Esta 3
3
Eitobira Haman pee eidaikie Ilyahudi
1Ore te siadi kuna baa, neilepie olaiguanani Serser Haman le Agag, olayioni le Hamedata, neisho ninye enkitoo nepik olorika lenye shumata ile lelo kituaak ooboitare ninye. 2Ore laisiaayiak pooki lo laiguanani ootii kishomi neirrugo aaisho Haman enkanyit; amu neijia apa eitanapishe olaiguanani ajo. Kake eitu eirrugo Mordekai arashu aitodolu enkanyit. 3Nejoki lelo aisiaayiak lo laiguanani ootii kishomi Mordekai, “Kainyoo pee igil enkitanapata o laiguanani?” 4Ore pee eirorie ninche ninye anaake neany ening ninche, neliki ninche Haman, ejo pee edol tenaa kepal Mordekai nena, amu etiaaka ninye ninche nchere Olyahudi ninye. 5Ore pee edol Haman ajo eitu eirrugo Mordekai arashu eitodolu enkanyit negoro oleng. 6Kake eitu ejo aar Mordekai aa ninye ake. Amu eitayioloki ninye iltung'ana pooki le Mordekai, neing'oru Haman pee ear Ilyahudi pooki, iltung'ana le Mordekai, te nkitoria pooki e Serser.
7Ore to lapa le dukuya, laa ninye olapa le Nisan, to lari le tomon oare lo laiguanani Serser, neosh ninche Pura nchere enkukuo te dukuya Haman nkolong'i pooki; neosh too lapaitin pooki o metabaiki olapa le tomon oare, laa ninye olapa le Adar. 8Neitoki Haman ajoki olaiguanani Serser, “Etii iltung'ana moobo ooisardakari aaorikino atua iltung'ana loo loshon pooki le nkitoria ino; ore nkitanapat enye nepaashare inoo lkulikae tung'ana pooki, nemeibung nkitanapat o laiguanani, metaa metumie olaiguanani dupoto te nepalaa ninche. 9Te neishiaakino to laiguanani nchoo meigeri enkitanapata pee emuti ninche, naa kalak nanu ntalantani nkalifuni tomon oo mpisai apik nkaik e lelo ooitasheiki esiaai o laiguanani pee eyau aapik atua masaa o laiguanani.” 10Neitayu olaiguanani olgisoi ashurtu te nkaina enye neisho Haman le Agag ole Hamedata, olmang'atinta loo Lyahudi. 11Nejoki olaiguanani Haman, “Kinchooki mpisai, o ltung'ana sii, pee intaas ninche anaa enaishiaakino te iyie.”
12Neipoti ilaigerok lo laiguanani te nkolong e tomon ookuni o lapa le dukuya, neigeri anaa enaitanapishe Haman neigerokini lelo ang'eni o lelo kituaak ooitasheiki iloshon, o laitasheikinok pooki loo ltung'ana, olosho ake to rorei lenye o ltung'ana te nkutuk enye; neigeroki apa te nkarna e Serser nepiki olmishire te ilo gisoi lo laiguanani. 13Neirriwari mpala too nkaik e lelo ooirriwari meshomo ilkerenketi pooki lo laiguanani, pee eidaikie, neari metuata, neiwuang'ieki Ilyahudi pooki ooti o lbotoro, inkituaak o nkera, te nkolong nabo, te nkolong e tomon ookuni o lapa le tomon oare, laa ninye olapa le Adar, neya imasaa enye. 14Naa keirriwari empalai e ilo kigeroto iloshon pooki pee eitanapi metolikini iltung'ana pooki meterretenata te ina olong. 15Nepuo lelo ooirriwari aaya mpala te nkisarrisar te nkitanapata o laiguanani, neitayuni ina kitanapata te Susa teina ang kitok. Netoni olaiguanani o Haman aaokisho, kake ore ina ang anasa e Susa neaku enking'asia.
The Bible in Maasai © United Bible Societies, 1991.