希伯來書 2

偉大个拯救

1因為恁樣，𠊎等一定愛堅守所聽个真理，免得被潮流打走。 2天使所傳給𠊎等祖先个道理已經證明係確實个；所有毋順從抑係悖逆這道理个人已經受到應得个責罰。 3既然係恁樣，若係𠊎等忽略恁大个拯救，樣般閃得走責罰呢？這拯救最先係主本身講个；該兜聽到个人已經對𠊎等證明過係事實个。 4上帝自家也用神蹟、奇事，㧯各種个大能來加強佢等个見證；同時，佢又照自家个旨意，將聖靈个恩賜分給𠊎等。

拯救个先鋒

5𠊎等所講、該將來个世界，上帝並無交給天使管理。 6顛倒，像聖經某所在講个：

上帝啊，人算麼介，你顧念佢！

世間人算麼介，你看顧佢！

7你使佢暫時比天使較細；

你用榮光尊貴做佢个冕旒；

8你使佢管理萬物。

這位既然講，上帝使人「管理萬物」，當然係包含一切；事實上，𠊎等這下並無看到人管理萬物。 9𠊎等只有看到耶穌，佢暫時成做比天使較細，通過上帝个恩典，代萬人來死；因為佢經歷死个痛苦，就得到榮光㧯尊貴个冕旒。 10該創造㧯維持萬物个上帝，使耶穌經歷苦難，成做完全，為到愛使眾子女共下享受佢个榮耀；上帝恁樣做係當然个。因為耶穌做先鋒，親身帶領佢等進入拯救。

11佢洗淨人个罪；佢㧯該兜得到淨浰个人就屬共一個阿爸。所以，耶穌認佢等做兄弟姊妹，也無看做見笑。 12佢講：

上帝啊，𠊎愛對𠊎个兄弟姊妹傳揚你个名；

𠊎愛在全會眾个面前歌頌你。

13佢也講：

𠊎愛信靠上帝；

又講：

看啊，𠊎㧯上帝所賜給𠊎个子女全部在這位。

14既然這兜子女係有肉有血个人，耶穌本身也共樣成做肉體；恁樣，通過佢个死，佢能將揢等死个權勢个魔鬼廢掉， 15又釋放該兜一生人被驚死个心捆綁个人。 16盡明顯，佢毋係幫助天使；佢係幫助亞伯拉罕个子孫。 17所以，佢一定愛在各方面㧯佢个眾兄弟姊妹共樣，好在上帝面前做佢等慈悲又信實个大祭司，來使人个罪得到赦免 #2:17 「來使人个罪得到赦免」抑係譯做「為人个罪獻上贖罪祭」。。 18因為佢識親身經歷試探㧯痛苦，所以佢這下能幫助該兜受試探个人。

Currently Selected:

希伯來書 2: THV12Hdb

Highlight

Copy

Compare