1 Abanya Tesalonĩka 5
5
Mubye ĩmũnasĩkĩre busana nʼerĩhĩka lyʼomukama
1Balĩkyetu, sihali bwaga bwʼeribasakira ebarua erĩbowĩsya omwatsi wʼemigulu kutse esyondambĩ syʼemyatsi eyĩ. 2Kusangwa nenyũ mũnasĩ ndeke-ndeke kwʼekiro kyʼomukama kyasyasa ngʼomũrahĩ oyukasa omo kiro. 3Omugulu abandu bakabũga bati, Hali Obuholo nʼerĩyĩsyandira, neryo-neryo eritogota lyasyĩtabo! Nabo sibendisyabala nʼahake, lyasyahĩka ngʼerikunda erĩkahĩka oko mũkalĩ. 4Nĩkwa ĩnywe balĩkyetu, Simuli omo mwĩrĩmya, nʼekiro ekyo sĩkyangabahĩkako ngʼomũrahĩ. 5Kusangwa ĩnywe bosĩ muli bana bʼekyakakala, kandi muli bana bʼeritungi. Situli bʼekiro kutse abʼomwĩrĩmya. 6Neryo situbye tukagotsera ngʼabandi ko bakakola; nĩkwa tubye ĩtũnalolĩre ĩtũnemũteya. 7Abakayato bakayato omo kiro, kandi abakakũnda bakakũnda omo kiro. 8Nĩkwa tuli bandu bʼeritungi, tubye tũkateya. Twambale erĩkĩrĩrya nʼolwanzo ngʼobupa bwʼekĩkũba, kandi mwambale akakĩra kʼamaha wʼomulamo. 9Kusangwa Nyamuhanga mwatatũhĩra busana nʼerihitana liwe, nĩkwa tubane omulamo busana nʼOmukama wetu Yesu Kristo, 10Oyo watuholera itwatoka eribyaho haguma naye, kutse twamabya tũnalolĩre kutse twamabya twabirihola. 11Neryo mũsĩbĩkanaye, nʼerihĩmbana, ngoko mukanakola.
Ebihano nʼerĩkeranĩa
12Tukabasaba, balĩkyetu, tuti mũsĩme abakakola kutsibu omo katĩkatĩ kenyũ, abo Mukama abiriyisoga eribasondola nʼeribahana. 13Mukengebo kutsibu-tsibu omo lwanzo busana nʼomũbĩrĩ wabo, Mubye nʼobuholo omo katĩkatĩ kenyũ.
14Kandi tukabalemba-lemba, balĩkyetu, tuti muhane abakagala-ganda, mũhamĩraye abʼomutima owasĩkerere, mũwatĩkaye abandu bosĩ, mubye nʼomutima wʼeriyibombeka busana nʼabandu bosĩ. 15Mũlebaye ndeke Sihabye mundu Oyũkatũhũlaya ekibi oko kibi, nĩkwa mulenge erikolerana ebibuya, kandi mukole ebibuya oko bandu bosĩ.
16Mutseme emigulu yosĩ. 17Musabe butsira erĩũmbya. 18Muhe ewasĩngya omo myatsi yosĩ; kusangwa ni ʼsonda lya Nyamuhanga busana nenyũ, ĩnywe mumatikene na Kristo Yesu.
19Sĩmũkũba-kũbanaye Omũlĩmũ Abũyĩrĩre. 20Simupone erĩtũlago erĩkalũa uku Nyamuhanga. 21Nĩkwa mulenge emyatsi yosĩ; muhambane nʼebibuya, 22nʼerisaga obuli mũsĩndo wʼekibi.
23Neryo Nyamuhanga oyukaha Obuholo, iye abahigule ĩmwahĩkana. Kandi abategaye omo kĩrĩmũ kyenyũ, nʼomutima wenyũ, nʼomubiri wenyũ, imwabya butsira kahinira okwʼĩhĩka lyʼomukama wetu Yesu Kristo. 24Oyukababirikira sialiregula, neryo akandisyakola atya.
25Balĩkyetu, mutusabire netu.
26Mũkeraye abalĩkyetu bosĩ, nʼeriwanako lĩbũyĩrĩre.
27Ngababwira omo hamũlĩ yʼomukama, nyiti, ebarua eyĩ isomawe oko balĩkyetu bosĩ.
28Olukogo lwʼOmukama wetu Yesu Kristo lubye nenyũ.
Currently Selected:
1 Abanya Tesalonĩka 5: KB80
Highlight
Copy
Compare
Share
Want to have your highlights saved across all your devices? Sign up or sign in
Bible in Kinandi © Bible Society of the Democratic Republic of Congo, and Bible Society of Uganda, 1980.
