羅馬書 16
16
保羅問候信徒
1𠊎對你等介紹𠊎等个姊妹菲比；姖一旦係在堅革哩教會做執事。 2你等愛照主个名㧯聖徒个本份好好接待姖；無論姖有麼介需要，請幫助姖。姖識熱誠幫助盡多人，𠊎自家也識得到姖个幫助。
3請問候事奉基督耶穌个同工百基拉㧯亞居拉兩公婆； 4佢等識為𠊎冒生命个危險；毋單淨𠊎盡感謝佢等，外邦个各教會也非常感激。 5也問候在佢等屋下聚會个教會。
請問候𠊎親愛个朋友以拜尼土；佢係亞細亞省第一個歸屬基督个人。 6也問候為你等辛苦工作个馬利亞。 7請問候識同𠊎共下坐監个猶太同胞安多尼古㧯猶尼亞；佢等在使徒中係盡出名个人，也比𠊎先歸屬基督。
8請問候主內親愛个朋友暗伯利； 9也問候事奉基督个同工耳巴努㧯𠊎親愛个朋友士大古。 10請問候受過考驗、對基督忠心到底个亞比利；也問候亞利多布一家人。 11請問候猶太同胞希羅天；也問候拿其數一家信主个眾兄弟姊妹。
12請問候為主辛苦工作个女同工杜菲娜㧯杜富姍；也問候為主煞猛工作親愛个女信徒彼息。 13請問候魯孚；佢係主內一個傑出个工人；也問候厥姆，姖一旦對待𠊎像自家个孻仔。 14請問候亞遜其土、弗勒干、黑米、八羅巴、黑馬，㧯其他同佢等共下个眾兄弟姊妹。 15請問候非羅羅古㧯猶莉亞#16:15 「猶莉亞」係女信徒，中文聖經譯做「猶利亞」。，尼利亞㧯厥老妹，並阿林巴，㧯同佢等共下个眾聖徒。
16你等愛聖潔相唚彼此請安。基督个各教會全部對你等請安。
最後个勸勉
17兄弟姊妹啊，𠊎勸你等，愛提防該兜製造分裂、動搖別人信心、同你等所受个教訓對立个人；愛離開佢等遠遠。 18因為這種人毋係事奉𠊎等个主基督，係在滿足自家个肚笥。佢等嘴甜舌滑係愛迷惑老實人个心。 19大家攏總聽講你等係樣般順從福音；所以𠊎為你等盡歡喜！願你等對好事聰明，對壞事單純。 20賜平安个上帝就會踐踏撒但，喊佢降服在你等个腳下。
願𠊎等个主耶穌賜恩典給你等！
21𠊎个同工提摩太，並猶太同胞路求、耶孫、所西巴德，攏總問候你等。
22𠊎 — 這代筆寫信仔个德提，也在主內問候你等。
23 該猶接待𠊎 — 保羅，又俾教會在厥屋下聚會，佢也問候你等。城內管銀庫个以拉都㧯𠊎等个兄弟括土也問候你等。#16:23 有兜古卷加 24 節：「願𠊎等个主耶穌基督賜恩典給你大家！阿愐。」
結束个祈禱㧯頌讚
25願榮光歸給上帝！佢能照𠊎所傳个福音堅定你等个信心。這福音係有關耶穌基督个真道，啟示自古以來囥等个奧秘。 26這奧秘已經通過眾先知个書顯明出來，也照永生上帝个命令指示萬國，使萬民對信來順從。
27願榮光通過耶穌基督歸給獨一全智个上帝，直到永遠！阿愐。
Currently Selected:
羅馬書 16: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
