Esta 8
8
Etiakaki Ilyahudi meirishisho
1Ore teina olong neisho olaiguanani Esta enkaji e Haman, ilo mang'atinta loo lyahudi. Nelotu Mordekai dukuya olaiguanani amu etolikio Esta enabaikinore ninye; 2neshurtu olaiguanani olgisoi lenye otooruo Haman neisho Mordekai. Neisho Esta Mordekai enkaji e Haman meitoria.
3Neitoki Esta airorie olaiguanani, nebatata too nkejek enyena nesai ninye too lkiyio pee eiwuang'ie entorroni apa naitobira Haman Olagagi o nena naaiguanua te nkaraki Ilyahudi. 4Neutie olaiguanani Esta eng'udi e sahabu, 5Neinyototo Esta aitashe te dukuya olaiguanani Nejo, “Tenaa keitiship olaiguanani, naa tenaa kanoto omom too nkonyek inono, naa tenaa keishiaakino ena bae te dukuya olaiguanani te naishiaakino nanu te dukuya nkonyek enyena, nchoo meigeri enkitanapata naibelekenyieki mpala e nena apa naaipirua Haman Olagagi, olayioni le Hamedata, apa naaigero pee emut Ilyahudi ootii iloshon pooki lo laiguanani. 6Amu kaji aiko te nangiri aing'or ina torroni nalotu atua iltung'ana laainei? Arashu kaji aiko te nangiri te nadol ina mutata o lorere lai.” 7Nejoki olaiguanani Serser Esta o Mordekai ilo Yahudi, “Eng'ura, aishoo Esta enkaji e Haman, neililio ninche ninye to lchani ogorishoreki, amu eitorioko ninye nkaik Ilyahudi. 8Naa indimidimi aaigero anaa eniyieuu, anaa enaishiaakino Ilyahudi, te nkarna o laiguanani, nipikipiki olmishire lo lgisoi lo laiguanani, amu ore ilkigerot ooigeroki te nkarna o laiguanani, nepiki olmishire lo lgisoi lo laiguanani meetae oltung'ani oidim aibelekenya.
9Neipoti ilaigerok lo laiguanani te ina kata to lapa li okuni, aa olapa le Sifan te nkolong e tikitam o okuni; neigeri enkitanapata anaa enaitanapishe Mordekai meyakini Ilyahudi pooki, o lkituaak pooki, o lbalusuni o laitasheikinok loo lkerenketi ebaiki India o metabaiki Etiopia naa iloshon iip o tikitam o opishana, pooki osho ake to lkigeroto lenye, o pooki tung'ani te nkutuk enye, o lo Lyahudi sii to lkigeroto lenye o enkutuk enye. 10Ore lelo kigerot naa te nkarna o laiguanani Serser nemishira to lmishire lo lgisoi lenye, neyae nena pala iltung'ana ooirriwari ookedito mbartan naaten oleng apa naasishoreki te nkisiayiare o laiguanani, naaitubuluaki ti atua boo o laiguanani. 11Ore te kuna nenyorraa olaiguanani Ilyahudi ootii nkanas pooki meiturrurroto pee emitu ate, nemut near metuata, neidaikie pooki jore e pooki tung'ani o pooki osho oidim atarasaki ninche, o nkera enye o nkituaak, neya masaa enye, 12nabo olong too loshon pooki lo laiguanani Serser te nkolong e tomon o okuni to lapa le tomon o are, laa olapa le Adar. 13Ore empalai e nena naaigeroki naa keishoori anaa enkitanapata te pooki osho, o te nkitayioloto oo ltung'ana pooki, nerretena Ilyahudi pee eitalaku elap enye te lelo mang'ati lenye. 14Neked lelo ooirriwari imbartan enye naaten apa naasishoreki te nkisiayiare o laiguanani, neipang aapuo te nkisarrisar, eitirrishakita enkitanapata o laiguanani, neitayuni enkitanapata te Susa te ina ang kitok.
15Neitoki Mordekai apuku alo te ine netii olaiguanani eishopito inkilani e nkitoo pusi o naaibor o lmarisian sapuk le nkitoo le sahabu, olkila sidai sintet, ina kata ebuaku enkang e Susa neng'ida. 16Netum Ilyahudi ewang'an, o enchipai, o eng'ida o enkanyit. 17Ore te pooki osho, o te pooki ang, eneba anaa enetabaikia enkitanapata o lkilikuai lo laiguanani, netii enchipai o eng'ida atua Ilyahudi; o sirua o enkisampash. Ore ilkumok te lelo tung'ana le ina kop neibalunye ate aaitaa ate Ilyahudi amu eiputa enkuretisho oo Lyahudi atua ninche.
The Bible in Maasai © United Bible Societies, 1991.