Taasipane 3
3
Lalalake ki Arungu
1Ku Tamatama sa ikai lregelrege Sinai kawrivariva ki Musi si Arungu, ku mwabaibalrithi ki Musi si Arungu amani kikai yalebe kai laumawmase: 2Ku Arungu tasupate ku lalake: Ku takataakanga Nadabe, ku lagiagi iniane amani kai Abihu, Ilriazare, Ithamare. 3Kwini lalasu kia pulawlau pacegecege abarakalai. 4Ai ku Nadabe si Abihu sa ikai calragulragu ka Sinai papia ki Tamatama patarumara ku languapwapwi la kipapacai. Kwi lalasu kadrwa ku lalake lini, lakamani kwidra abarakalai ki Ilriazare si Ithamare sa panianianiakeana ku Arungu.
Ku swa Lrivi kiasikawlu abarakalai
5Ku Tamatama kawariva ki Musi iya kai, 6“Kusu mailuka ki zuku ki Lrivi kela, si sikawlu liniane asasiakawlu ki barakalai ka Arungu. 7Lri kamani lini ku tara marasikai ku awngane ki Alrivilrivi ka balrawbau, pasikai ki barakalai si mapapangale kipuawngane, 8Lri drangalru ki lawbubulu ki Alrivilrivi ka balrawbau, pasikai ki drumane ki swa Iseraylri kipuawngane. 9Ku awngane ki Lrivi kathane ku amarasikaiyane papia ki Arungu si lalalakeini. 10Kusu sikawla ki Arungu si lalalakeini pakicapili ku awngane ki barakalai. Sanaka aneanenga ku umawmase ku twalisi pasalriu ki kikai, lri tara kipapacai.”
11Ku Tamatama kawariva ki Musi iya kai, 12-13“Kikainga lrika nakwanenga ki swa Lrivi. Saka tapapacadhaneli ki aswalalanga kitulalake ki swa Izipiti, wamalra kwini ki takataakanga si aswalaalanga kitulalake ka nilapulapwane ki dadadaanane ki swa Iseraylri, si patukudha tusaniange patuelre, ka nakwanenga. Ai, kikai kai swa Lrivi lri ngitalikaiyane ki tasakaiyane ki takatakanga ki swa Iseraylri; kwini lalasu lrika nakwanenga. Tamatamaku.”
Takipacasane ki umawmase ki swa Lrivi
14Ku Tamatama ikai calragulragu ka Sinai wadrekase ki Musi, 15singikaiya ki maretetese ki dadaanane si pacase ki swa Lrivi, la malra kwini kiatulalakenga tara dramare papubebelenge ku sawvalai pacase patuelre. 16Ku Musi la pangimia kwini. 17-20Tatulru ku lalake ki Lrivi: Geresune, Kuhathe, Mirari; kwini amani ku cucungulane ki zuku ki Geresune, zuku ki Kuhathe, zuku ki Mirari. Ku Geresune tadrusa ku lalake: Lribini si Simi. Ta supate ku lalake ki Kuhathe: Amerame, Izehare, Hiburungu si Uzile. Tadrusa ku lalake ki Mirari: Maheli si Muse. Amani lini ku cucungulane ki lamaretetese ka twalai ki zuku ki Lrivi.
21Ku wa Geresunane yakai kai taidrusa ka wacekecekele ka Lribini si Simi. 22Ku taradramarenga papubebelenge ku takitulalakane ku sawvalai ku kiapacase lu paelrelreanenga ku umawmase ta 7,500. 23Kikai maretetese lri italikai sapakalriwgu, ilrilrikudru ki Alrivilrivi ka balrawbau cegecege ku tasuladhane lini. 24Ku lalake ki Laele ka Ilriasape amani ku tamatama kai ki zuku. 25Lrika amani lini ku wakadrenge ki Alrivilrivi ka balrawbau, kwini ki adringi ka sapasabelengane ki Alrivilrivi ka balrawbau si sakabungane, sapaidringane ka make, 26ku make ku ngiathalringulu ki Alrivilrivi ka balrawbau si tapatarumaramarane, sapaidringane ki lrawlrawdru ki kalatadrane ki Alrivilrivi ka balrawbau. Lrika amani lini ku kiacapili sanaka macacapili ki ngwakai kai ki awngane.
