哥林多後書 12
12
保羅看到異象㧯啟示
1雖然自誇無麼介利益，總係𠊎誇口還係無奈何个；𠊎的確愛講起主賜給𠊎个異象㧯啟示。 2𠊎知有一個屬基督个人，十四年前，佢受提到天頂个最高一層去 #12:2 「天頂个最高一層去」原文直譯係「第三層天去」。(𠊎毋知佢係肉身上去，抑係在異象中上去，只有上帝知)。 3-4𠊎再講一擺，𠊎確實知這個人受提到樂園 (𠊎毋知佢係肉身上去，抑係在異象中上去，只有上帝知)。在該位，佢聽到無法度表達个話語、人做毋得說明个事情。 5論到這個人，𠊎愛誇口；總係，關係𠊎自家，除了𠊎个軟弱以外，𠊎就無麼介好誇口。 6其實，𠊎就係誇口，也毋算係憨蚩，因為𠊎所講个係事實。總係，𠊎無愛誇口，免得人將𠊎看到忒高，超過佢在𠊎身上所看到抑係聽到个。
7為到毋愛使𠊎因為得到恁多特別个啟示就奢鼻，有一枝竻仔 #12:7 「一枝竻仔」：可能係一種病痛，抑係對敵，抑係迫害。刺等𠊎个身體，像係被撒但个使者纏身一樣，使𠊎毋敢驕傲。 8為到這件事，𠊎識三擺求主將這竻仔挷掉， 9總係主應𠊎講：「𠊎个恩典罅你用；因為𠊎个能力係在人軟弱个時完全顯明出來。」因為恁樣，𠊎特別歡喜誇口𠊎个軟弱，好俾基督个能力臨到𠊎身上。 10為到基督个緣故，𠊎歡喜忍受軟弱、侮辱、困苦、艱難㧯迫害；因為𠊎麼介時節軟弱，麼介時節就堅強。
保羅關心哥林多教會
11𠊎本來應該得到你等个稱讚正著，總係你等迫𠊎做戇仔。就算𠊎無麼介了不起，𠊎還係無輸給該兜所謂个「超級使徒」。 12在你等當中，𠊎已經用最大个忍耐，通過神蹟奇事㧯大能，將𠊎使徒个身份證明出來。 13除了𠊎毋識成做你等个重擔以外，請問，你等有㖠點輸給別个教會呢？因為𠊎對你等恁無公平，請原諒𠊎噢！
14這下𠊎準備愛第三擺去訪問你等。𠊎毋會成做你等个重擔；因為𠊎所愛个係你等，毋係你等个金錢。細人仔本來就毋使奉養爺𡟓，爺𡟓正愛養育細人仔。 15為到你等个靈魂，𠊎甘願付出𠊎所有个一切，甚至𠊎个生命。敢講𠊎越惜你等，得到你等个愛惜就越少係麼？
16恁樣，你等愛承認，𠊎無成做你等个重擔；總係，還係有人講𠊎係用詭詐个手段來拐你等。 17𠊎派去你等該位个人，𠊎敢識利用佢等來批你等麼介麼？ 18𠊎鼓勵提多去訪問你等，還派一個兄弟共下去。提多識批你等麼介麼？佢㧯𠊎所做个，動機敢毋係共樣嗎？𠊎等个行事敢無共樣嗎？
19你等一直恅到𠊎等就係恁樣為自家辯護嗎？事實毋係恁樣！在上帝个面前，𠊎等係講基督愛𠊎等講个。親愛个朋友啊，𠊎等所做个一切無一樣毋係為到愛造就你等！ 20𠊎驚怕𠊎去到个時，發現你等無符合𠊎所希望个，你等看到𠊎也無符合你等所希望个。𠊎也驚看到相爭、嫉妒、大發譴、自私、譭謗、講人个是非、自高自大，㧯混亂。 21𠊎也驚，下一擺去个時，𠊎个上帝會使𠊎在你等面前連頭那都擎毋起來；𠊎會傷心流目汁，因為盡多以前犯罪个人還係無悔改佢等所行个污穢、淫亂㧯放蕩。
Currently Selected:
哥林多後書 12: THV12Hdb
Highlight
Share
Copy
Want to have your highlights saved across all your devices? Sign up or sign in
© The Bible Society in Taiwan, 2012
All rights reserved
© 台灣聖經公會版權所有 2012