Matayo 26

Eiguanareki Yesu pee eari metua

(Mk 14.1-2; Lk 22.1-2; Yhn 11.45-53)

1Ore pee eidip Yesu lelo rorei pooki, nejoki ilooiteng'eni lenyena, 2#Ena 12.1-27 “Iyiololo aajo inkolong'i are naatiooyo pee eaku Pasaka#26.2 Pasaka Osirua le ngiroroto, naa keishoori Enkerai e Tung'ani metashei.”

3Neiturrurro lapolosak kituaak o lpayiani te wueji olapolosani kitok oji Kaiafa; 4neiguana maate te nebo pee etum aaibung'a Yesu to losek aataar metua. 5Neitoki aajo, “Neme to sirua pee mejing olong'oling'oli atua ltung'ana.”

Eelaki Yesu te Betania

(Mk 14.3-9; Yhn 12.1-8)

6Ore etii Betania enkaji e Simon le nkeeya oo lbolot, 7#Lk 7.37-38 nelotu enetii ninye enkitok naata oltulet lo soit oji alabasta le ilata narropil nagol enkinyang'a nebukoki elukunya enye te ine einosita endaa. 8Ore pee edol ilooiteng'eni lenyena ina negoro naleng nejo, “Ijo meima ena ilata siu? 9Amu anaata etimiraki aainosie mpesai kumok pee eishori ilaisinak.” 10Kake etayiolo Yesu ina nejoki, “Aainyo pee intanyamalala ena kitok? Naa esupat aaitaasa. 11#Enkig 15.11 Amu iatata ilaisinak anaa ake kake mikiatata nanu anaa ake.

12“Amu ore ina ilata narropil naatubukoko, osesen lai eitobiraki enukaroto. 13Esipa ajoki intae, ore pooki wueji nelikiorieki ele rorei supat te nkop pooki, naa keimakini ena naaitaasa ena kitok metaa enadamunyeki ninye.”

Etonyorrayie Yudas ajo kekaldaa Yesu

(Mk 14.10-11; Lk 22.3-6)

14Nelo ina kata obo te lelo tomon o aare oji Yudas Iskariot enetii ilapolosak kituaak, 15#Saka 11.12 nejoki, “Ainyoo kinchosho te naitarasaki intae ninye?” Nelaaki ninche impisai tomoni uni e nkosholai. 16Ore ebaiki ina kata neing'oru erishata nakaldare ninye.

Etang'arie Yesu ilooiteng'eni lenyena endaa e Pasaka

(Mk 14.12-21; Lk 22.7-14,21-23; Yhn 13.21-30)

17Ore te nkolong e dukuya o sirua loo Mukateni Nemeisuijieki, nepuonu ilooiteng'eni enetii Yesu nejoki, “Kaji kintobiraki iyie pee inyayie osirua le Pasaka?” 18Nejoki, “Entijing enkanasa enchom enetii oltung'ani oje entiaki, ‘Eji Olaiteng'enani, etinyikua enkiririkinoto e nkata ai; te nkaji ino aitobir Pasaka te nebo o looiteng'eni laainei.’ ” 19Neas ilooiteng'eni ina natiaka Yesu, neitobiraki Pasaka. 20Ore pee eaku tara, neton te misa tenebo looiteng'eni lenyena tomon aare. 21Ore einosita endaa nejoki, “Esipa ajoki intae, kaakaldaa obo linyi.” 22Neisinanuo oleng neikilikuana moo obo, “Ai nanu sa Lo Kitok?” 23#Olke 41.9 Newaliki ajoki, “Elde oitadoikio enkaina enye engirra te nebo nanu, ninye laakaldaa nanu. 24Elo Enkerai e Tung'ani anaa enatisiraki, kake, ee kake ayia elde la ninye oitarasaa Enkerai e Tung'ani. Enaikash apa te neitu eini.” 25Neng'amaa Yudas laa ninye oishooyie ajoki, “Aijo, sa ai nanu, Olaiteng'enani?” Nejoki Yesu, “Iyie otejo.”

