2 Abanya Korĩnto 3

Abagombe bʼendagane nyihya-nyihya

1Tũkatsũka kandi erĩyĩmĩnyĩsya ũkwʼĩnywe ngʼabandu babuya kwehĩ? Kutse litolere, ngʼabandi, tukabana esyobarua syʼerĩtũsĩma embere syenyũ, kutse esyobarua esĩkalũa ewenyũ kwehĩ? 2Ĩnywe muli barua yetu, eyĩsakĩre omo mitima yetu, abandu bosĩ batoke eriminyayo nʼerisomayo. 3Kandi mukaminyikala ko muli barua eyo Kristo asaka, netu tukatwalayo. Kandi ebarua eyĩ sĩsakĩre omo bwĩno, nĩkwa ĩsakĩre nʼOmũlĩmũ wa Nyamuhanga oyuliho. Kandi sĩyĩsakĩre oko bisayi byʼamabwe, nĩkwa ĩsakĩre oko mitima yʼabandu.

4Tũkabũga tutya kusangwa Kristo akatuha eriyiketera Nyamuhanga. 5Ĩtwe bene situliyiganza nga twangatoka erikola kindu, nĩkwa eritoka lyetu lĩkalũa uku Nyamuhanga, 6oyukaleka itwatoka omũbĩrĩ wʼendagane nyihya-nyihya. Endagane nyihya-nyihya eyĩ si yʼemigambo eyĩsakĩre, nĩkwa nĩ yʼOmũlĩmũ, kusangwa emigambo eyĩsakĩre ĩkĩta, nʼOmũlĩmũ akaha engebe.

7Emigambo yabya ĩbatsĩre oko bisayi byʼamabwe, kandi yahabawa omo lukengerwa lwa Nyamuhanga. Neryo abana ba Ĩsraelĩ mobataluka erisamalira obũsũ bwa Musa busana nʼolukengerwa lyʼobũsũ buwe, olwabya lukakeha. Neryo omwatsi wʼemigambo eyikaleta oluholo mwahĩka omo lukengerwa lungaha, 8nĩkwa omwatsi wʼOmũlĩmũ sialireta olukengerwa lunene kwilaba aho kwehĩ? 9Kusangwa omwatsi wʼomũbĩrĩ wʼemigambo owakasĩnga omundu abya nʼolukengerwa, neryo omũbĩrĩ wʼomwatsi owakayira omundu mo mutunganene alabĩre kutsibu omo lukengerwa. 10Kusangwa omwatsi owabya nʼolukengerwa erĩmbere, lino ali nga siawite olukengerwa, wamalĩngĩrĩranĩalo nʼolukengerwa olũlabĩre lino. 11Kusangwa ekikakeha kyamabya nʼolukengerwa, ekĩkasĩgala kiwite olukengerwa kwilaba aho.

12Neryo kusangwa tuwite amaha aya, tuwite obulume-lume ndeke. 13Situli nga Musa oyo wahĩra akakimba oko bũsũ buwe, abana ba Ĩsraelĩ sibalangire erĩkangabasanĩa eryabya likakeha, nʼerihwa. 14Nĩkwa amalengekanĩa wabo abya akalĩre; nʼerĩhĩka mũnabwĩre ekitambara ekyo kikinaswika amalengekanĩa wabo omugulu bakasoma erilagana lya kera. Kusangwa ekitambara ekyo kĩkalũsĩbawa omugulu omundu akamatikana na Kristo. 15Kandi mũnabwĩre omugulu bakasoma ekitabu kya Musa, ekitambara ekyo kikaswika amalengekanĩa wabo. 16Nĩkwa kĩsakĩre kiti, Akakimba ka Musa mokalũsĩbwaho omugulu abya akabindukira Omukama. 17Nĩkwa Omukama oyo nĩ Mũlĩmũ; kandi aho Mũlĩmũ wʼOmukama ali, ho hali obwĩranda. 18Neryo kusangwa situwite ekitambara oko bũsũ bwetu, tũkakanganaya ngʼomo kiyo olukengerwa lwʼOmukama. Kandi busana nʼolukengerwa luwe tũkahĩndũkĩbawa omo kĩsosekanĩo kiwe omo lukengerwa luwe, kusangwa lũkalũa oko Mukama oyuli Mũlĩmũ.

Currently Selected:

2 Abanya Korĩnto 3: KB80

Highlight

Copy

Compare