2 Samuel 2
2
Etuputoki Daudi metaa olaiguanani le Yuda
1Ore te siadi ena neikilikuanishore Daudi Olaitoriani, “Kailep nanu alo atua ae nabo oo nkang'itie e Yuda?” Nejoki Olaitoriani ninye, “Ilepa shomo.” Nejo Daudi, “Kaa ailep alo?” Nejo ninye, “Shomo Hebron.” 2#1 Sam 25.42-43 Neaku eilepa Daudi nelo ine, te nebo sii nkituaak enyena pokira are, Ahinoam e Yesreel o Abigail ina oliai apa e Nabal le Karmel. 3Neyau Daudi ailepunye lelo tung'ana lenyena apa ootii te nebo ninye, oltung'ani ake o enkaji enye; nebik ninche too nkang'itie e Hebron. 4#1 Sam 31.11-13 Nepuonu iltungana le Yuda, nebukoki ninche Daudi eilata aaput teine aaitaa olaiguanani le nkaji e Yuda.
Ore ake pee eliki ninche Daudi aajoki, “Iltung'ana le Yabesh Gilead apa ootunukaitie Saul,” 5neirriwaki Daudi ilkiliku lelo tung'ana le Yabesh gilead, nejoki ninche, “Entaa intae iloomayiana to Laitoriani, enkaraki nintodolutua intae ena anyit te Saul, olkitok linyi, ninukaa ninye! 6Meitodua intae Olaitoriani enyorrata nauno o enkisiligata! Naa kaitaas nanu intae esidai enkaraki nitaasa ena bae. 7Ore naa enchoo metagolo nkaik inyi, nipijuju; amu etua Saul olkitok linyi, naatubukokitio nanu enkaji e Yuda eilata aaput aaitaa olaiguanani te shumata ninche.”
Eitaaki Ishboshet olaiguanani le Israel
8Ore apa Abna olayioni le Ner, olkitok le njore e Saul, neya Ishboshet olayioni le Saul, neyau ninye Mahanaim, 9neitaa Abna ninye olaiguanani te shumata Gilead o Ashuri o Yesreel o Efraim o Benchamen o Israel pooki. 10Ore apa Ishboshet, ilo ayioni le Saul, naa ilarin artam ina kata pee eiteru aitore Israel, neitore ninye ilarin oare. Kake etusujaitie enkaji e Yuda Daudi. 11Ore enkata apa nara Daudi olaiguanani te Hebron te shumata enkaji e Yuda naa ilarin oopishana o lapaitin ile.
Eitayutuo Israel o Yuda olarrabal
12Ore Abna olayioni le Ner o sinkan le Ishboshet olayioni le Saul, neipang aapuo te Mahanaim nepuo Gibeon. 13Ore Yoab olayioni le Seruiya, o sinkan le Daudi, neipang aapuo nenang'are ninche te nchorro e Gibeon; netoni ninche, obo te nchoto nabo e nchorro o likae te nkae shoto e nchorro. 14Nejoki Abna Yoab, “Nchoo ilbarnot edumunye aarany te dukuya iyiook.” Nejo Yoab, “Nchoo edumunye ninche.” 15Kaae nedumunye ninche nepuo te siana enye, tomon oare ile Benchamen o Ishboshet ilo ayioni le Saul, o tomon oare loo sinkin le Daudi. 16Neibung ake oltung'ani ilo oarare endukuya nerrumoki olalem lenye eluboto e ilo oarare; neaku etabatatate te nebo. Neaku etejoki apa ine wueji Helkat-hasurim, naa Gibeon etii. 17Nerrishu olarrabal ina olong, nemiri Abna o ltung'ana loo Siraeli te dukuya isinkan le Daudi.
18Netii apa ine ilayiok pokira okuni le Seruiya, Yoab, Abishai o Asahel. Naa keneneng apa Asahel too nkejek anaa enkolii e ong'ata; 19nemir Asahel Abna, ore eloito nemeibelekenya aing'or enkaina e tatene arashu enkaina e kedienye esujaa Abna. 20Nenang Abna silig nejo, “Kaiyie Asahel?” Newalu ninye, nejo “Ee nanu.” 21Nejoki Abna ninye, “Shomo enkaina ino e tatene arashu ene kedienye, imbung'a obo loo lbarnot, pee iya nena naataarua ninye.” Kake meyieu Asahel neibelekenya te sujata enye. 22Neitoki Abna aigil ajoki Asahel, “Shomo mikintoki asuj kainyoo pee aar nanu iyie tua? Kaji naa aiko te nashumaki enkomom ai olalashe lino Yoab?” 23Kake etanya ninye elo aapaash neaku etaremo Abna ninye enkoshoke to lng'urrat le mpere enye, neaku eipang'ua empere te nkoriong enye, nebatata ninye te ine, neye te ine apa netii. Ore lelo apa pooki ooetuo ine wueji netabatatare Asahel neye, neitashe aaitirring'a.
24Kake etimira Yoab o Abishai Abna; ore edoyio enkolong nepuonu ninche oldoinyo le Ama, laa ninye otii dukuya Gia te nkoitoi nalo olpurkel le Gibeon. 25Neiturrurro tenebo iltung'ana le Benchamen te siadi Abna, neaku olwuampa obo, neitashe te ntopij o ldoinyo. 26Neipot Abna Yoab, nejoki, “Amaa, keaku kedaa olalem ntarasi? Aimiyiolo ajo keduaru enkiting'oto? Kebaa kenya enkata pee imbok iltung'ana linono metapala emirata oo lalashera lenye?” 27Nejo Yoab, “Anaa enaishu Enkai, te neme iroro, esipa anaata etapala iltung'ana esujata oo lalashera lenye tadekenya.” 28Neaku etoosho Yoab emowuo; neitashe iltung'ana pooki, neitu eitoki aasujaa Israel, arashu eitoki aara.
29Ore Abna o ltung'ana lenyena nepuo ina kewarie pooki nepuo aaim atua Araba; nelang ninche olkeju le Yordan, nepuo entadekenya pooki o meetu Mahanaim. 30Neshukunye Yoab te mirata e Abna; ore ake pee eidip aiturrurro iltung'ana pooki te nebo, nemetii isinkan le Daudi iltung'ana tomon ooudo metii Asahel. 31Kake etaara isinkan le Daudi iltung'ana iip uni o ntomoni ile metuata too ltung'ana le Abna lo losho le Benchamen. 32Neya Yoab o ltung'ana lenyena osesen le Asahel, nenukaa te nkurare e papaai lenye, apa natii Betlehem. Nelo Yoab o ltung'ana lenyena enkewarie pooki, neilepaki ninche enkolong te Hebron.
The Bible in Maasai © United Bible Societies, 1991.