利未記 8

設立亞倫㧯佢个子孫做祭司

(出埃及記 29:1-37)

1上主吩咐摩西： 2「你愛帶亞倫㧯佢該兜孻仔到𠊎聖帳篷門口。你也愛帶祭司个聖服、設立用个聖油、一隻贖罪祭个細牛牯、兩隻綿羊牯，㧯一籃無酵餅去， 3然後召集全體人民到該位聚會。」

4 摩西遵照上主个命令去做。全體民眾全部聚集在聖帳篷門口， 5摩西就對佢等宣佈：「𠊎這下所執行个係遵照上主个命令去做个。」

6 摩西𢱋亞倫㧯佢該兜孻仔到頭前來，用水㧯佢等洗身。 7佢㧯亞倫著好內衫，繫腰帶，著好長衫、又加上以弗得聖服，用手工刺成个帶仔將以弗得繫在身上。 8接等，佢將胸牌掛在亞倫身上，將烏陵㧯土明 #8:8 「烏陵㧯土明」：看出埃及記 28:30 。放入胸牌肚。 9然後，佢將帽仔戴在亞倫个頭那頂，又將該用純金造个表示奉獻个牌仔繫在帽仔个頭前。這全部係遵照上主命令摩西做个。

10 摩西拿聖油膏聖帳篷㧯內肚所有个東西，恁樣使它兜全部分別為聖。 11佢也用聖油在祭壇㧯壇个用品頂高拂七擺，在洗盪盆㧯盆座頂高拂七擺，來將這兜東西全部分別為聖。 12佢將聖油倒在亞倫个頭那頂，設立佢做祭司。 13接等，摩西𢱋亞倫該兜孻仔到頭前，給佢等著好內衫、繫腰帶、戴帽仔。這全部係遵照上主命令摩西做个。

14 摩西將贖罪祭个細牛牯牽過來；亞倫㧯佢該兜孻仔將手放在牛牯个頭那頂。 15摩西㓾死該牛牯，用手指搵血，膏在祭壇个四角頂，使祭壇成做淨浰。然後，佢將賸到个血倒在壇腳該位。恁樣，佢將祭壇分別為聖，好在祭壇頂贖罪。 16摩西拿牛牯腹內所有个油、肝个網油、兩隻腰仔㧯腰仔面頂个油，放在祭壇頂，全部燒掉。 17總係，佢將牛牯賸到个部份，包含皮、肉、腸，全部帶到營外燒掉。這全部係遵照上主命令摩西做个。

18接等，摩西牽該隻做燒化祭个綿羊牯來；亞倫㧯佢該兜孻仔將手放在綿羊牯頭那頂。 19摩西㓾死該羊牯，將血洒在祭壇四周圍。 20佢將羊肉切做一垤一垤，用水洗淨腹內㧯後腿，將這兜㧯羊頭並油全部放在祭壇頂燒獻。 21這火祭个香味係上主所歡喜个。這全部係遵照上主命令摩西做个。

22 摩西牽另外一隻綿羊牯來，這隻係為到授聖職給祭司獻个。亞倫㧯佢該兜孻仔將手放在綿羊牯个頭那頂。 23摩西㓾死該羊牯，拿一些仔血膏亞倫个右耳鉈、正手个手指公，㧯正腳个腳指公。 24接等，佢帶亞倫該兜孻仔到頭前來，將一些仔血膏佢等个右耳鉈、正手个手指公，㧯正腳个腳指公，然後佢將賸到个血倒在祭壇四周圍。 25佢將油、肥个尾、包等腹內个油、肝个網油、兩隻腰仔㧯腰仔面頂个油，㧯右後腿分出來。 26佢對獻給上主該籃無酵餅中拿出一垤餅，一垤膏橄欖油个餅，㧯一垤薄餅，放在油㧯右腿頂， 27然後將這兜東西全部放在亞倫㧯佢該兜孻仔个手項搖幾下做搖祭獻給上主。 28接等摩西對佢等个手項將這兜餅接過來，放在祭壇頂个燒化祭頂高燒獻。這係授聖職給祭司所獻个祭。這火祭个香味係上主所歡喜个。 29然後，摩西將胸脯肉搖幾下做搖祭獻給上主；這係摩西對該授聖職給祭司个羊牯所得个一份。這全部係遵照上主命令摩西做个。

30 摩西拿一些仔聖油㧯祭壇頂个血拂在亞倫㧯佢該兜孻仔身上，也拂在佢等个衫褲頂。恁樣，佢將佢等㧯佢等个衫褲分別為聖，奉獻給上主。

31 摩西對亞倫㧯佢該兜孻仔講：「你等愛遵照上主个命令將肉帶到聖帳篷門口，在該位煮，在該位食，又愛食籃仔肚該授聖職給祭司个餅。 32賸到个肉㧯餅全部愛燒掉。 33你等愛留在聖帳篷門口七日，做毋得離開，等到你等接受聖職个禮儀完成，因為你等愛用七日个時間接受聖職做祭司。 34𠊎等今晡日所做个全部係遵照上主个命令做个；這命令係為到愛贖你等个罪。 35你等一定愛留在聖帳篷門口七日，日夜在該位，遵行上主个命令。若係無，你等一定會死。這就係上主給𠊎个命令。」 36所以，亞倫㧯佢該兜孻仔就遵行上主吩咐摩西命令个一切事。

Currently Selected:

利未記 8: THV12Hdb

Highlight

Copy

Compare