哥林多後書 13
13
警告㧯請安
1這係𠊎第三擺去訪問你等。聖經識講：「任何个控告一定愛有兩三個人做證，正做得成立。」 2對該兜頭擺就犯了罪个，㧯其他个人，𠊎在第二擺訪問个時已經警告你等，這下無在你等該位，𠊎愛再一擺警告你等，講：「下一擺𠊎去到个時節，絕對毋饒佢等。」 3你等一定會有基督通過𠊎講話个證據。基督對待你等毋係軟弱个；顛倒，佢在你等當中係大有能力个。 4雖然佢在軟弱中被人釘死在十字架頂，總係，因為上帝个大能，佢這下還係生等。共樣，𠊎等同佢結連也係軟弱个，總係為到你等个緣故，𠊎等愛靠上帝个大能同佢共下生等。
5你等愛考驗自家，看你等所過个係信心个生活無；你等愛省察自家！你等敢毋知在你等底背个係耶穌基督嗎？除非你等係企毋住个人。 6𠊎希望你等會知，𠊎等毋係企毋住个人。 7𠊎等求上帝莫俾你等做麼介壞事。目的毋係愛顯明𠊎等个成功，係愛你等行事正直；𠊎等就係被人看做係失敗个也無相干。 8𠊎等絕對不能悖逆真理來行事，只有為到真理來打拚。 9𠊎等軟弱，你等剛強，𠊎等也歡喜。𠊎等个祈禱就係愛你等成做完全个人。 10因為恁樣，無在你等該位个時，𠊎正寫這封信仔，希望𠊎去到你等該位个時，毋使用主給𠊎个職權來嚴嚴對待你等。主給𠊎職權係愛造就你等，毋係愛破壞你等。
11總講，兄弟姊妹啊，你等愛歡歡喜喜。愛做完全人。你等愛接受𠊎个勸話；大家愛同心，彼此和睦。恁樣，慈愛㧯賜平安个上帝一定會㧯你等同在！
12你等愛聖潔相唚彼此請安！
所有个聖徒全部對你等請安！
13願主耶穌基督个恩典、上帝个慈愛、聖靈个相通，㧯你等大家同在！
Currently Selected:
哥林多後書 13: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012