Taasipane 8
8
Pacegecege ku pitu ku tinaki
1Ku Tamatama kawariva ki Musi, 2“Kusu pelaela ki Arungu, lu paacegecege ku pitu ku tinaki ani papia cucubungu ku tapaledrane.” 3Ku Arungu la pasusu ku tadrekasane, si malra kwini tinaki papia ki cucubungu ki tapikaikaiyane ki tinaki. 4Kwini tapikaikaiyane ki tinaki, twalai belenge pakela ki lebe, niarakaiyane ku kingi darepe patuelre, singikai ku tapelaelane ki Tamatama ki Musi tungimiyaiya darepe.
Lrisi ki akabulane si apatarumarane ki swa Lrivi
5Ku Tamatama kawariva ki Musi, 6kusu malra patatukudha ki swa Lrivi si drumane ka swa Iseraylri, 7pangimia kai lebe ka kakudhane bula liniane: Arakaiya kudra mabula ka acilai ubu ki kinawmasane lini, la pangikakiriti palraelre ki kinawmasane lini pakabula, la sinau pakabula ku laimai. Lumia kikai, kwini lalasu ikai ki lrisi kiatumabulanga. 8Kwini lalasu lri iluku ku vaeva ku lrulai ka sawvalai ka lwange, si atara patarumarane ka Taleke ka lrisi, ka amani kudra nithalreanenga apaelre ki milrikinku si abera ki ulrive, lai lri ilukwanasu ku vaeva ka lrulai ka lwange; tu Balrithane ki pasalrivane ka lrisi. 9Kusu ala lri sarubusu patuelre ki swa Iseraylri, si paacegecege ki swa Lrivi cucubungu ki Alrivilrivi ka balrawbau. 10Ku swa Iseraylri lri malra ku alrima lini pwa ki awlru ki swa Lrivi; 11ku Arungu lri malra ki swa Lrivi si patarumara nakwane, tunipawkalrivilane ka saceacebe ki swa Iseraylri. Lumia kikai, kwini lalasu ala lri maka dulru kipuawngane ku awnganeli. 12Ku swa Lrivi lri ansu pikai belenge ki awlru ki drusa ka sawvalai ka lwange; ku vaeva lri tu Balrithane ki pasalrivane ka lrisi, ku vaeva lri tu Lama ka lrisi, si patarumara ki Tamatama, pakai ku apasikaiyane ki swa Lrivi ka lrisi ki kiapakabula.
13“Kusu malra ki swa Lrivi tunipawkalrivilane ka acebe si patarumara nakwane, la pakadrenge ki Arungu si lalalakeini kwini ki lalasu. 14Kusu pangimia kikai patatukudha ki swa Lrivi si drumane ka swa Iseraylri, lani ka swakainga nakwane. 15Kusu lu pakabulangasu ki swa Lrivi si patarumaranga nakwane, kwini lalasu lri maka dulrunga ikai ki Alrivilrivi ka balrawbau marasikai ki awngane. 16Peaelaelanga naku, kwini lalasu lri ubalrithi ku taetalane ki tinutakane ki swa Iseraylri; kwini lalasu lrika nakwane tangeangeea. 17Sa papacadhaku kwini ki aswalalanga kitulalake ki swa Izipiti sakavai kwini, nipatatukudhaneenga tusaniange ka takatakanga ki dadadaane ki swa Iseraylri si kwini aswalaalanga kitulalake ka lanilapulapwane lrika tali nakwanenga. 18Kikai asasane lri malraku ki swa Lrivi apatukamani ki takataakanga ki swa Iseraylri makanaelre. 19Wasikawlaku ki swa Lrivi si baai ki Arungu si lalalakeini, tusaceacebe ki swa Iseraylri, lri pasikai ki swa Iseraylri kipuawngane ikai ki Alrivilrivi ka balrawbau si pasikai liniane patarumara ku Balrithane ki pasalrivane ka lrisi, amani lu ngudadethe ki Alrivilrivi ka taikaikaiyane si dawlu ku akipamatikurwane.”
20Ku Musi, Arungu si mapapangale makanaelre ki swa Iseraylri pasusu ku vaga ka drekase ki Tamatama ki Musi si malra ki swa Lrivi patarumara. 21Ku swa Lrivi ngiababulanga, si sinau ku laimai lini; ku Arungu la malra liniane tunipawkalrivilane ka acebe si baai patarumara ki Tamatama, la mialri pasikai liniane patarumara ku Balrithane ki pasalrivane ka lrisi bula liniane. 22Ku ngwakai ki swa Lrivi, ku mapapangale pasusu ku drekase ki Tamatama ki Musi nguvavaeva pasusunga. Lumia kikai, ku Lrivi lri dulru ikai ki tasangilukane ki Arungu si lalalakeini, pangimia ku awngane ki Alrivilrivi ka balrawbau.
23Ku Tamatama kawariva ki Musi, 24“Sanaka tara 25 ku cailini ku swa Lrivi lri ikai ki Alrivilrivi ka balrawbau kipuawngane, 25lu kelanga ki taramalrimale ku caili lri palikainga ku awngane si isadra. 26Ki bilrilanenga kwini lasu lri dulru ikai ki Alrivilrivi ka balrawbau paraluralubu ki papalraini, ai kai lri maka ngikakamani tangeangeea kipuawngane. Lri pangimiasu kikai apavavala pakaungu ki swa Lrivi.”
Currently Selected:
Taasipane 8: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