27Ku maretetese ki Kuhathe yakai kai wacekecekele ki Amerame, Izehare, Hiburungu si Uzile. 28Ku taradramarenga papubebelenge ku takitulalakane ku sawvalai ku kiapacase lu paelrelreane ta 8.600. 29Kikai lamaretetese lri italikai lrawdru cegecege ku tasuladhane. 30Ku lalake ki Uzile ka Ilrizapane amani ku tamatama kikai ki maretetese. 31Lri kamani lini ku arathungu kadrenge ki Langiane, tapikaikaiyane ki pange ka cukwi, tapikaikaiyane ki tinaki, tapatarumaramarane, la sarakaikaiyane ki barakalai ikai Alrivilrivi ka taikaikaiyane, si sapaidringane ki lrawlrawdru ki Alrivilriviilrivinga ka taikaikaiyane. Lri kamani lini ku kiacapili sanaka ngwakai kikai ki laawngane.
32Ku tamatama ki swa Lrivi amani ku lalake ki Arungu ka Ilriazare; lri kicapili kwini ki sanaka kiapuawawngane marasikai kai ki Alrivilrivi ka taikaikaiyane.
33Ku maretetese ki Mirari yakai kai wacekecekele ki tai Maheli si tai Muse. 34Ku taradramarenga ku takitulalakane ku sawvalai papubebelenge ku kiapacase lu paelrelreane ta 6,200. 35Kikai zuku lri italikai dradha ki Alrivilrivi ka balrawbau cegecege ku tasuladhane. Ku lalake ki Abihaile ka Zurile amani ku tamatama kikai ki maretetese. 36Kwini lalasu kiapamarasikai kai ki labulri, sabarebare, ulrudru, drapale ki Alrivilrivi ka balrawbau si sanaka mamamwa ku ngwakai kai ku satumatumane. Kwini lalasu lri marasikai patuelre ku mamamwa kilakikai ki awngane. 37La lri kamani lini ku lri marasikaikai katheme kwini yatali latadre kwini ulrudru, drapale, taparairaisane ka ulrudru si calrisi.
38Ku Musi, Arungu si lalake ki Arungu lri sakai tali talrawane, icucubungu ki Alrivilrivi ka balrawbau cegecege ku tasuladhane. Lri ka amani lini ku lri pasikai ki swa Iseraylri si marasikai ku awngane ikai daane ki Alrivilrivi ka taikaikaiyane. Sanaka aneane ku waranau pasalriu kikai ki awngane, lri tara kipapaacai. 39Ku Musi, Arungu pasusu ku drekase ki Tamatama, singikai ki maretetese pacase kwini ki taradramarenga ku takitulalakane papubebelenge ku sawvalai ki swa Lrivi, lu paelrelreane ta 22,000.
Ku swa Lrivi ngiatalingikaiyane ki latinutakane
40-41Ku Tamatama kawariva ki Musi, “Kwini sanaka tinutakane ki swa Iseraylri lrika nakwane patuelre, la kamani ku singikaiya ki tangeea ku taradramarenga ku takitulalakane papubebelenge ku tinutakane ki swa Iseraylri. Ai, peaelaelaku kai swa Lrivi ka umawmase lrika amani ku ngiatalingikaiyane liniane ka lrika nakwane! Tamatamaku. Lai lri mialriaku pelaela kwini lwange ki swa Lrivi lri ngitalingikaiyane ki sanaka aswalaalanga kitulalake ka lwange.” 42-43Ku Musi pasusu ku tadrekasane, la malra kwini ki taradramarenga ku takitulalakane ku sawvalai papubebelenge ka tinutakane makitu pacase, lu paelrelreane ta 22,273.
44Ku Tamatama kawariva ki Musi, 45“Kikai asasane kusu malra kwini ki swa Lrivi patarumara nakwane, lani ngitalikaiyane ki takatakanga ki swa Iseraylri, la mialri malra kwini lwange ki swa Lrivi patarumara nakwane, lani ngitalingikaiyane ki aswalalanga kitulalake ka lwange. 46Ngwalai saka makakalra ku ta 273 ku tinwapane ki swa Iseraylri ki tinutakane ki swa Lrivi, lri tara langaisu sawlri kikai la tinutakane. 47Singikai ku takelretane ki Alrivilrivi ka taikaikaiyane, ku tangeea lri pakalrima ku gingi ka paisu. 48Kusu malra kikai sabalrithane ka paisu si baai ki Arungu si lalalakeini.” 49Ku Musi pasusu ku tadrekasane ki Tamatama, 50si malra ku 1,365 ku gingi ka sabalrithane ka paisu satedre 51baai ki Arungu si lalalakeini.
Currently Selected:
Taasipane 3: NDV
Highlight
Copy
Compare
Share
Want to have your highlights saved across all your devices? Sign up or sign in
© The Bible Society in Taiwan, 2017
All rights reserved
© 臺灣聖經公會版權所有，2017
