Emĩbĩrĩ 16

Tĩmoteo akagenda haguma na Paũlo na Sila

1Neryo Paũlo mwalaba eDerbe nʼeLĩstra. Nĩkwa eyo habya omwiga muguma erĩna liwe iyo Tĩmoteo. Nyĩnya wuwe abya Mũyũda oyo Wĩkĩrĩrye, nĩkwa ĩse wuwe abya Mũgĩrĩkĩ. 2Tĩmoteo abya asĩmĩrwe ndeke nʼabalĩkyetu bosĩ bʼeDerbe nʼeLĩstra. 3Paũlo abya anzĩre Tĩmoteo iniagenda haguma naye, neryo mwamũbanĩa busana nʼAbayũda ababya omo bihugo byʼeyo, kusangwa abosĩ babya basĩ kwʼĨse wuwe nĩ Mũgĩrĩkĩ. 4Neryo omugulu babya bakalaba omo mĩyĩ eyo, mobabwira abiga bʼeyo bʼemyatsi eyo bakwenda nʼabakulu bʼeYerũsalema basoha, bati bakwameyo. 5Litya esyokanĩsa mosyabana amaka omwʼĩkĩrĩrya, nʼeriganza lyabo molyakanya obuli kiro.

Paũlo akalota esyonzolĩ eTroa

6Nĩkwa mobalaba omo bihugo byʼeFũrũgĩa nʼeGalatĩa. Kandi Omũlĩmũ Abũyĩrĩre mwakagabo erĩtũla omwatsi eAsĩa. 7Neryo mugulu bahĩka eMĩsĩa, mobalenga eriya eBĩtĩnĩa, nĩkwa Omũlĩmũ wa Yesu mwatalĩgĩrabo. 8Neryo mobatwangana eMĩsĩa, mobahĩka eTroa. 9Nĩkwa Paũlo mwalota esyonzolĩ syʼomo kiro. Omundu wʼeMakedonĩa iniahangene akamuhatikana ati, Usokere eMakedonĩa ũtũwatĩkaye! 10Neryo Paũlo abere abilola oko nzolĩ esyo, neryo-neryo motwasonda eriya eMakedonĩa, itwamabiminya ko Nyamuhanga abirimbirikira erĩtũla Engulu Yowene oko bandu bayo.

EFĩlĩpĩ. Erilama lya Lũdĩa

11Kandi motwalũa eTroa omo bwato, motwagenda omo nzira itunganene erĩhĩka eSamotĩrake, nʼengyakya motwahĩka eNeapolĩ. 12Nʼerĩlũa eyo motwahĩka eFĩlĩpĩ, omo mũyĩ munene wʼekihugo kyʼeMakedonĩa. Ni kihugo kyʼAbaroma. Nĩkwa motwasiba omo mũyĩ oyo mwʼebindi biro. 13Nʼoko kiro kyʼeSabato motwalũa omo mũyĩ motwaya oko mũsĩke wʼolũsĩ, ĩtũkaganĩraya nga hane ahʼerisabira. Neryo motwĩkala ahisi, nʼerĩtsũka erĩbũga nʼabakalĩ ababya bahĩndeneho. 14Neryo omũkalĩ muguma oyo wabya akahulikirira, abya Lũdĩa wʼomũyĩ wʼeTuatira. Naye abya mũtũndĩ wʼesyongimba syʼengula. Abya mũkalĩ oyũkaramaya Nyamuhaga, neryo Omukama mwamwĩbũkya omo mutima wuwe erĩowa emyatsi eyo Paũlo abũga. 15Neryo Lũdĩa nʼabandu bʼenyũmba yiwe mobabatĩsĩbwa. Neryo mwatubirikira ati, Mwamaganĩrya muti nabĩrĩkĩrĩrya Omukama, mwase omo nyũmba yage mwĩkale. Mwatuhatikana, neryo motwingira.

