Abaebrania 13

Enzira yʼerĩtsemesya Nyamuhanga

1Mwanzane ebiro byosĩ ngʼabalĩkyetu. 2Simwibirirawe erĩkokya abʼehandi, kusangwa abandi babĩrĩkokya abamalaĩka bo batya ĩsĩbasĩbo. 3Mwibuke abali omo mũlĩkĩ nga muli haguma nabo omo mũlĩkĩ, kandi mwibuke abakagalĩbawa, nga mũkagalĩbawa mutya omo mubiri.

4Abandu bosĩ bakenge erĩherũkya, nʼengyingo yabo ibye yabo ĩbobene-bene; kusangwa Nyamuhanga asyatswera abʼamaragane nʼabasĩngĩrĩ.

5Simukwamirire erianza esyofranka, nĩkwa mutsemere ebyo muwite. Kusangwa Nyamuhanga abĩrĩbũga ati, Sindiendisyakuleka na kera, kandi, sindiendĩsyakũsĩganĩa nʼahake. 6Kikaleka ĩtwabũga butsira eriubaha tuti,

Omwami Mukulu nĩ mũwatĩkya wage, sindiendisyubaha!

Kwʼabandu banganyikolakĩ kwehĩ?

7Mwibuke abasondolĩ benyũ, ababaletera ekĩnywa kya Nyamuhanga. Kandi mwibuke emigendere yabo nʼebyo bakola, mũgerereraye erĩkĩrĩrya lyabo. 8Yesu Kristo sialihinduka; mũlĩgolo na mũnabwĩre, ega na kera, ikwʼane atya. 9Simutwalawe omwʼĩkangĩrĩrya lyʼemĩsĩndo-mĩsĩndo nʼeryʼehandi. Kusangwa lyowene emitima yenyũ ĩsĩkĩbawe nʼolukogo lwa Nyamuhanga. Sĩyĩsĩkĩbawe omo myatsi yʼebyalya, eyitereta mugaso oko bakakwamayo.

10Abo abakakola omũbĩrĩ wʼehema sibawite ehamũlĩ yʼerirya oko buhere obuli oko kiherero kyetu. 11Omũhererĩ Mukulu oko bahererĩ bosĩ akaleta omusasi wʼesyonyama oko Habũyĩrĩre ngʼobuhere busana nʼebibi. Nĩkwa ebĩnda byʼesyonyama esĩ byabya ĩbĩkahĩsĩbawa ekyaswa kyʼekilaliriro. 12Neryo Yesu nibya mwagalwa eyĩhya oko lũkyo lwʼomũyĩ, iniatoka erihigula abandu omo musasi wuwe ĩgowene. 13Neryo, tũmwegaye ekyaswa kyʼomũyĩ, erihemulwa haguma naye. 14Kusangwa eno situwite mũyĩ owakakota, nĩkwa tukasonda-sonda omũyĩ owakandisyasa. 15Neryo busana na Yesu, tuhe eripipa lyetu ngʼobuhere uku Nyamuhanga. Kandi emirenge yetu ipipe erĩna liwe. 16Simwibirirawe erikola ebibuya nʼerĩwatĩkanĩa, kusangwa ebĩ biri ngʼamahere awakatsemesaya Nyamuhanga. 17Mowe abakabasondola, kandi mukole ebyo bakababwira. Bakategaya emitima yenyũ, ngʼabandu abakandĩsyakanganĩa Nyamuhanga ebyo bakola. Neryo bakole batya nʼobutseme butsira obũlĩge. Bamakola nʼobũlĩge sibwendibaletera ndũndĩ.

18Mubye mukatusabira, kusangwa tũnasĩ tuwite obunya-mutima bowene, ĩtwanzĩre erikola ebibuya omo myatsi yosĩ. 19Kandi ngabahatikana kutsibu musabe, Nyamuhanga ĩnĩanyĩsũbya ewenyũ yo lũba.

Erisaba

20Nyamuhanga abĩrĩlũbũkya Omukama wetu Yesu oko baholĩ, oyuli Mũlĩsya mukulu busana nʼerĩũta omusasi wuwe omo ndagane ya kera na kera. Neryo Nyamuhanga wʼobuholo, 21abahe emyatsi yosĩ eyitolere busana nʼerikola erisonda liwe, akole omwisi wetu ebĩkamũtsemesaya. Akole ebĩ busana na Yesu Kristo; ukwʼiye habye olukengerwa na kera na kera. Amina.

Erĩkerya lyʼeribuga ebarua

22Nĩkwa ngabahatikana, balĩkyetu, nyiti mowe ekĩnywa kyage kyʼeribahana, kusangwa nabiribasakira ebĩnywa bike. 23Muminye ngoko mũlĩkyetu Tĩmoteo abiriboholwa; neryo Tĩmoteo amasa lũba, asyabya nage ekiro nasyabasunga.

24Mũkeraye abasondolĩ benyũ bosĩ, nʼabandu bosĩ ba Nyamuhanga. Abali eĨtalĩa bakabakeraya.

25Olukogo lwa Nyamuhanga lubye nʼĩnywe bosĩ.

Currently Selected:

Abaebrania 13: KB80

Highlight

Copy

Compare