羅馬書 1

1𠊎係基督耶穌个僕人保羅；上帝呼召𠊎做使徒，特別派𠊎傳佢个福音。

2-4這福音係上帝在盡久以前通過佢个眾先知在聖經底背所應許个，內容係有關佢个孻仔 — 𠊎等个主耶穌基督。照血統來講，佢係大衛个後代；照聖潔个神性來講，因為上帝使佢對死復活，用大能顯明佢係上帝个孻仔。 5通過佢，𠊎得到特別个恩典，為佢个名做使徒，帶領各國个人來信從佢。 6這當然包含你這兜在羅馬、得到上帝揀選來歸屬耶穌基督个人。

7所有在羅馬、上帝所惜、所揀選做聖徒个人，𠊎對你等請安。

願𠊎等个阿爸上帝㧯主耶穌基督賜恩典、平安給你等！

感謝个祈禱

8一開始，𠊎愛通過耶穌基督，為你等大家感謝𠊎个上帝，因為你等个信心已經傳遍天下。 9上帝知𠊎常常在祈禱中想念你等。𠊎全心全意事奉上帝，傳有關佢个孻仔个福音；佢做得證明𠊎所講个話係有影个。 10𠊎求上帝，照佢美好个旨意為𠊎開路，俾𠊎最後會有機會去訪問你等。 11𠊎非常希望見到你等，同你等分享屬靈个恩賜，好使你等个靈性堅強起來； 12也可以講，𠊎在你等中間个時，因為你等㧯𠊎彼此个信心，𠊎等會互相得到鼓勵。

13兄弟姊妹啊，𠊎愛你等知，有好多擺𠊎計劃愛去訪問你等，總係逐擺都有事情阻擋，害𠊎無法度去。𠊎个目的係愛在你等中間帶領人歸主，像在其他个外邦人中間一樣。 14因為無論對麼介人，係文明人抑係吂開化个，係聰明人抑係愚戇个，𠊎攏總欠佢等个債。 15所以，𠊎迫切愛將這福音也傳給你等在羅馬个人。

福音个大能

16𠊎無看福音做見笑；這福音係上帝个大能，愛拯救一切信个人，先係猶太人，然後係外邦人。 17因為這福音啟示𠊎等，上帝樣般使人同佢有正確个關係：從頭到尾係通過信。像聖經所講：「通過信同上帝有正確關係个人一定會得到真个生命 #1:17 「通過信…真个生命」抑係譯做「同上帝有正確關係个人一定會通過信來得到真个生命」。。」

人類个罪

18原來，上帝个發譴對天頂顯明在一切無敬虔㧯不義个人身上，就係該兜用不義壓制真理个人。 19上帝責罰佢等，因為關係佢个事，已經照人所能理解个，清清楚楚顯明在佢等个面前；這係上帝親自為佢等顯明个。 20有關上帝个一切，本來毋係人看得到个，總係通過世界个創造，人看到佢所造个萬物，就認出佢永遠个大能㧯神性。所以，人無麼介藉口好推辭。 21佢等雖然認識上帝，總係毋將榮光歸給佢，也毋感謝佢；佢等个思想虛空，糊塗个心變做烏暗。 22佢等自認盡聰明，其實盡戇。 23佢等毋拜永生个上帝，反轉去拜偶像，就係該兜照會死个人、飛禽、走獸、昆蟲等形像造出來个。

24所以，上帝由在佢等跈等心中个慾念去做下流个事，彼此蹧踏自家个身體。 25佢等棄絕上帝个真理，甘願接受虛假：佢等敬拜服事受造个東西，總係毋敬拜服事造物之主 — 佢正係應該永遠受讚美个。阿愐！

26因為恁樣，上帝由在佢等放縱自家个情慾；毋單淨婦女打亂正常个關係，行違反自然个性行為， 27連男人也棄絕同婦人家个正當關係，同性相戀，做出毋知見笑个事，結果，受到應得个責罰。

28既然人故意毋承認上帝，上帝就由在佢等存敗壞个心，做該兜無應該做个事。 29佢等行盡各種个不義、邪惡、貪心㧯惡毒；滿心係嫉妒、兇殺、相爭、詭詐㧯陰謀。佢等製造謠言， 30彼此譭謗。佢等怨恨上帝，互相侮辱，驕傲，自誇，好惹是非，毋孝敬爺𡟓， 31全無天良，講話無信用，無愛心，也無同情心。 32佢等知，照上帝个命令，行這種事个人係該死个；總係，佢等毋單淨自家去行，也贊成別人恁樣行。

Currently Selected:

羅馬書 1: THV12Hdb

Highlight

Copy