu, muyibombeke erĩhĩka oko kiro kyʼeriasa lyʼomukama. Mũlebaye ngoko mũlĩmĩ akayibombeka, eririnda eriera lyʼebĩgũma byʼenzwere nene byʼekitaka, iniakayibombeka erĩhĩka oko kiro embũla yʼerĩmbere nʼeyʼerĩnyũma ikawa. 8Nenyũ nibya, muyibombeke! Mũsĩkaye emitima yenyũ, kusangwa ekiro kyʼeriasa lyʼomukama kiri hakũhĩ.

9Balĩkyetu, simutongane, mukasyatswerwa na Nyamuhanga. Mũlebaye, omũtswerĩ imene oko lũkyo. 10Balĩkyetu mwibuke abamĩnyererĩ, ababũga omo lĩna lyʼomukama. Muganzebo ngʼolulengo lwʼerĩyĩyĩnĩa, nʼeriyibombeka omo bũlĩge. 11Mũlebaye, tukaganza abayĩyĩnaya mo bandu bʼobutseme. Mwabĩrĩowa engulu yʼerĩyĩyĩnĩa lya Yobũ, kandi mwabirilangira ebyo Mukama asala amukolera. Kusangwa Omukama ni wʼeriganyira kutsibu, kandi akaganyira abandu.

12Nĩkwa kwilaba ebyosĩ, balĩkyetu, omugulu mukalaga, sĩmũlahĩraye kutse omo lubula, kutse omo kihugo, kutse omo lindi erĩlahĩrya. Nĩkwa ega yenyũ ibye ega, nʼeyihi yenyũ ibye iyihi, Nyamuhanga siabatswere.

13Hali mundu omo katĩkatĩ kenyũ akagalawa kwehĩ? Asabe. Hali Oyukatsema kwehĩ? Imbe nʼeripipa. 14Hali oyulwere omo katĩkatĩ kenyũ kwehĩ? Abirikire abakulu bʼekanĩsa, bamusabire, nʼerĩmũhakabya amagũta omo lĩna lyʼomukama. 15Nʼerisaba erĩ lyʼerĩkĩrĩrya lyasyalamya Omũkonĩ, nʼOmukama asyamũsũbya. Kandi amabya abirikola ebibi, asyabuyirwabyo. 16Neryo mũkangananaye ebibi byenyũ, nʼerisabirana, imwatoka erĩlamĩbwa. Erisaba lyʼomundu mutunganene likatoka omwatsi munene. 17Elĩa abya mundu nga twe, neryo mwasaba nʼomũhwa ati, embũla siyiwe. Neryo embũla moyitawa oko kihugo emyaka ĩsatu nʼemikera ndatu. 18Neryo mwaswasaba neryo olubula molwawĩsya embũla, nʼekitaka mokyalasya esyombuto.

19Balĩkyetu, hamabya mundu omo katĩkatĩ kenyũ oyukatala nʼerĩlũa omo kwenene, nʼogundi akamũsũbũlya; 20muminye omwatsi ono, oyũkasũbũlaya omukola-nabi erĩmũlũsya okwʼitala liwe, akalamaya omutima wʼomukola-nabi oyo okwʼihola, kandi akaleka ebibi binene ibyabuyirwa.

Currently Selected:

Yakobo 5: KB80

Highlight

Copy

Compare