利未記 1
1
燒化祭个條例
1上主對聖帳篷中喊摩西，吩咐佢 2向以色列人民宣佈以下个條例。
你等當中若有人獻牲儀給上主，愛獻牛群中个牛，抑係羊群中个羊。
3若係佢獻牛做燒化祭，一定愛用無缺點个牛牯，牽牠到聖帳篷門口，上主就會接納。 4佢愛將手放在頭牲个頭那頂；這燒化祭就受接納，能代佢贖罪。 5佢愛在上主面前將這隻牛牯㓾死；亞倫族个祭司愛獻牲儀个血，然後將這血洒在聖帳篷門口个祭壇四周圍。 6接等，該人愛剝牲儀个皮，將肉切做一垤一垤； 7該兜祭司愛將柴放在祭壇頂，點火， 8將肉、頭那㧯油全部放在祭壇个柴火頂高來燒。 9該人一定愛用水將牲儀个腹內㧯後腿洗淨；祭司愛將牲儀全部放在祭壇頂獻做燒化祭。這火祭个香味係上主所歡喜个。
10若係佢獻綿羊抑係山羊做燒化祭，佢一定愛用無缺點个羊牯。 11佢愛在祭壇个北片，在上主面前將這隻羊牯㓾掉；亞倫族个祭司愛將牲儀个血洒在祭壇个四周圍。 12該人將肉切做垤以後，祭司愛將肉、頭那㧯油全部放在祭壇个柴火頂高來燒。 13該人一定愛用水將牲儀个腹內㧯後腿洗淨；祭司愛將牲儀全部放在祭壇頂獻做燒化祭。這火祭个香味係上主所歡喜个。
14若係佢獻鳥仔給上主做燒化祭，佢一定愛用班鳩抑係月鴿仔。 15祭司愛將鳥仔帶到祭壇前，扭斷牠个頭那，將頭那放在壇頂來燒，將鳥仔放在壇堘，俾牠个血流燥。 16該人愛將鳥仔个頦㧯留在底背个東西共下拿掉，㧹在祭壇東片倒灰个地方。 17佢愛拿等鳥仔个兩隻翼胛，將鳥仔扯開，總係毋好扯斷掉；然後祭司愛將牲儀放在祭壇頂、在柴火頂高，獻做燒化祭。這火祭个香味係上主所歡喜个。
Currently Selected:
利未記 1: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
