歌羅西書 4
4
1做主人个，你等愛公平合理來對待奴僕；愛知，你等在天頂也有一位主。
勸勉个話
2你等愛迫切祈禱，祈禱个時愛警醒，也愛存感謝个心。 3同時，也請為𠊎等祈禱，求上帝為𠊎等開傳福音个門，來講論基督个奧秘。這就係𠊎坐監个原因。 4請為𠊎祈禱，使𠊎盡責任將這個奧秘講到清清楚楚。
5同毋係基督徒个人往來个時，你等愛把扼機會，好好用你等个智慧。 6講話愛常常和氣，像用鹽調味，愛知樣般回答每一個人所提出个問題。
最尾个請安
7𠊎在這位个一切情形，𠊎等親愛个兄弟推基古會詳細㧯你等講。佢係一個忠心个工人，同𠊎共下做主个僕人。 8𠊎特別派佢去你等該位，報告𠊎等這位个情形，好俾你等得到鼓勵。 9同佢共下去个有一個忠心又親愛个兄弟阿尼西謀；佢係你等該位个人。佢兩儕會將這位一切个事㧯你等講。
10同𠊎共下坐監个亞里達古對你等請安。巴拿巴个表老弟馬可也對你等請安。 (關係馬可，𠊎識吩咐，佢若係去你等該位，愛接待佢。) 11偏名猶士都个耶數也對你等請安。猶太人个信徒當中，只有佢三儕為上帝个國㧯𠊎同工，對𠊎有盡大个安慰。
12對你等該位來个以巴弗向你等請安；佢也係基督耶穌个僕人。佢常常為你等迫切祈禱，求上帝使你等信心堅定，做成熟个基督徒，完全順服佢个旨意。 13佢為你等，也為到老底嘉㧯希拉坡里个兄弟姊妹辛苦做工；這係𠊎做得證明个。 14𠊎等所親愛个路加醫生㧯底馬兩儕也向你等請安。
15請代𠊎等對老底嘉个兄弟姊妹，㧯寧法，還有在姖屋下个教會請安。 16你等宣讀這封信仔後，請轉交給老底嘉教會宣讀；同時，你等也愛讀對老底嘉教會轉給你等个信仔。 17愛㧯亞基布講：「你所領受該服事主个職務一定愛盡力完成。」
18𠊎 — 保羅親筆對你等請安。你等愛記得𠊎係帶等鎖鍊个！
願上帝賜恩典給你等！
Currently Selected:
歌羅西書 4: THV12Hdb
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012
