Abaebrania 1
1
Nyamuhanga abĩrĩbũga omo Mugala wuwe
1Nyamuhanga kera mwabũga nʼabotata-kulu betu omo bĩnywa byʼabamĩnyererĩ, esyongendo nyingi nʼomo syonzira mĩsĩndo-mĩsĩndo. 2Nĩkwa omo biro ebĩ byʼenyũma-nyũma abĩrĩbũga netu busana nʼomugala wuwe. Nĩkwa Nyamuhanga mwahangika omo byala byʼomugala wuwe ekihugo nʼebyosĩ ebiri omo kyanya. Kandi Nyamuhanga abĩrĩhĩra Omugala wuwe eribya Omwenye myatsi yosĩ. 3Omugala akakangabasanaya nʼolukengerwa lwa Nyamuhanga. Kandi iye ni kiminyikalo kwenene kyʼeribyaho lya Nyamuhanga. Kandi akahanganaya emyatsi yosĩ yʼekihugo nʼeyʼekyanya omo kĩnywa kyʼobũtokĩ buwe. Neryo abere abĩerya ebibi busana nʼabandu, mwĩkala oko luhande lwʼamali lwa Nyamuhanga Omwenye Obukulu Owendata kutsibu.
Omũlamya ni mukulu kwilaba abamalaĩka
4Neryo Mugala mwabya mukulu kwilaba abamalaĩka, ngoko erĩna liwe eryo ni rikulu kwilaba eryʼabamalaĩka.
5Kusangwa Nyamuhanga mwabwira omũlaĩka wahi na kera ati,
Uli Mugala wage,
Namakubuta mũnabwĩre.
Nʼakandi ati,
Nasyabya Ĩse wuwe,
Naye asyabya Mugala wage.
6Kandi omugulu Nyamuhanga abya akaleta akambere kuwe omo kihugo, mwabũga ati,
Abamalaĩka bosĩ ba Nyamuhanga bamũramaye.
7Neryo Nyamuhanga mwabũga busana nʼabamalaĩka ati,
Nyamuhanga akayira abamalaĩka buwe mo mahunga,
Kandi akayira abagombe buwe mo birimi byʼomuliro.
8Nĩkwa Nyamuhanga akabũga busana nʼomugala ati,
Ekĩtũmbĩ kyawe kyʼobwami, uwe Nyamuhanga, ni kya kera na kera,
Ukatabala oko bwami bwʼerĩbanza.
9Wabirianza eritunganene, ũkakwa ebibi byʼobusu;
Kikaleka Nyamuhanga, ye Nyamuhanga wawe akayisoga we.
Kandi abĩrĩkũtũlĩra kwʼobutseme bwʼerĩsĩkya kwilaba eryo aha abalĩkyenyũ.
10Kandi ati,
Uwe Mwami Mukulu, erĩmbere mowahĩra ekibanza kyʼekihugo.
Nʼolubula nĩ mũbĩrĩ wʼebyala byawe.
11Ebyosĩ ebyo byasyabulirayo, nĩkwa
Uwe wasyabyaho Nʼebyosĩ ebyo byasyakula ngʼolukimba,
12Kandi wasyalĩngabyo ngʼerĩkotĩ,
Byasyahĩndũkĩbwa ngʼolukimba.
Nĩkwa uwe une ngoko wabya.
Nʼemyaka yawe siyendisyahwa.
13Nĩkwa Nyamuhanga mwabwira omũlaĩka wahi na kera ati,
Wĩkale oko luhande lwage lwʼamali,
Erĩhĩka aho nasyahĩrĩra esyonzĩgũ syawe
Omo kĩtũmbĩ kyʼebisando byawe.
14Kandi abamalaĩka bosĩ sĩ bĩrĩmũ ebikakolera Nyamuhanga kwehĩ? Sibetumawa na Nyamuhanga erĩwatĩkya abo abasyabana erilama kwehĩ?
Currently Selected:
Abaebrania 1: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
