Rusi 4
4
Eyama Boas Rusi
1Neilep Boas alo kishomi neton te ine; naa ng'ura ore oladuoo lo lgilata lenye onyikare oimaka Boas nelotu agiroo. Neaku etiaaka Boas, “Mbelekenyunye olchore, totona tene;” neibelekenyunye ninye neton. 2Neyau ninye ilpayiani tomon le ina anasa nejo, “Entotoni tene;” netoni ninche. 3Neitoki ninye ajoki lelo lo lgilata lenye, “Ore Naomi enoshi natorrinyunye te nkop e Moab, nemirita enkiti wueji e nkop apa o ltung'ani lo lgilata lang oji Elimelek. 4Neaku atejo nanu kaaliki iyie, naajoki, Inyang'u te dukuya kulo ootoni tene, o te dukuya kulo payiani lo lorere lang. Tenaa iyie inyang'u; kake te niminyang'u, tolikioki nanu, pee atum atayiolo, amu meetae likae likidutieki pee inyang'u, naa nanu laaitoki asuju.” Nejoki ninye, “Kainyang'u nanu.” 5Neitoki Boas ajoki, “Ore akenya enkolong ninyang'u enkurma te nkaina e Naomi, ninyang'u sii ninye Rusi, ina tito oo Lmoabu, ina oliai olapa lemeishu pee errinyokini enkarna e ilo lemeishu enjung'ore enye.” 6Neitoki ilo tung'ani lo lgilata lenye ajo, “Maidim nanu ainyang'u te nkaraki kewan ai, pee mainyal ake enjung'ore ai. Iwa iyie erishata ai metaa enino makewan, amu maidim nanu atalaku.”
7 #
Enkig 25.9
Ele apa olkerreti too le Israel too nkolong'i e apa, too mbaa naaipirta elakunoto o ewalunoto; ore pee eitisipi enkinyiang'a neitayu oltung'ani enamuke neisho olikae, naa ena pukunoto apa enkitabaroto too Siraeli. 8Neaku ore ake pee ejoki ilo tung'ani lo lgilata lenye Boas, “Inyang'u iyie,” nedotu ninye enamuke. 9Neitoki Boas ajoki lelo payiani o ltung'ana pooki, “Irara intae ilchakenini ena olong nchere ainyang'ua nanu te nkaina e Naomi nena pooki apa naara ine Elimelek, o pooki naara ine Kilion o Mahalon. 10#Enkig 25.5-6 O Rusi sii ina tito oo Lmoabu ina, oliai e Mahalon, ainyang'ua nanu ninye metaa enkitok ai, pee eitudupari enkarna e ilo otua te njung'ore enye, pee meiminieki enkarna e ilo lemeishu too lalashera lenyena, o te kishomi e wueji enye; irara intae ilchakenini ena olong.” 11#Enk 29.31 Nejo lelo tung'ana pooki ootii kishomi, o lpayiani, “Kira iyiook ilchakenini. Meitotiuo Olaitoriani ina kitok nalotu atua enkaji ino anaa Raheli o Lea, naa ninche pokira naatesheta enkaji e Israel. Tubulu iyie te Efrata nining'oyu te Betlehem; 12#Enk 38.27-30 naa metotiuo enkaji ino anaa enkaji e Peres, laa ninye etoikio Tamar Yuda, te nkaraki nkera nikincho iyie Olaitoriani tena siankiki.”
Boas o eishoi enye
13Neaku eewa Boas Rusi neitaa enkitok enye; nelo aboitare ninye, neisho Olaitoriani metunutayu, neiu enkayioni. 14Nejoki inkituaak Naomi, “Meisisi Olaitoriani, laa ninye leitu kipalaa iyie ena olong miata oltung'ani lo lgilata, naa metoning'oyu enkarna enye te Israel! 15Keaku ina kerai olikirrinyoki enkishui nikintagol te moruao ino; amu ore ina tito o layioni lino nikinyor iyie, nelang ninye ilayiok oopishana, netoiuo ninye.” 16Kaae nedumu Naomi ina kerai neirragie to lgoo lenye, neaku ninye enkaing'urani enye. 17Nedung'oki nkituaak e latia e nkarna, ejo, “Etoikioki Naomi olayioni.” Neisho ninche ninye enkarna aajo Obed; ninye apa menye le Yese, menye le Daudi.
18Ena ninye eishoi e Peres: Peres apa menye le Hesron, 19neiu Hesron Raam, Neiu Raam Aminadab, 20Neiu Aminadab Nashon, neiu Nashon Salmon, 21neiu Salmon Boas, neiu Boas Obed, 22Neiu Obed Yese, neiu Yese Daudi.
The Bible in Maasai © United Bible Societies, 1991.