Abanya Efeso 5

Tulendere omo kyakakala

1Neryo kusangwa muli bana banze ba Nyamuhanga, mũmũgerereraye. 2Mukole ebyosĩ omo lwanzo, ngoko Kristo atwanza, kandi mwaha engebe yiwe busana netu ngʼobuhere obukakumba ndeke, ehongo eyĩkatsemesaya Nyamuhanga.

3Kusangwa muli bandu ba Nyamuhanga, simuleke obũsĩngĩrĩ, kutse ebĩtĩsĩrĩre byosĩ, kutse obururu, bikahulwa omo katĩkatĩ kenyũ. 4Kandi siritolere mukahula emyatsi eyĩkĩta esĩsonĩ, kutse ebĩnywa ebyʼobũkĩrũ kutse ebyʼerĩsekererya, nĩkwa kumbe mũkabũga ebikakenga Nyamuhanga. 5Muminye ndeke ngoko obuli mũsĩngĩrĩ, kutse omundu oyukakola ebĩtĩsĩrĩre, kutse omururu, (obururu nĩ mũsĩndo wʼerĩramya esanamu), siendisyasangira omo bwami bwa Kristo na Nyamuhanga.

6Simuleke omundu nʼomuguma erĩbatebya omo bĩnywa byʼobusa. Kusangwa busana nʼemyatsi eyĩ erihitana lya Nyamuhanga lyasyahĩka oko bandu abakayisamambula. 7Neryo simusangane nabo. 8Kera mwabya omo mwĩrĩmya, nĩkwa lino muli omo kyakakala kyʼomukama. Neryo musibe ngʼabana bʼekyakakala. 9(Kusangwa ekyakakala kikaleta emĩsĩndo yosĩ yʼebibuya, nʼebitunganene, nʼebyʼekwenene). 10Mwige eriminya ebĩkatsemesaya Omukama. 11Simusangane omo mĩbĩrĩ yʼomwĩrĩmya eyite nʼendũndĩ, nĩkwa mũhũlũkayeyo oko kyakakala. 12Kwenene nĩ ʼsonĩ erĩkanĩa emyatsi eyo bakakola omo bũbĩso-bĩso. 13Nĩkwa emyatsi yosĩ ikaminyikala omugulu ikahuluka omo kyakakala; kusangwa ekyakakala kĩkamĩnyĩsaya ndeke emyatsi yosĩ. 14Ekĩ kikaleka ĩnĩabũga ati,

Ubuke, uwe mũgotserĩ,

Ũlũbũke oko baholĩ!

Kristo asyakũkolerya.

15Neryo, mũyĩtegaye ndeke, simusibe ngʼabandu bakĩrũ, nĩkwa ngʼabandu bʼamenge. 16Sĩmũlabaye ebiro ebĩ byo buyira kusangwa omugulu ono ni mubi. 17Neryo Simubye bakĩrũ, nĩkwa mũsondaye eriiga ekyo Mukama anzĩre imwakola.

18Sĩmũkũnde omo bĩnyũ, kusangwa hali eritamira, nĩkwa mũsũle mʼOmũlĩmũ Abũyĩrĩre. 19Mũkanaye omo bĩnywa byʼewasĩngya nʼebyʼesyonyimbo nʼemirenge yʼeripipa Nyamuhanga, kandi mwimbe nʼeriyira omulenge owene busana nʼomukama omo mitima yenyũ. 20Oko migulu yosĩ nʼomo myatsi yosĩ muhe ewasĩngya uku Nyamuhanga Tata, omo lĩna lyʼomukama wetu Yesu Kristo.

Abakalĩ nʼabĩba wabo

21Kusangwa mukakenga Kristo, obuli mundu owe mũlĩkyabo.

22Abakalĩ, mowe abĩba nywe, ngoko mũkowa Omukama. 23Kusangwa omulume awite ehamũlĩ oko mũkalĩ wuwe, ngoko Kristo awite ehamũlĩ oko kanĩsa. Kandi Kristo nĩ mũlamya wʼekanĩsa omubiri wuwe. 24Neryo ngoko ekanĩsa ĩkowa Kristo, litolere abakalĩ ĩbowa abĩba wabo omo myatsi yosĩ.

25Nenyũ abĩba, mwanze abakalĩ benyũ, ngoko Kristo mwanza ekanĩsa. Kusangwa Kristo mwayiha busana nʼekanĩsa, 26iniatoka erihigulayo nʼerĩeryayo ĩnĩamabĩlabyayo omo magetsi, kye kĩnywa kiwe. 27Ati, iniatoka eriyiretera ekanĩsa omo bubuya bwayo, isiyiwite ekĩtĩngũ kutse omũkũnyo kutse ekindi kiri ngʼekyo; nĩkwa ati, ibye ĩbũyĩrĩre butsira bulema. 28Litya abĩba ko banze abakalĩ babo bo batya ngoko bakanza emibiri yabo. Oyukanza omũkalĩ wuwe akayanza. 29Kusangwa sihali mundu na kera Oyũkakwa omubiri wuwe gʼobusu, nĩkwa akahago akalyo nʼerĩsũgago, ngoko Kristo akakola busana nʼekanĩsa. 30Netu ekanĩsa, tuli bĩtsũko byʼomubiri wuwe. 31Ngoko kĩsakĩre kiti, Busana nʼomwatsi oyu omundu asyasĩganĩa ĩse na nyĩnya, asyalanda oko mũkalĩ wuwe, nʼababiri abo basyabya muguma. 32Hano hali erĩkũmbo lĩnene; nĩkwa ngahula Kristo nʼekanĩsa. 33Nenyũ nibya, obuli mundu omo katĩkatĩ kenyũ anze mũkalĩwe ngoko akayanza ĩyowene; nʼomũkalĩ naye akenge ĩba wuwe.

Currently Selected:

Abanya Efeso 5: KB80

Highlight

Copy

Compare