Ecclesiasticus 8
8
CAIB. VIII.
1Na dean strìth ri duine cumhachdach, air eagal gu ʼn tuit thu ʼna làmhaibh.
2Na bi ann an aimhreite ri duine saibhir, air eagal gu ʼm bi e tuilleadh ʼs trom air do shon: oir mhill an t‑òr mòran, agus thruaill e cridheachan nan rìgh.
3Na dean strìth ri duine aig am bheil mòran teanga, agus na càruich fiodh air a theine.
4Na dean sùgradh ri duine borb, air eagal gu ʼm maslaichear do shinnsear.
5Na dean tàir air duine a philleas o ʼn pheacadh; ach cuimhnich gu ʼm bheil sinn uile toilltinneach air peanas.
6Na toir eas‑urram do dhuine ʼna shean aois; oir fàsaidh eadhon cuid againn fein sean.
7Na dean gàirdeachas ri bàs do nàmhaid a ʼs mò, ach cuimhnich gu ʼm bàsaich sinn uile.
8Na dean tàir air còmhradh nan daoine glice, ach faigh eòlas air an gnàth‑fhoclaibh; oir uatha‑san foghluimidh tu teagasg, agus ciamar a riaraicheas tu daoine mòra gu furas.
9Na caill còmhradh nan seanair; oir fhuair iadsan mar an ceudna eòlas o ʼn aithrichibh fein, agus uatha‑san foghluimidh tu tuigse, agus freagradh a thoirt mar a chithear feum.
10Na fadadh éibhlean aʼ pheacaich, air eagal gu ʼn loisgear thu le lasair a theine.
11Na éirich suas (a ʼm feirg) a ʼm fianuis neach eucoraich, air eagal gu ʼn dean e feall‑fholuch ʼgadʼ ribeadh ʼnadʼ bhriathraibh.
12Na toir ann an iasad dhàsan a ta ni ʼs cumhachdaichʼ na thu fein; oir ma bheir thu dhàsan ann an iasad, amhairc air mar nì caillte.
13Na téid an urras os ceann do chumhachd; oir ma théid thu an urras, bi cinnteach gu ʼn dìol thu.
14Na téid chum an lagha le breitheamh; oir bheir iad breith air a thaobh‑san a réir urraim fein.
15Na gabh an t‑slighe maille ri duine dàna, air eagal gu ʼm fàs e trioblaideach dhuit; oir nì e a réir a thoil fein, agus théid thu a dhìth leis trìd ʼamaideachd.
16Na dean strìth ri duine feargach, agus na rach maille ris gu ionad aonaranach; oir tha fuil mar neoni ʼna shùilibh; agus far nach ʼeil cuideachadh cuiridh e as duit.
17Na gabh comhairle o amadan; oir cha ʼn urrainn e comhairle a ghléidheadh.
18Na dean nì dìomhair am fianuis coigrich; oir cha ʼn aithne dhuit ciod a nì e.
19Na fosgail do chridhe do na h‑uile neach; air eagal gu ʼn dìol e thu le car cealgach.
Currently Selected:
Ecclesiasticus 8: MacGAP
Highlight
Copy
Compare
Share
Want to have your highlights saved across all your devices? Sign up or sign in
© Scottish Bible Society 2017
© Comann Bhìoball na h-Alba 2017