Esĩterĩ 3
3
Hamanĩ akasonda erĩĩta Abayũda
1Enyũma wʼemyatsi eyĩ omwami mwatomekera obukulu bʼuku Hamanĩ, mugala wa Hamedata Omũagagĩ, mwamũhamya mo mukulu, kandi mwamuha ehamũlĩ oko banya-mwami bosĩ ababya haguma naye. 2Neryo abagombe bosĩ bʼomwami, ababya omo lũkyo lʼOmwami, mobũnama nʼerikenga Hamanĩ; kusangwa omwami iniamabihana atya busana naye. Nĩkwa Mordekayĩ mwatũnama kutse erimukenga. 3Neryo abagombe bʼomwami ababya omo lũkyo lʼOmwami, mobabwira Mordekayĩ bati, Busana nakĩ ũkahalaya Okwʼihana lyʼOmwami kwehĩ? 4Neryo omugulu babya bakabũga na Mordekayĩ ebiro byosĩ, naye mwatowabo, mobabwira Hamanĩ, erĩrebya ebĩnywa bya Mordekayĩ nga bikandihangana; kusangwa abya iniabiribwirabo kwʼali Mũyũda. 5Neryo omugulu Hamanĩ alangira ngoko Mordekayĩ sĩalĩtũnama, kutse erimukenga, neryo Hamanĩ mũsũla nʼerihitana. 6Nĩkwa mwapona erihamba Mordekayĩ ĩyowene; kusangwa ĩbabĩrĩmũmĩnyĩsya ekihanda kya Mordekayĩ; kyaleka Hamanĩ iniasonda-sonda erĩherya Abayũda bosĩ, ba bandu ba Mordekayĩ, ababya omo bwami bosĩ bwa Ahasuero.
7Neryo oko mukera wʼerĩtsũka, go mukera wa Nĩsanĩ, oko mwaka wʼerĩkũmĩ nʼeyĩbĩrĩ wʼOmwami Ahasuero, mobagusa ePũrĩ, ako ko kawira, embere sya Hamanĩ obuli kiro, nʼobuli mukera, erĩhĩka oko mukera wʼerĩkũmĩ nʼeryĩbĩrĩ, go mukera wa Adarĩ. 8Neryo Hamanĩ mwabwira omwami Ahasuero, ati, Hali kihanda kiguma kipanzikene kĩtsatsangĩre omo katĩkatĩ kʼebihanda omo bihugo byosĩ byʼobwami bwawe; nʼemigambo yabo ni gundi mũsĩndo oko yʼobuli kihanda; kutse sibekwama emigambo yʼOmwami; neryo sĩ ndũndĩ busana nʼomwami erirekabo. 9Kyamatsemesya omwami kihamulawe kiti, baherĩbawe; nage, nasyaliha esyotalanta syʼekĩtsĩpa elfu ĩkũmĩ (10,000), omo byala byʼabo abakasondola omũbĩrĩ wʼOmwami, bahĩresyo omo mbĩso yʼOmwami. 10Neryo omwami mwalũsya embũka yiwe oko byala biwe, mwahayo Hamanĩ mugala wa Hamedata Omũagagĩ, enzĩgũ yʼAbayũda. 11Nʼomwami mwabwira Hamanĩ, ati, Esyofranka wamahabwasyo, nʼabandu nibya, Ukole mubyo ngoko wanzĩre.
12Neryo abahandĩkĩ bʼomwami mobabirikirwa oko mukera wʼerĩtsũka nʼoko kiro kyʼerĩkũmĩ nʼebisatu, neryo mobyasakwa ngʼebyosĩ ebyo Hamanĩ ahamula abasondolĩ bʼomwami, nʼoko bakulu ababya oko buli kihugo, nʼoko banya-mwami bʼobuli kihanda, oko buli kihugo ngʼemisakire yakyo, nʼoko buli kihanda ngʼomũbũge wakyo; mokyasakwa omo lĩna lyʼOmwami Ahasuero, kandi mokyahĩrwa kwʼeyĩsembo yʼembũka yʼOmwami. 13Nʼesyobarua esyo mosyahabwa abakwenda eritwalasyo omo bihugo byosĩ byʼOmwami, erĩherya, nʼerĩĩta, nʼeribuga Abayũda bosĩ, abalere nʼabakulu, abana balere, nʼabakalĩ, omo kiro kiguma, kye kiro kyʼerĩkũmĩ nʼebisatu kyʼomukera wʼerĩkũmĩ nʼeyĩbĩrĩ, go mukera wʼeAdarĩ, nʼerĩhũnga ebindu byabo busana nʼobunyegwa. 14Ekĩsosekanĩo kyʼerisaka eryo, ekihamulo ekyo kihabawe obuli kihugo, mokyakangĩbwa oko bihanda byosĩ, bĩyĩtegekanaye busana nʼekiro ekyo. 15Neryo abakwenda mobagenda lũba busana nʼekihano kyʼOmwami, nʼerihamula eryo molyatũlwa eSũsa omo kikali kyʼOmwami. Neryo omwami na Hamanĩ mobĩkala busana nʼerĩlũmba; nĩkwa omũyĩ wʼeSũsa mwasũsũmana.
Currently Selected:
Esĩterĩ 3: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.