Yesu oitanapishe metadamuni te ndaa o Laitoriani

(Mk 14.22-26; Lk 22.14-20; 1 Ilkor 11.23-25)

26Ore einosita endaa nedumu Yesu emukate nemayian negiligil; neisho ilooiteng'eni lenyena nejo, “Enkoito enosa; osesen lai ele.” 27Nedumu enkikompe, neisho Enkai enashe, neitarasaki ninche nejoki, “Entook pooki; 28#Ena 24.8; Yer 31.31-34 amu osarge lai ele lo sotua oibukori te nkaraki oo lkumok te mpalakinoto oo ng'ok. 29Ajoki intae, ore ebaiki taata, maitoki ae kata aok enaisho oo lng'anayio loo sabibu o metabau enkolong naok eokoto ng'ejuk te nebo intae te Nkitoria e Papa.”

30Ore pee erany osinkolio neipung aapuo oldoinyo loo Loirienito.

Eibalakinye Yesu Petero ajoki kemiki katitin uni

(Mk 14.27-31; Lk 22.31-34; Yhn 13.36-38)

31 # Saka 13.7 Nejoki Yesu ninche, “Ore tena kewarie, naa aikisikisiki pooki aaing'uaa nanu amu etisiraki aajo, ‘Kaosh olchekut neisardaka emboo oo nkerra.’ 32#Mat 28.16 Kake ore pee aaitopiuni naituruk alo Galilaya.” 33Newaliki Petero ajoki, “Te naa aiking'uaa pooki, maaing'uaa aekata nanu. 34Nejoki Yesu, “Esipa aajoki iyie, ore te na kewarie, eitu eru olkuku, nikimiki iyie katitin uni.” 35Nejoki Petero, “Te naa kaye te nebo iyie maamiki nanu iyie.” Nejo sii neijia ilooiteng'eni pooki.

Etoomono Yesu Enkai te Gatsemane

(Mk 14.32-42; Lk 22.39-46)

36Nelotu Yesu o ninche ewueji neji Getsemane nejoki ilooiteng'eni lenyena, “Entotoni te ne mashomo ende aomon.” 37Nerik Petero o layiok pokira aare le Sebedayo. Neiteru aisinanuo nenyamalu oltau. 38Nejoki, “Eeta oltau lai osina kitok o metaa kaye; entotoni te ne enchololoto te nebo nanu.” 39Nelo penyo aigut neirrabalakino enkop neomon nejo, “Papa lai, te naa keidimayu intapaashaki ena kikompe, kake mme anaa enayieu nanu kake anaa eniyieu iyie.” 40Nelotu enetii ilooiteng'eni neinepu eirurate, nejoki Yesu Petero, “Amaa ai mindimidimi hoo aaishololoto te nebo nanu esaa nabo? 41Enchololoto niomonono pee mijing'ijing'i intemat; esipa eyieu oltau, kake eshal osesen.” 42Neitoki alo enkata e are neomon nejo, “Papa lai, te nemeidimayu pee aapaash ena kikompe eitu aok, inchoo metotiwuo anaa eniyieu.” 43Neitoki alotu, neinepu ninche eirurate, amu eiroshiutuo inkonyek enye. 44Neitoki aing'uaa ninche nelo aomon enkata e uni te lelo ake rorei. 45Neitoki ashukokino ilooiteng'eni lenyena nejoki, “Keton doi ake irurara aayeng'iyeng'a! Eng'ura etinyikua esaa napikieki Enkerai e Tung'ani inkaik oo looata ng'ok. 46Enyeito emaape; eng'ura, nelde olaakaldaa otabawua.”