Omo mũlĩkĩ eFĩlĩpĩ

16Neryo ekiro kiguma twabere tukaya ahʼerisabira, omwana-muto mugombe muguma oyo wabya kwʼekĩrĩmũ kibi kyʼerilagula, mwahĩndana netu. Omwana muto oyo abya akaletera abakama buwe bʼendũndĩ nene busana nʼerilagula. 17Neryo omwana-muto oyo mwatukwama tuna Paũlo iniakabirikira ati, Abandu aba ni bagombe ba Nyamuhanga Wʼendata Kutsibu! Bakabatũlĩra enzira yʼerilama! 18Naye mwakola atya ebiro bingi. Nĩkwa Paũlo mwasĩrĩkalira kutsibu, neryo mwakeba mwabũga nʼekĩrĩmũ ekyo ati, Ngakuhana omo lĩna lya Yesu Kristo ũmũlũeko! Neryo mokyamũlũako oko saa eyo nyisa-nyisa. 19Nĩkwa omugulu abakama buwe balangira kwʼamaha wʼendũndĩ yabo abirihwaho, mobatsimba Paũlo na Sila mobakurirabo embere syʼabatabalĩ omo katale. 20Neryo mobaletabo embere wʼabatswerĩ bakulu bati, Abandu aba nĩ Bayũda kandi bakatsandaya omũyĩ wetu. 21Kandi bakakangĩrĩraya emitsye eyite omo migambo yetu. Ĩtwe tuli Baroma, sitwetoka erĩrĩga kutse erikwama emitsye eyĩ. 22Nʼendeko moyahangana haguma erilwa nabo. Neryo abatswerĩ bakulu mobalũsya esyongimba sya Paũlo na Sila, kandi mobahana bati baswĩrĩbawe omo myũtso. 23Neryo babere babĩhũnzabo kutsibu, mobagusabo omo mũlĩkĩ, nʼeritegeka omũteya erĩteyabo ndeke. 24Neryo omũteya abere abĩowa erihana erĩ, mwagusabo omo kyumba kyʼomwisi wʼenyũmba yʼomũlĩkĩ, kandi, mwabohera ebisando byabo omo katĩkatĩ kʼemiti ĩbĩrĩ.

25Nĩkwa omo katĩ kanene, Paũlo na Sila babya bakasaba nʼeriimba esyonyimbo syʼeripipa Nyamuhanga, nʼabandu bʼomũlĩkĩ mobahulikirirabo. 26Neryoneryo mohabya omũsĩkĩ munene, kyaleka ebibanza byʼenyũmba yʼomũlĩkĩ ibyatenga-tengana. Neryo-neryo esyonyũyĩ syosĩ mosyakingukala, nʼamahulula wʼobuli mundu mwakũndũkala. 27Kandi omũteya mwabuka omo tũgotserĩ, neryo abere alangira esyonyũyĩ syʼenyũmba yʼomũlĩkĩ isyabirikingulwa mwaganĩrya ati abʼomũlĩkĩ babiritibita, neryo mwakula omũyalĩ wuwe ati akayĩta. 28Nĩkwa Paũlo mwamubirikira ati, Suyikole nabi kusangwa ĩtwe bosĩ tune hano! 29Neryo omũteya mwatumira oko syotala, mwingira omo nyũmba yʼomũlĩkĩ akatitimana nʼeriubaha, mwatũlama embere wa Paũlo na Sila. 30Neryo mwaletabo eyĩhya, mwabũlya ati, Bakama, litolere ĩnakolakĩ inatoka erĩlamĩbwa kwehĩ? 31Nabo mobabũga bati, Wĩkĩrĩraye Omukama Yesu, wasyalamĩbwa uwe nʼenyũmba yawe. 32Kandi mobamũkangĩrĩrya ekĩnywa kyʼomukama, haguma nʼabosĩ ababya omo nyũmba yiwe. 33Neryo oko saa eyo yʼekiro, omũteya oyo mwĩmya Paũlo na Sila, mwerya ebironda byabo, neryoneryo mwabatĩsĩbwa, iye nʼekĩtũnga kiwe kyosĩ. 34Neryo mwatwalabo omo nyũmba yiwe, mwahabo akalyo kʼerirya. Neryo iye nʼabandu bʼenyũmba yiwe mobatsema kutsibu, ĩbamabĩkĩrĩrya Nyamuhanga.

35Neryo engyakya, abatswerĩ bakulu mobatuma abapolĩsĩ babo bati, Mũlwĩke abandu abo. 36Neryo mũteya mwabwira Paũlo ebĩnywa ebĩ ati, Abatswerĩ bakulu bamatuma bati mũlwĩkawe. Neryo lino muhuluke mugende buholo. 37Nĩkwa Paũlo mwabwirabo ati, Babĩrĩtũswĩrĩrya embere syʼabandu, isitulitwatonda. Kandi ĩtwe tuli Baroma! Kandi babiritugusa omo mũlĩkĩ. Na lino bakasonda erituhiga bũbĩso-bĩso kwehĩ? Lero iyihi! Nĩkwa base ĩbobene-bene batũlũsayemo. 38Neryo abapolĩsĩ mobayatũlĩra abatswerĩ bakulu bʼebĩnywa ebĩ. Nabo mobubaha omugulu bowa ko Paũlo na Sila ni Baroma. 39Neryo mobasa mobalemba-lemba Paũlo na Sila eribuyirabo, neryo babere balũsyabo omo mũlĩkĩ, mobasababo bati balũe oko mũyĩ. 40Neryo Paũlo na Sila mobalũa omo nyũmba yʼomũlĩkĩ, mobingira omo nyũmba ya Lũdĩa. Neryo babere balangira abalĩkyetu, mobasĩkyabo, mobagenda.

Currently Selected:

Emĩbĩrĩ 16: KB80

Highlight

Copy