2 Abanya Korĩnto 1

1Ingye Paũlo, omukwenda wa Kristo Yesu, omwʼisonda lya Nyamuhanga, haguma nʼomũlĩkyetu Tĩmoteo, tukabasakira ĩnywe kanĩsa ya Nyamuhanga eyiri eKorĩnto haguma nʼabandu bosĩ ba Nyamuhanga abali ehosĩ eAkaya.

2Nyamuhanga Tata wetu nʼomukama Yesu Kristo babahe olukogo nʼobuholo.

Paũlo akaha ewasĩngya uku Nyamuhanga

3Nyamuhanga apipawe, ye Tata wʼOmukama wetu Yesu Kristo, ye Tata wʼeriganyira, na Nyamuhanga wʼerĩkĩranĩa lyosĩ. 4Ni iye yũkatũkĩranaya omo malĩge wetu gosĩ, netu tutoke erĩkĩranĩa abali omo malĩge wʼemĩsĩndo yosĩ. Kusangwa tũkakĩranayabo omwʼĩsĩkĩbwa eryo Nyamuhanga akatũkĩranayamo netu. 5Kusangwa ngoko tukasangira amalĩge mangi wa Kristo, litya tukasangira omwisi wa Kristo erĩkĩranĩa liwe lĩnene. 6Nĩkwa twamagalwa ni busana nʼerĩbakĩranĩa nʼerĩbalamya. Kandi twamakĩranĩbwa nenyũ mũkakĩranĩbawa, nʼerihabwa amaka erĩyĩyĩnĩa nʼeriyibombeka omo malĩge ago tukagalawamo netu. 7Neryo amaha wetu busana nenyũ asĩkĩre, ĩtũnasĩ ngoko mukasangira amalĩge wetu, ko mukasangira mutya erĩkĩranĩa lyetu.

8Kusangwa balĩkyetu, sĩtwanzĩre mukabya butaminya amalĩge wetu ago twabana eAsĩa. Nĩkwa motwagalwa kutsibu kwilaba obũtokĩ bwetu, kyaleka itwabula amaha wʼeribyaho, tuti tukandihola. 9Nĩkwa twabya nga tukandihola, itwatoka eritindayiketera twe ĩtwebene-bene, nĩkwa eriyiketera Nyamuhanga oyũkalũbũkaya abaholĩ. 10Kandi mwatũlamya oko bwĩko bosĩ bwʼoluholo, kandi asyatũlamya kubo; kandi tuli nʼamaha kwʼakandĩsyatũlamya kandi, 11omugulu mukatũwatĩkaya omwʼisaba lyenyũ. Neryo abandu bangi abakasaba busana netu batoke eriha Nyamuhanga ewasĩngya busana nʼerĩwatĩkya liwe.

Paũlo akabindula olugendo luwe

12Kusangwa tukayihalamba omo mwatsi oyũ: tuti Obunya-mutima bwetu bũkatũlago buti, tukayitwala omo kihugo, kandi omo katĩkatĩ kenyũ, omo myatsi mibuya nʼeyʼekwenene embere sya Nyamuhanga, kandi tukayitwala omo lukogo lwa Nyamuhanga butsira omo menge wʼabandu. 13Kusangwa ebyo tukabasakira bye nʼebyo mukatoka erisoma nʼeriminya, kandi tuli nʼamaha ko mwasyaminya ndeke-ndeke. 14Emyatsi eyo mwabiriminya hake-hake lino, imwatoka eriyihalamba busana netu, netu itwayihalamba busana nenyũ oko Kiro kyʼomukama wetu Yesu.

15Busana nʼeriyiketera omwatsi oyũ, nabya nyanzĩre erĩbahĩkako erĩmbere, imwatoka eribana omũyĩsa go kabiri. 16Kusangwa nyiti nabya nyanzĩre erilaba ewenyũ omo lugendo lwage lwʼeriya eMakedonĩa, kandi eriswalaba ewenyũ omugulu ngalũa eMakedonĩa, imwatoka erĩnyĩwatĩkya omo lugendo lwage lwʼeriya eYũdea. 17Neryo omugulu nasonda erikola litya, nabya mundu oyukakola litya-litya kwehĩ? Kutse ekyo ngasonda erikola ngakolakyo ngʼomundu nyiti ega ega, kandi iyihi, iyihi, oko saa nguma kwehĩ? 18Nĩkwa ngoko Nyamuhanga sialiregula, ekĩnywa kyetu busana nenyũ mokitetabya ega, kandi iyihi. 19Kusangwa Kristo Yesu Omugala wa Nyamuhanga, oyo twabatũlĩra omo katĩkatĩ kenyũ, ĩngye, na Sĩlvano, na Tĩmoteo, iye si inga, kandi iyihi, nĩkwa iye ni Ega. 20Kusangwa ni iye oyuli Ega busana nʼerilaga lyosĩ lya Nyamuhanga. Neryo busana na Yesu Kristo tukaha eAmina yetu, oko lukengerwa lwa Nyamuhanga. 21Kusangwa ni Nyamuhanga oyũkatũhanganaya haguma nenyũ omo ngebe yetu, erimatikana na Kristo, kandi Nyamuhanga yukatuhigula. 22Naye abĩrĩtũhĩra kwʼekĩmĩnyĩsyo kiwe, nʼerituha Omũlĩmũ wuwe omo mitima yetu ngʼomuwato.

23Nĩkwa ngabirikira Nyamuhanga ngʼomũlangĩrĩ wage, iye anasĩ omutima wage, nyiti, busana nʼerĩbabalya kyaleka ĩndahĩka eKorĩnto. 24Sĩtwanzĩre eritabala okwʼĩkĩrĩrya lyenyũ. Nĩkwa twanzĩre erikola haguma nenyũ, nʼeribaha obutseme; kusangwa mukahangana ndeke omwʼĩkĩrĩrya lyenyũ.

Currently Selected:

2 Abanya Korĩnto 1: KB80

Highlight

Copy

Compare