47Ore eirorita, ng'ura, nelotu Yudas laa obo le lelo tomon o aare, eboitare empikas sapuk naata lalema o siaren ooing'uaa lapolosak o lpayiani lo lorere. 48Naa ore ilo oitarasayie eidipa aishoo ninche olmonekie ejoki, “Ore elde lang'utut, ninye ilo embung'a.” 49Nelo ina kata enetii Yesu nejoki, “Supa Olaiteng'enani;” neng'utut. 50Nejoki Yesu, “Olchore, ainyoo pee itii ene? tasioki taasa ina nikiyawua.” Nepuonu taa enetii neibung aakurraki. 51Neshutu obo le lelo ooboitare Yesu olalem, neosh osinka lo lapolosani nedung'u enkiok. 52Nejoki Yesu, “Tushukoki olalem lino enchashur amu ore pooki oibung olalem nemuta to lalem. 53Aijo iyie eimaidim atasayia Papa maairriwaki nabo kata mpuot tomon o aare oo lmalaika? 54Paa kaji naa eiko pee eitabari ilkigerot nemeeta nchere pee eitu ebaya?” 55#Lk 19.47, 21.37 Ore ina kata nejoki Yesu ina siamo, “Aikipuonunu aaibung iatata ilalema o siaren anaa ilooibung olaisimani? Natii oshi ake enkaji e Nkai aiteng'enisho neitu kimbung'ubung'u?” 56Kake etaasate kuna pooki pee ebaya ilkigerot loo loibonok le Nkai. Neilanyisho ina kata ilooiteng'eni pooki aaing'uaa.

Ewaki Yesu enetii olkiama

(Mk 14.53-65; Lk 22.54-55,63-71; Yhn 18.13-14,19-24)

57Ore lelo ooibung'a Yesu nerikoki olapolosani kitok, oji Kaiafas, enotote te ine laiteng'enak loo nkitanapat o lpayiani. 58Kake esujita Petero ninye te nelakua, o metabaiki olgoriet lo lapolosani kitok. Ore pee ejing atua, neton ninye te nebo ilarripok adol eneiting'oki. 59Neing'oru ilapolosak kituaak o enkiguana pooki shakenisho e lejare naiteeniki Yesu pee eari metua. 60Kake eitu etum hoo pito hoo neetuo lchakenini kumok le lejare. 61#Yhn 2.19 Ore te siadi nepuonu aare ootejo, “Etejo ele tung'ani kaidim atigila enkaji e Nkai naitoki ashet too nkolong'i uni.” 62Neitashe olapolosani kitok ajoki ninye. “Aimeeta eniwalu? Kakua baa kuna nikinteeniki kulo tung'ana?” 63Kake etigire Yesu. Nejoki taa olapolosani kitok, “Aainosie olmumai te Nkai naishu, toliki iyiook te naa ira iyie Kristo, Enkerai e Nkai.” 64#Dan 7.13 Nejoki Yesu, “Iyie otejo; kake ajoki intae, ore ebaiki taata idolidolo Enkerai e Tung'ani eton te nkaina e tatene naata engolon edou too nkatampo e shumata!” 65#Ilaw 24.16 Nepolos olapolosani kitok ilkilani lenyena nejo, “Etamorishe ele, ainyoo shakenisho neton kiyieu? Itoning'o emorore enye. 66Ijojo aa?” Newaliki aajoki, “Keiririkino ele tung'ani keeya.” 67#Isa 50.6 Ore te ina kata nenotaki enkomom neikum, nedam, neosh kulikae te ndap. 68Ejoki, “Kristo, imbonoki yiook, ai ng'ae likitoosho?”

69Neton Petero te boo to olgoriet. Nelo enkaisiaayiani enetii nejoki, “Ira sii iyie obo loo loboitare Yesu le Galilaya.” 70Nemiki ninye te dukuya ninche pooki ejo, “Maiyiolo enijoito.” 71Ore pee eipung alo entaloishi e kishomi nedol ai tito ninye nejoki ilootii ine, “Eiriamariyie sii ele tung'ani Yesu le Nasaret.” 72Neitoki anya olmumai amiki ajo, “Maiyiolo ilo tung'ani.” 73Ore te nkiti kata nepuonu lelo ooitashoo te ine nejoki Petero, “Esipa ira sii iyie obo le lelo; amu aikilikioo ororei lino.” 74Neiteru, adek kewan nenya olmumai nejo, “Maiyiolo ilo tung'ani.” Neru nabo kata olkuku. 75Nedamu Petero lido rorei otiaaka Yesu inchere, “Ore eitu eru olkuku, aikimiki katitin uni.” Neipung alo aishir te mion.

Currently Selected:

Matayo 26: MBS

Highlight

Copy