1 Yoane 5

Erĩkĩrĩrya lyetu lĩkakĩnda ekihugo

1Oyũkĩkĩrĩraya Yesu kwʼali Kristo, Nyamuhanga abirimubuta, nʼoyo wanzĩre ĩse anzĩre nʼomwana wuwe. 2Tũnasĩ ko twanzĩre abana ba Nyamuhanga, Ũmwʼekĩ tuti, Tukanza Nyamuhanga nʼerikola ebihano biwe. 3Kusangwa erianza Nyamuhanga ni ʼkwama ebihano biwe, kandi ebihano biwe sĩbĩkalĩre. 4Kusangwa oyũbũtĩrwe na Nyamuhanga akakĩnda ekihugo. Neryo erĩkĩrĩrya lyetu lyo lyabĩrĩkĩnda ekihugo. 5Kandi nindi Oyũkakĩnda ekihugo kwehĩ? Yo nʼoyũkĩkĩrĩraya ko Yesu ni Mugala wa Nyamuhanga.

Erĩtũla omwatsi wa Kristo

6Yesu Kristo yoyo wasa: nĩkwa mwasa omo magetsi nʼomusasi. Mwatasa nʼamagetsi masa, nĩkwa omo magetsi nʼomusasi. 7Kandi nĩ Mũlĩmũ yo yũkatũlago, kusangwa Omũlĩmũ ni wʼekwenene. 8Kusangwa abalangĩrĩ basatu bakatũlago, Omũlĩmũ, nʼamagetsi, nʼomusasi. Nʼabasatu aba bakabũga kiguma. 9Tũkalĩga omwatsi owakatũlawa nʼabandu, nĩkwa erĩtũlago lya Nyamuhanga lĩlabĩre, kusangwa Nyamuhanga yo wabĩrĩtũla omwatsi wʼomugala wuwe. 10Oyũkĩkĩrĩraya Omugala wa Nyamuhanga awite erĩtũlago omo mutima wuwe; nʼoyũtĩkĩrĩraya Nyamuhanga, abirimuyira mo mũbehĩ, kusangwa sĩalĩtĩkĩrĩrya omwatsi ogo Nyamuhanga abĩrĩtũla busana nʼomugala wuwe. 11Nʼomwatsi ogo atũla goyũ: ati, Nyamuhanga abirituha engebe yʼerikota, nʼengebe eyĩ ikabanika omo Mugala wuwe. 12Oyuwite Omugala awite engebe, nʼoyutawite Omugala wa Nyamuhanga siawite engebe.

Engebe yʼerikota

13Ngabasakira emyatsi eyĩ, ĩnywe mwĩkĩrĩrye omo lĩna lyʼomugala wa Nyamuhanga, imwatoka eriminya ko muwite engebe yʼerikota. 14Ekĩ kikaleka ĩtwasĩka embere sya Nyamuhanga, kusangwa twamabũlya kindu omwʼisonda liwe, akatowa. 15Neryo kusangwa tũnasĩ kwʼakatowa, tũnasĩ kandi kwʼakatuha ebyo tũkamũbũlaya.

16Omundu amalangira mũlĩkyabo akakola ekibi ekitereta oluholo, angasaba Nyamuhanga, naye asyamuha engebe. Eki kikahula abakakola ekibi ekitereta oluholo. Kandi hali ekibi ekikaleta oluholo; sĩndĩbũga nyiti mwasyasaba busana nʼekibi ekyo. 17Ebyosĩ bitatunganene ni kibi, nikwa hali ekibi ekitereta oluholo.

18Tũnasĩ omundu oyo Nyamuhanga akabuta, sialikwamirira ebibi. Kusangwa Omugala wa Nyamuhanga akamũtegaya ndeke, nʼomubi Oyũ sĩalimũtũlako.

19Kandi tũnasĩ ko tuli ba Nyamuhanga, nʼekihugo kyosĩ kiri omo bũtokĩ bwʼOmubi Oyũ.

20Nĩkwa tũnasĩ kʼomugala wa Nyamuhanga abĩrĩhĩka, nʼerituha eriminya, itwatoka eriminya Nyamuhanga owʼekwenene. Kandi tumatikene na Nyamuhanga owʼekwenene, kandi tumatikene nʼomugala wuwe Yesu Kristo. Oyũ ni Nyamuhanga wʼekwenene, kandi iye ni ngebe yʼerikota.

21Ĩnywe bana bage, mũyĩtegaye oko syonyamuhanga syʼamabehĩ.

Currently Selected:

1 Yoane 5: KB80

Highlight

Copy

Compare