Emĩbĩrĩ 18

Paũlo eKorĩnto

1Enyũma wʼemyatsi eyĩ Paũlo mwalũa eAtene, mwaya eKorĩnto. 2Neryo mweyayo Omũyũda muguma, erĩna liwe iyo Akwĩla, omundu wʼePonto, oyo walũa eĨtalĩa oko mugulu oyo haguma na mũkalĩwe, Pĩrĩsĩla. Kusangwa Omũtabalĩ mukulu ye Klaũdĩo abya iniabirihana ati Abayũda bosĩ balũe eRoma. Neryo Paũlo mwayabanabo, 3mwĩkala nabo, nʼerikola omũbĩrĩ haguma nabo, kusangwa abosĩ babya balũkĩ bʼamahema. 4Nĩkwa Paũlo abya akakanĩrya omo nyũmba yʼerĩhĩndanamo omo buli Sabato, iniakalenga eribindula Abayũda nʼAbagĩrĩkĩ.

5Omugulu Sila na Tĩmoteo bahĩka eMakedonĩa, Paũlo mwasiba omugulu gosĩ akatũla Engulu Yowene, ĩnĩakatũlĩrago Abayũda ati, Yesu ni Kristo. 6Nĩkwa omugulu balwa naye nʼeritsuma, Paũlo mwakungutirabo esyongimba siwe ati, Omusasi wenyũ abye oko mitwe yenyũ! Sindi ko lubanza lwenyũ. Erĩtsũka lino ngaya oko Bihanda. 7Neryo mwalũa kubo, mwaya omo nyũmba yʼomundu muguma oyukahulawa mo Tĩto Yũsto, oyũkaramaya Nyamuhanga, nʼenyũmba yiwe yabya ĩyĩhererenĩe nʼenyũmba yʼerĩhĩndanamo. 8Neryo Krĩspo, omukulu wʼenyũmba yʼerĩhĩndanamo, mwĩkĩrĩrya Omukama, haguma nʼabʼenyũmba yiwe bosĩ. Kandi Abanya Korĩnto bangi babere bowa Paũlo, mobĩkĩrĩrya, mobabatĩsĩbwa.

9Kandi Omukama mwabũga na Paũlo omo kiro omwʼilota ati, Sigubahe, nĩkwa ũbũge, subye bũkũtũ. 10Kusangwa indi haguma nawe. Sihali mundu oyo wasyakubambira, nʼerikukola nabi, kandi ngwite bandu bangi omo mũyĩ oyũ. 11Neryo Paũlo mwĩkalayo mwaka muguma nʼemikera ndatu, ĩnĩakakangĩrĩraya abandu ekĩnywa kya Nyamuhanga.

12Nĩkwa omugulu Galĩo abya mũtabalĩ wʼAbaroma omo kihugo kyʼAbagĩrĩkĩ, Abayũda mobaya embĩta yʼeribambira Paũlo nʼerimutwala omo nyũmba yʼolubanza. 13Abayũda abo mobabũga bati, Omundu oyũ akabindula bandu erĩramya Nyamuhanga omo mũsĩndo owate oko Migambo. 14Nĩkwa Paũlo abere akasonda eritonda, neryo Galĩo mwabwira Abayũda ati, Ĩnywe Bayũda kumbe omwatsi oyũ alwe wʼerikola nabi kutse ekibi kĩkalĩre, lyangatolere ĩnabowa. 15Nĩkwa kumbe ni mwatsi busana nʼebĩnywa nʼamena omo migambo yenyũ, mũtwebyo ĩnywebene. Sĩnangalĩga eribya mũtswerĩ wʼemyatsi eyĩ! 16Neryo Galĩo mwahigabo omo nyũmba yʼolubanza. 17Neryo abosĩ mobatsimba Sosĩtenĩ, omukulu wʼenyũmba yʼerĩhĩndanamo, mobatsũka erĩmũswĩrĩrya emuliro wʼekĩtũmbĩ kyʼolubanza. Kandi Galĩo mwatatsomana emyatsi eyĩ, nʼahake.

Paũlo na Sila bakasuba eAntĩokĩa

18Neryo Paũlo mwĩkala eKorĩnto yo biro bingi. Neryo mwalagana nʼabalĩkyetu, mwasokera eSũrĩa omo bwato, haguma na Pĩrĩsĩla na Akwĩla. Neryo eKenkũrĩa Paũlo mwasĩswa, kusangwa abya akaberererya erĩlahĩrya liwe. 19Neryo mobahĩka eEfeso, nĩkwa mwasĩgayo Pĩrĩsĩla na Akwĩla. Kandi mwingira omo nyũmba yʼerĩhĩndanamo, nʼerĩkanĩa nʼAbayũda. 20Kandi Abayũda mobamũbũlya bati ĩkale nabo ebindi biro, nĩkwa mwatalĩga. 21Nĩkwa mwalagana nabo ati, Nasyaswasa kandi ũkwʼĩnywe, Nyamuhanga amanza. Neryo mwalũa eEfeso omo bwato.

22Neryo Paũlo abere ahĩka eKaĩsarĩa, mwaya eYerũsalema erĩkerya ekanĩsa, neryo mwandagalira eAntĩokĩa. 23Neryo abere abĩkalayo katambĩ, mwalũayo. Kandi mwalaba omo bihugo byʼeGalatĩa nʼeFũrĩgĩa, mĩraya abiga bosĩ.

Apolo oko mũyĩ wʼeEfeso nʼeKorĩnto

24Neryo Omũyũda muguma erĩna liwe iyo Apolo oyo wabutawa eAlũsandũrĩa, mwahĩka eEfeso. Apolo abya mundu oyo wasĩ erĩbũga ndeke-ndeke, kandi abya asĩ kutsibu emyatsi yʼAmasako. 25Abya ĩnĩabĩrĩkangĩrĩrĩbwa omo nzira yʼomukama, kandi ĩnĩakwĩre omũhwa wʼerĩbũga nʼerĩkangĩrĩrya ndeke emyatsi ya Yesu. Nĩkwa abya asĩ olũbatĩso lwa Yoane lusa. 26Neryo mwatsũka erĩbũga butsira eriubaha omo nyũmba yʼerĩhĩndanamo. Nĩkwa Pĩrĩsĩla na Akwĩla babere bamowa, mobagenda haguma naye, mobamũkũmbũlĩra enzira ya Nyamuhanga yo ndeke-ndeke. 27Neryo Apolo mwasonda erisokera omo kihugo kyʼAbagĩrĩkĩ. Nĩkwa abalĩkyetu bʼeEfeso mobasakira abiga bʼeyo bati bamũkokaye. Neryo abere ahĩkayo, mwawatĩkya kutsibu abĩkĩrĩraya olukogo lwa Nyamuhanga. 28Kusangwa Apolo mwasĩnga Abayũda bo kutsibu embere syʼabandu, ĩnĩakakangayabo omo Masako Yesu kwʼali Kristo.

Currently Selected:

Emĩbĩrĩ 18: KB80

Highlight

Copy