Ruma 5

Ku tamakakadalrwane ki Twaumase

1Kuta ka ngwalainga ki salrwane kitumadringelrese ka umawmase, lri ngukaita ki Tamatama ka Yesu Kirisitu si ikainga ku tamakakadalrwaneta ki Twaumase. 2Ngwalai ki salrwane, ku Kirisitu wamalranga mitane si papanianiake pikai ki migemi#5.2 “Ngwalai ki salrwane ... migemi” ku wahunyake madu iya kai “Ngwalai ki Kirisitu, ala dulruta mudaane ki migemi ka kisupisupilrita kaiasasane”. ki Twaumase, ngwalai kikai la kiraragaingata#5.2 “la kiraragaingata” ku wahunyake madu iya kai “lri kirararagaita”. si sidramadrama ku akisupilrane ku lrigu ki Twaumase! 3Adravane ikaita ki akwalriane, sakamiyata kiragaragai;#5.3 “sakamiyata kiragaragai” ku wahunyake madu iya kai “lrika sakamiyata kiragaragai”. asi lwiyane wathingaleta ku sakwalrialri pacebe ku kiadilane, 4ku sakiadiadili kiakiragai ki Twaumase, ku kiakiragai ki Twaumase mailuku ku sasiadradrama. 5Kikai sasiadradrama lri kai pakasekelrame mitane; asi lwiyane ku Twaumase pangwakai iniane si baai mitane ku Siri, la pwacilai pikai ki kidremedremeta arakai ku sakialibakeini.

6Sa turamuramurwanata, ku Kirisitu singiakai ku kelrete ki Twaumase ku vai si pasikai ki mapasaisalriu ka umawmase pacai. 7Ku pasiakai ki madringelrese ka umawmase pacai lu kidremedremane makucingalre; alau lri ikaai ku walreme pasikai ki makalecege ka umawmase pacai. 8Ai ku Twaumase pathingalanenga mitane kudra kadrwa ku apakileketane ku sakialibake: Saikaiyanata ki pasalrivane, ku Kirisitu pasiakainga mitane pacai! 9Ngwalai ku tapacadhaneini, kikainga ala makakadalrungata ki Twaumase; ku tapacadhaneini laka makadrwadrwa ku apalribulane mitane pakidaili ki elathane ki Twaumase! 10Kuta nabadhata ki Twaumase, ai ngwalai ku tapacadhane ki Lalakeini, la makakadalrungata iniane. Kudra makakadalrungata iniane, kaita lri kirimulringa ngukai ku tasielane panianiake ki Kirisitu si kipalribulu? 11Kaika miyaiya kikai sikakathane, kudra makakadalrungata ki Twaumase, la lri mialrita ngwalai ki Tamatamata ka Yesu Kirisitu si kiraragai ki Twaumase?

Adame si Kirisitu

12Kai pasalrivane twalai ki tangeangea si mwa kai kawmasane, ngwalai ki pasalrivane, kai apacadhane la kela kabibilrili; ala kirimu kai apacadhane mulebe mwa ki sanaka umawmasenga, asi lwiyane sanaka umawmase pasalriwnga. 13Sakaiyana pelaela kai hulrice, yakainga ku pasalrivane kai kawmasane; ai kadrwa ku hulrice, kai umawmase la kai kiarakai ku nikelretane ki hulrice kipathavungu. 14Ai, twalai ki Adame pakela ki Musi, kai apacadhane amani ku marasikai ki umawmase, adravane kwidra kai ngiamia ki Adame pasalriu ku kai paluludu ki Twaumase ka pasalrivane ka umawmase, mialri ka lri tara pacai.

Ku Adame sapatuthingalane kudra ki tangea ku lri kela lukabibilrili. 15Ai, kikai taidrusa makakaela, asi lwiyane ku vinuthane ki Twaumase baai ku migemi si pasalrivane ki Adame maadrau ku tamakakaelane. Unu takaalra ku umawmase ku ngwalai ki pasalrivane ki tangeangea ka Adame si pacai; ai ku migemi ki Twaumase maparawramuru ku adravane, ku Twaumase pangwakai ki tangeangea ka Yesu Kirisitu pakalavuthane patarumara ki takaalra ka umawmase ku migemi mialri ka maadrau turamuru. 16Ku migemi ki Twaumase si tapasalrivane ki tangeangea ka umawmase makakaela turamuru. Lu pasalriu ku tangea ka umawmase, kipasudalepe ka “Yakai ku pasalrivane”, ai takaalra ku umawmase ku pasalriu, si la maalralringa ku kaika sudalepe lini malra ku migemi, si kitu “Kadrwa ku pasalrivane”! 17Unu kai apacadhane ngwalai ku tapasalrivane ki tangeangea ka umawmase si tupathagili marasikai ki yakawmasane, ai ku tatangeangeane si pangimia ku awngane ki Yesu Kirisitu yai madradrau! Sanaka tarwamaranga ku ngiaradhekane ka migemi ki Twaumase si vinuthane kikadalru iniane ku umawmase, lri ngukai ki Kirisitu makanaelre kitulalake, si gemegeme ku puku.

18Lakamani, ngwalai ki tapasalrivane ki tangeangea, sanaka umawmase la kitupasalrivanenga; laka thadaalrane, ngwalai ki tangeangea ku tapiane ku madringelrese, ku laumawmase kiapacepe ku pasalrivane si la tarumara ku niake. 19Mararaamau kudra ki tangea ka umawmase ka wabaebalre ki nidrekasane, la kitupasalrivanenga ku takaalra ku umawmase; laka thadaalrane, pasalaladha ku tangea ka umawmase, la kitumadringelrese ku takaalra ku umawmase. 20Kudra tatuhulricane parwadriimalringa parukakalra ku pasalrivane; ai kai pasalrivane lu arudrima kakalra, ku migemi ki Twaumase maiyalri aru ngiradhekane. 21Mararaamau ki pasalrivane ngwakai ki apacadhane si kainganai marasikai rathudu, ku migemi ki Twaumase la mialri ngukai ki dringelresane si kainganai rathudu, alakamani ku ngukaita ki Tamatama ka Yesu Kirisitu si malra ku palralrawthu ka niake.

Currently Selected:

Ruma 5: NDV

Highlight

Compare

Copy