1 Tĩmoteo 6

1Abakobe bosĩ baganze abakama babo ngʼabandu batolere erĩsĩkya lyosĩ, neryo erĩna lya Nyamuhanga nʼerĩkangĩrĩrya lyetu sibitsumawe. 2Kandi abawite abakama Bakristo sibaponebo, kusangwa nĩ balĩkyabo. Nĩkwa, litolere ibakolerabo ndeke kwilaba, kusangwa abakabana omugaso wʼomũbĩrĩ wabo ni Bakristo abanzĩre.

Erĩkangĩrĩrya lyʼamabehĩ nʼobuteke bwʼekwenene

Ũkangĩrĩraye nʼerihana emyatsi eyĩ. 3Omundu amaleta erĩkangĩrĩrya lyʼogundi mũsĩndo, ĩsĩalĩrĩga ebĩnywa byʼekwenene byʼomukama wetu Yesu Kristo, kutse erĩkangĩrĩrya erĩkakenga Nyamuhanga, 4omundu oyũ awite omutwe munene, ĩsĩasĩkĩ.

Kandi awite omutima wʼobuhaka, nʼerinegena omo bĩnywa, ebikaleta obũha, nʼerigabana, nʼebĩtsũmĩ, nʼerĩganĩrya ibi. 5Kandi bikaleta erinegena omo katĩkatĩ kʼabandu bʼobũlengekanĩa obũtsandĩre, isibakiwite omwatsi wʼekwenene. Bakaganĩraya bati, erikenga Nyamuhanga likaleta endũndĩ yʼebindu.

6Nĩkwa erikenga Nyamuhanga likaleta endũndĩ nene, omundu amabya akatsemera ebyo awite. 7Kusangwa motutasa nʼekindu omo kihugo, kandi sitwendisyatoka eritwala kindu, twalũamo. 8Neryo twamabya nʼakalyo nʼekyʼeriyiswika, tutsemere ebyo. 9Nĩkwa abakayĩtsũtsa eribya bateke bakawa omwʼirengwako, nʼerihambwa omo kitego kyʼesyongumbu nyingi nyĩkĩrũ, esĩkagalaya. Esyongumbu esĩ sĩkatsandaya bandu nʼerĩheryabo. 10Kusangwa erianza ebindu likaleta emĩsĩndo yosĩ yʼebibi. Abandi bandu abakasimbirirabyo babirireka erĩkĩrĩrya, babĩrĩyita omo malĩge mangi.

Eritegeka Tĩmoteo

11Nĩkwa uwe, mundu wa Nyamuhanga, Usage emyatsi yosĩ eyĩ, ukwamirire eritunganene, erikenga Nyamuhanga, erĩkĩrĩrya, olwanzo, erĩsĩka, erihehera. 12Uyitsinge omo malwa owene wʼerĩkĩrĩrya, kandi uhambe ndeke engebe yʼerikota eyo Nyamuhanga akubirikirira. Kandi mowakangya ndeke erĩkĩrĩrya lyawe embere syʼabalangĩrĩ bangi. 13Ngakuhana embere sya Nyamuhanga, oyukaha engebe oko byosĩ, kandi embere sya Kristo Yesu, oyo wakanganaya ndeke embere sya Ponto Pilato. 14Ngakuhana nyiti, ũtegaye amategeko aya butsira kahinira kutse erigusa, erĩhĩka oko Kiro kyʼeributuka lyʼomukama wetu Yesu Kristo. 15Nyamuhanga asyaleta eributuka eryo oko mugulu atolere. Nyamuhanga nĩ mũtabalĩ ĩyowene, oyukapipawa, ni Mwami wʼabami, ni Mukama wʼabakama. 16Iye ĩyowene yukakota; kandi ĩkere omo kyakakala ekite kyangahĩkwamo. Sihali mundu oyo wabirimulolako, kandi sihali mundu wangatoka erimulolako. Erĩsĩkya nʼobũtokĩ bwa kera na kera bibye ukwʼiye, Amina.

17Uhane abateke abʼebindu bʼekihugo kino sibayiheke, kutse erĩhĩra amaha wabo oko bindu ebyangahwaho. Nĩkwa bahĩre amaha wabo uku Nyamuhanga oyukatuha ndeke-ndeke ebindu byosĩ eritsemerabyo. 18Kandi uhanebo uti, bakole ebibuya, babye abateke omo mikolere yowene bahĩtaye ndeke, kandi basangire ebindu byabo nʼabandi. 19Litya basyayibikira obuteke obwasyawatĩkyabo omo mugulu owakandisyasa.

Neryo basyabana engebe eyiri ngebe kũndũ.

20Uwe Tĩmoteo, ũtegaye ndeke ebyo wabirihabwa eribika. Usage ebĩnywa bitya-bitya ebitekenga Nyamuhanga nʼobuhaka bũkĩrũ bʼomwatsi owakahulawa nabi mo menge. 21Abandi bakabũga bati babiribana amenge ayo, nĩkwa babiritala nʼerireka erĩkĩrĩrya.

Olukogo lwa Nyamuhanga lubye nenyũ.

Currently Selected:

1 Tĩmoteo 6: KB80

Highlight

Copy

Compare