羅馬書 9
9
上帝㧯佢个選民
1𠊎講真心話；𠊎係屬基督个人，毋會講花撩。𠊎个良心在聖靈个光照之下也證明𠊎無講花撩： 2𠊎十分憂愁，𠊎个心一直痛到講毋得！ 3為到𠊎个同胞，𠊎个骨肉之親，就係𠊎本身被上帝咒詛，同基督隔絕，𠊎也甘願。 4佢等係以色列人、上帝个選民；上帝賜佢等子女个名份，有好分享佢个榮耀。上帝同佢等立約，賜佢等法律；佢等知愛樣般敬拜上帝，也接受了佢个應許。 5佢等係眾族長个子孫；照血統來講，基督同佢等係共族。願統治萬有个上帝 #9:5 「願統治萬有个上帝」抑係譯做「願基督，就係統治萬有个上帝」。永遠得到頌讚！阿愐。
6𠊎毋係講上帝个應許已經落空。因為，以色列人無全部係上帝个選民； 7亞伯拉罕个子孫也無全部係佢个真子女。上帝識對亞伯拉罕講：「唯有對以撒出个，正算係你个子孫。」 8這就係講，自然生育所𫱔个，無一定係上帝个子女；唯有對上帝个應許來𫱔个，正算係上帝个子女。 9因為上帝个應許係恁樣講个：「時機成熟个時，𠊎愛倒轉來，莎拉會𫱔一個孻仔。」
10毋單淨恁樣，麗百加个兩個孻仔，也係對共一個阿爸，就係𠊎等个先祖以撒來𫱔个。 11-12總係，為到愛表示佢照自家个旨意已經揀選其中一個孻仔，上帝對麗百加講：「大个孻仔愛服事細个孻仔。」佢講這句話个時，佢等還吂出世，還吂行善抑係作惡；可見，上帝个揀選係照佢自家个旨意，同佢等个行為無關係。 13就像聖經所講：「𠊎惜雅各，惱以掃。」
14恁樣，𠊎等做得講上帝無公平係麼？當然做毋得！ 15因為佢識對摩西講：
「𠊎愛憐憫麼人，就憐憫麼人，
愛痛惜麼人，就痛惜麼人！」
16可見，上帝个揀選毋係照人个心願抑係打拚，係照佢个憐憫來个。 17聖經底背，上帝對埃及王講：「𠊎立你做王，係愛用你來彰顯𠊎个權能，使𠊎个名傳遍天下。」 18恁樣講來，上帝愛憐憫麼人，就憐憫麼人；佢愛使麼人硬頸，就使麼人硬頸。
上帝个義怒㧯憐憫
19可能你會對𠊎講：「既然恁樣，上帝樣般還做得怪人？麼人能抵抗佢个旨意啊？」 20總係朋友啊，你係麼人？樣般敢撐上帝个話呢！缶仔樣般做得對造它个人講：「你做麼介造𠊎像恁樣呢？」 21敢講燒缶師傅無權拿泥來造佢所愛造个東西嗎？佢敢做毋得用共團泥來製造兩隻器皿，一隻貴重个，一隻普通个嗎？
22上帝所做个也係恁樣。佢愛顯示佢公義个發譴，彰顯佢个權能；總係，佢又愛用耐心寬容佢發譴个對象，就係該兜本來應當愛打爛个器皿。 23同時，佢還愛將佢豐盛个榮耀對𠊎等來顯明；𠊎等係佢憐憫个對象，係佢所預備愛接受佢榮耀个人。 24𠊎等毋單淨係佢對猶太人底背，也係對外邦人當中，呼召出來个。 25這就係佢在《何西阿書》底背所講个：
本來毋係𠊎子民个，
𠊎愛稱佢等做「𠊎个子民」，
本來𠊎無合意个邦國，
𠊎愛稱它做「𠊎所惜个」。
26頭擺𠊎識對佢等講：
你等毋係𠊎个子民；
總係這下，佢等愛稱做
「永生上帝个子女」。
27關係以色列人，以賽亞識大聲喊講：「以色列人雖然像海沙恁多，總係只有賸下个少數人會得救， 28因為主愛當遽又徹底來審判全人類。」 29又像以賽亞頭擺所講：「若毋係主 — 萬軍个元帥為𠊎等留下一兜後代，𠊎等早就像所多瑪㧯蛾摩拉恁樣囉！」
以色列人㧯福音
30恁樣，𠊎等愛樣般講呢？外邦人本來無尋上帝个義，卻因為信來成做義人； 31總係，以色列人追求通過法律來成做義人，反轉無達成目的。 32樣般會恁樣呢？因為佢等毋靠信心，反轉靠行為，結果就跌在該「絆腳石」頂高。 33像聖經所講：
看啊，𠊎在錫安放一垤絆腳个石頭，
係會使人跌倒个大石頭！
總係，信靠佢个人就毋會失望。
Currently Selected:
羅馬書 9: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
