民數記 11

在他備拉埋怨

1人民堵到困難，開始埋怨上主。上主聽到就發譴，降火在佢等當中，燒掉營地个一角。 2人民向摩西哀求。摩西向上主祈禱，火就烏掉。 3該地方就喊做他備拉#11:3 「他備拉」有「燒」个意思。，因為上主个火識燒在佢等當中。

摩西揀選七十個長老

4有兜外族人㧯以色列人共下行；佢等當想食肉。以色列人也開始緊噭埋怨講：「𠊎等若係有肉好食毋知幾好呢！ 5在埃及个時，𠊎等常常食魚仔，也毋使用錢去買。記得黃瓜、西瓜、韭菜、洋蔥、大蒜恁多好食个東西。 6這下𠊎等無半點元氣，因為逐日除了這嗎哪以外，麼介東西乜無好食！」

7(嗎哪个樣仔像芫荽仔、色像珍珠， 8-9逐暗晡㧯露水共下落在營地。第二日打早，人民出去拈，將它磨碎抑係舂碎變做粉，然後用鑊頭煎做餅。它个味道像攪橄欖油焙个餅。)

10 摩西聽到人民歸群企在佢等个帳篷門口緊噭又埋怨。上主對人民發譴；摩西心肚就當艱苦。 11摩西對上主講：「你做麼介恁樣為難你个僕人？做麼介恁樣無歡喜𠊎？做麼介愛𠊎𢱋這兜人負恁重个責任？ 12佢等敢係𠊎造个抑係𫱔个？做麼介你愛𠊎做乳𡟓，將佢等像孲𤘅仔恁樣揇在胸前，一直揇到你應許給佢等祖先个土地呢？ 13𠊎愛去㖠位尋肉給這恁多人食呢？佢等一直緊噭又埋怨，愛𠊎給佢等食肉！ 14管理這兜人个責任忒重，𠊎一儕㧡毋贏！ 15若係你愛恁樣對待𠊎，求你可憐𠊎，黏時將𠊎㓾掉，使𠊎毋使再繼續面對恁樣个艱難。」

16上主對摩西講：「你愛召集七十個受人尊敬个長老，將佢等帶到𠊎這位來，㧯你共下企在聖帳篷堘頭。 17𠊎愛下來，在該位對你講話。𠊎愛將賜給你个靈分給佢等，佢等就能分擔你个責任；你就毋使一儕㧡這重擔。 18你愛吩咐人民，講：『大家愛潔淨自家，天光日你等會有肉好食。上主識聽到你等緊噭埋怨講：𠊎等想愛食肉，𠊎等感覺在埃及較好。所以，上主就愛給你等有肉好食了。 19你等毋單淨會食一日、兩日、五日、十日、甚至二十日。 20你等會食一隻月，直到肉對你等个鼻孔噴出來，使你等食到畏頦。這件事一定會發生；因為你等豁掉在你等當中个上主，在佢个面前緊噭埋怨講：𠊎等做麼介離開埃及呢！』」

21 摩西對上主講：「𠊎𢱋个男人就有六十萬恁多，你樣會講你愛給佢等食肉，使佢等做得食歸隻月？ 22㖠有恁多个牛羊好㓾來滿足佢等？海肚所有个魚仔驚怕也毋罅佢等食呢！」

23上主對摩西講：「𠊎个能力敢有限制嗎？你這下就會看到𠊎講个話係毋係會實現！」

24所以摩西出去，將上主所講个話㧯人民講。佢召集七十個長老，喊佢等企在聖帳篷四周圍。 25上主在雲當中降下來，對摩西講話，將賜給摩西个靈分給該七十個長老。靈降在佢等身上个時，佢等全部像先知恁樣受感講話，總係以後無再講。

26其中有兩個長老伊利達㧯米達還留在營肚，無到聖帳篷該位去。在營肚，靈降在佢等身上，佢等也像先知恁樣受感講話。 27有一個青年走去見摩西，將伊利達㧯米達在營肚所做个事向佢報告。

28 嫩个孻仔約書亞對後生个時就係摩西个助手；這時，約書亞對摩西講：「摩西大人啊，請你去阻擋佢等。」

29 摩西應講：「你為到𠊎个緣故來嫉妒係麼？𠊎希望上主將佢个靈賜給佢所有个子民，使佢等全部像先知恁樣講話！」 30然後，摩西㧯以色列个七十個長老全部轉到營肚去。

上主降下鵪鶉

31忽然間，上主使風吹起，歸群个鵪鶉對海上飛來，離地面只有一公尺高。牠兜停在營地㧯四周圍，逐所在全部有，東西南北、連等幾公里 #11:31 「離地面…幾公里」抑係譯做「牠兜停在營地㧯四周圍，逐所在全部有，東西南北、連等幾公里，牠兜越堆越高，一直堆到有一公尺高」。。 32人民歸日歸夜捉鵪鶉；第二日也歸日捉，逐儕最少捉到一千公斤。佢等將鵪鶉擺在營地四周圍曬乾。 33佢等牙齒還嚼等肉个時，上主向人民大發譴，使佢等發瘟，害死佢等。 34該地方就喊做基博羅‧哈他瓦#11:34 「基博羅‧哈他瓦」意思係「貪慾个墳墓」。，因為佢等在該位埋葬貪食个人。

35對基博羅‧哈他瓦，人民徙到哈洗錄，在該位安營。

Currently Selected:

民數記 11: THV12Hdb

Highlight

Copy

Compare