Hosea 3
3
Hosea o enkitok nemeisiligayu
1Naajoki nanu Olaitoriani, “Nyaaki shomo tonyorra ina kitok nanyor osintani lenye, naa enaibor onyek, tonyorra anaa enanyor Olaitoriani iltung'ana le Israel, hoo neibelekenyakino ninche kulie aitin nenyorru imukateni o sabibu naatoito.” 2Neaku ainyang'ua nanu ninye te shekeli tomon o imiet e nkosholai o ntemet nabo e shairi olpisiai lo ntemet e shairi. 3Najoki nanu ninye, “Meeta nchere pee mibik ira enaai too nkolong'i kumok; mintoki aiborrie onyek, aashu iaku ene likae lee; neijia sii nanu atiu te iyie.” 4Amu kebik nkera oo Israeli nkolong'i kumok meeta olaiguanani aashu olkitok, meeta olasar aashu eng'ape, meeta enkila o lgoo aashu enkitanyaanyukoto. 5Ore te siadi nerrinyunye nkera e Israel neing'oru Olaitoriani Enkai enye, o Daudi olaiguanani lenye; naa kepuonu ninche te nkuretisho enetii Olaitoriani o esupatisho enye too nkolong'i e siadi.
The Bible in Maasai © United Bible Societies, 1991.