Yakobo 3

Olulimi

1Balĩkyetu, Sihabye abakangĩrĩrya bangi omo katĩkatĩ kenyũ, kusangwa ĩtwe bakangĩrĩrya twasyatswerwa erĩkalĩre kwilaba bandi. 2Kusangwa ĩtwe bosĩ tukatala omo bingi. Omundu oyutetala omo bĩnywa ni mundu ũhĩkene, iniatoka eriyibombeka omo myatsi yosĩ yʼomubiri wuwe gosĩ. 3Nĩkwa tũkahĩra ebyuma omo muno wʼesyosabayĩrĩ isyatoka eritukenga, kandi tukategeka omubiri wasyo gosĩ. 4Kandi mũlebaye amato, nomo angabya manene-manene nʼerĩkũnwa nʼerihunga erĩkalĩre, amato ayo akasondolawa nʼengahya nge-nge-nge, neryo akalola eyo mũsondolĩ wago anzĩre. 5Ko liri ritya oko lulimi. Nĩ kĩtsũko kyike nĩkwa lukayihalamba omo myatsi minene-minene.

Mũlebaye ngoko muliro muke akahĩsaya ekisuki kinene! 6Nʼolulimi luli ngʼomuliro, olulimi ni kihugo ekyoswĩre nʼebibi. Olulimi lwĩkere omo katĩkatĩ kʼebĩtsũko byetu, kandi lũkatsandaya omubiri gosĩ. Kandi lũkakaya omuliro omo mitima yetu, omuliro oyo akalũa elĩfero. 7Abandu bakabegeraya emihanda yosĩ yʼesyonyama esyʼomolĩ, nʼesyonyonyũ, nʼesyonyama esikakululuka, nʼesyosĩ syʼomo ngetsi, kandi babĩrĩbegerya esyosĩ. 8Nĩkwa sihali mundu oyukatoka erĩbegerya olulimi. Kusangwa olulimi ni kibi ekiteluhuka, ĩloswĩre nʼobuti obũkĩta. 9Omo lulimi tukapipa Omukama wetu na Tata; kandi mulo tukatakira abandu abahangikawa omo kĩsosekanĩo kya Nyamuhanga! 10Omo buno buguma mũkalũa eripipa nʼeritakira. Balĩkyetu, emyatsi eyĩ siyangabya itya! 11Engũnũnũko ĩkahũlũkaya omo kyũna kiguma amagetsi awasĩhĩre, nʼamagetsi awakalĩhĩre kwehĩ? 12Kandi balĩkyetu, omuti wʼomũtĩnĩ anganatoka eriheta kwʼebĩgũma byʼemĩzeĩtũnĩ kwehĩ? Kutse omũlĩkĩ wʼebĩnyũ anganatoka eriheta kwʼebĩgũma byʼomũtĩnĩ kwehĩ? Litya amagetsi wʼOmũnyũ siangatoka erĩhũlũkya awasĩhĩre.

Amenge awakalũa endata

13Nindi omo katĩkatĩ kenyũ oyuwite amenge nʼeriminya kwehĩ? Akanganayebyo omo mibere mibuya yiwe, nʼomo mĩbĩrĩ yiwe eyo akakola nʼomutima molo, nʼowʼamenge. 14Nĩkwa mwamabya nʼeritsura erĩkalĩhĩre, nʼeriyanza nabi omo mitima yenyũ, Simuyihalambe nʼeribihira omwatsi wʼekwenene. 15Amenge aya sĩ mũsĩndo owakalũa endata, nĩkwa ni wʼekihugo, kandi ni wʼomubiri, kandi ni wa Satanĩ. 16Kusangwa ahali eritsura nʼeriyanza nabi, aho hali erinegena nʼerikola ebĩtĩsĩrĩre byosĩ. 17Nĩkwa amenge awakalũa endata, embere ni mabuya; kandi ni wʼobuholo, kandi ahehere, kandi akowa lũba, oswĩre mwʼeriganyira, nʼemĩbĩrĩ mibuya; kandi sialisombola ndi nandi, kandi sĩalĩyĩtendereraya. 18Kandi emyatsi eyikaleta ebitunganene ĩkatsũka omo buholo busana nʼabandu abakayira Obuholo.

Currently Selected:

Yakobo 3: KB80

Highlight

Copy

Compare